В вто̀рник вѐчера

Октоих ГЛАС 1

СРЕДА

В вто̀рник вѐчера

На Го̀споди воззва̀х, стихѝры крѐстны, глас 1

Подо̀бен: Прехва̀льнии му̀ченицы[1]:

Стѝх: А̀ще беззако̀ния на̀зриши Го̀споди, Го̀споди, кто̀ постоѝт; я̀ко у Тебѐ очищѐние ѐсть.

На крестѐ пригвожда̀ем, Христѐ Бо̀же, я̀ко человѐк, человѐческое естество̀ обожѝл есѝ, и началозло̀бнаго умертвѝл есѝ змѝя. На̀с свободѝл есѝ кля̀твы я̀же от дрѐва, я̀ко благоутро̀бен бы̀в кля̀тва: пришѐл есѝ, я̀ко да всѐм пода̀си благословѐние, и вѐлию мѝлость.

Стѝх: Ѝмене ра̀ди Твоего̀ потерпѐх Тя̀, Го̀споди, потерпѐ душа̀ моя̀ в сло̀во Твоѐ, упова̀ душа̀ моя̀ на Го̀спода.

Вся̀кия превы̀шши чѐсти сы̀й Влады̀ко, обезчѐститися благоволѝл есѝ, поно̀сную претерпѐв Щѐдре на дрѐве смѐрть, ея̀же ра̀ди безсмѐртие, объя̀т ро̀д человѐческий, и жѝзнь пѐрвую восприя̀т, Тебѐ умѐршу пло̀тию Всесѝльне.

Стѝх: От стра̀жи у̀тренния до но̀щи, от стра̀жи у̀тренния, да упова̀ет Изра̀иль на Го̀спода.

Крѐсте Всечестны̀й, вѐрных всѐх очистѝлище, вся̀ освятѝ тебѐ покланя̀ющияся и Христа̀ сла̀вящия, ру̀це пречѝстеи Простѐршаго на тебѐ неизречѐннаго ра̀ди благоутро̀бия и концы̀ землѝ вся̀ во едѝно собра̀вшаго.

Ѝны стихѝры Богоро̀дице, гла̀с 1

Подо̀бен: Небѐсных чино̀в[2]:

Стѝх: Я̀ко у Го̀спода мѝлость, и мно̀гое у Него̀ избавлѐние: и то̀й изба̀вит Изра̀иля от всѐх беззако̀ний его̀.

У креста̀ предстоя̀щи Сы̀на и Бо̀га Твоего̀,/ и долготерпѐние Того̀ смотря̀ющи,/ глаго̀лаше пла̀чущи Ма̀ти Чѝстая:/ увы̀ Мнѐ, Ча̀до Сладча̀йшее!/ Что̀ сия̀ стра̀ждеши непра̀ведно Сло̀ве Бо̀жий;// да спасѐши человѐчество.

Стѝх: Хвалѝте Го̀спода всѝ язы̀цы, похвалѝте Его̀ всѝ лю̀дие.

У креста̀ предстоя̀щи, Невѐсто Неискусому̀жная,/ и я̀же от болѐзней я̀звы приѐмлющи, вопия̀ше:/ да не безча̀дну Мя̀ явѝши, Ча̀до моѐ,/ ро̀ждшую Тя̀ Сло̀ве Бо̀жий:/ не оста̀ви Мя̀ едѝну// Единоро̀дный, Отцу̀ соприсносу̀щный.

Стѝх: Я̀ко утвердѝся мѝлость Его̀ на на̀с, и ѝстина Госпо̀дня пребыва̀ет во вѐк.

Внегда̀ Тя̀ ражда̀х, болѐзни ника̀коже имѐх:/ и ка̀ко ны̀не болѐзни подъѐмлю,/ Тебѐ Сло̀ве непра̀ведно распина̀ему;/ вопия̀ше го̀рьку Дѐва слезя̀щи./ Увы̀ Мнѐ! Не терплю̀ вѝдети на крѐст, воздвѝжена// Тя̀ Человеколю̀бче.

Сла̀ва, и ны̀не, богоро̀дичен: Твоего̀ Сы̀на и Влады̀ку,/ дрѐвле я̀ко вѝдела есѝ,/ на крестѐ ру̀це распростѐрша,/ и копиѐм рѐбра ископова̀ема,/ Ма̀ти Чѝстая/ рыда̀ющи взыва̀ла есѝ:/ увы̀ Мнѐ! Ка̀ко стра̀ждеши,// стра̀сти человѐков отъѐмляй Человеколю̀бче.

Та̀же, Свѐте тѝхий: Посѐм прокѝмен днѐ. Сподо̀би Го̀споди в вѐчер: И ектения̀.

На стихо̀вне стихѝры крѐстны, гла̀с 1:

Крѐст водрузѝся на ло̀бнем, и процветѐ на̀м безсмѐртие, от исто̀чника приснотеку̀щаго ребра̀ Спа̀сова.

Стѝх: К Тебѐ возведо̀х о̀чи моѝ, живу̀щему на Небесѝ. Сѐ я̀ко о̀чи раб в руку̀ госпо̀дий своѝх, я̀ко о̀чи рабы̀ни в руку̀ госпожѝ своея̀: та̀ко о̀чи на̀ши ко Го̀споду Бо̀гу на̀шему, до̀ндеже ущѐдрит ны̀.

Неразрушѐна стена̀ на̀м ѐсть Честны̀й Крѐст Спа̀сов: на него̀ бо надѐющеся, спасѐмся всѝ.

Стѝх: Помѝлуй на̀с, Го̀споди, помѝлуй на̀с, я̀ко по мно̀гу испо̀лнихомся уничижѐния: наипа̀че напо̀лнися душа̀ на̀ша поношѐния гобзу̀ющих и уничижѐния го̀рдых.

Му̀ченичен: От до̀брыя ку̀пли ва̀шея святѝи! Я̀ко кро̀ви да̀сте, и небѐсныя наслѐдовасте, и приврѐменно искусѝвшеся, вѐчно веселитѐся: воѝстину добра̀ ва̀ша ку̀пля, тлѐнная бо оста̀вльше, нетлѐнная восприя̀сте, и со А̀нгелы ликовству̀юще, поѐте непреста̀нно Тро̀ицу Единосу̀щную.

Сла̀ва, и ны̀не, крестобогоро̀дичен:

Подо̀бен: Небѐсных чино̀в:

Воздвѝжена я̀ко вѝде на крестѐ А̀гнца,/ Непоро̀чная Дѐва пла̀чущи вопия̀ше:/ Сла̀дкое Моѐ Ча̀до,/ что̀ но̀вое и пресла̀вное видѐние;/ ка̀ко содержа̀й вся̀ческая го̀рстию,// на дрѐве пригвожда̀ешися пло̀тию.

Та̀же, Ны̀не отпуща̀еши: Трисвято̀е. По О̀тче на̀ш: Тропа̀рь и отпу̀ст.

Во вто̀рник на повечѐрии,

Кано̀н Пресвятѐй Богоро̀дице. Гла̀с 1

Пѐснь 1

Ирмо̀с[3]: Твоя̀ победѝтельная деснѝца/ боголѐпно в крѐпости просла̀вися:/ та̀ бо безсмѐртне,/ я̀ко всемогу̀щая протѝвныя сотрѐ,// израильтя̀ном пу̀ть глубины̀ новосодѐлавшая.

Ѝже во̀инством небѐсным Недовѐдомый, Отроковѝце Всенепоро̀чная, пло̀ть прия̀т от пло̀ти Твоея̀, и обновѝ истлѐвшую преступлѐнием пѐрвым.

Пѐсньми ублажѝм вѐрнии, Бо̀жия Сло̀ва па̀че словесѐ Родѝтельницу: сия̀ бо Пренепоро̀чная, земны̀м явѝся украшѐние, и всѐм согреша̀ющим Предста̀тельница бы̀сть.

Сла̀ва: Явѝлася есѝ простра̀ннейши небѐс: Творца̀ бо вся̀ческих вмѐщши Ма̀ти Приснодѐво. Тѐмже вопию̀ Ти: тесноты̀ вся̀кия мя̀ смерторо̀дныя изба̀ви Богора̀дованная.

И ны̀не: Да̀ждь на̀м по̀мощь Чѝстая, обурева̀емым мольбо̀ю скорбѐй, низложѝ враго̀в на̀ших лука̀вая возношѐния, и пода̀ждь всѐм спасѐние, благочѐстно Тя̀ сла̀вящих.

Пѐснь 3

Ирмо̀с: Едѝне вѐдый человѐческаго существа̀ нѐмощь,/ и мѝлостивно в нѐ вообра̀жся,/ препоя̀ши мя̀ с высоты̀ сѝлою,/ ѐже вопѝти Тебѐ Святы̀й:// одушевлѐнный хра̀ме, неизречѐнныя сла̀вы Твоея̀ Человеколю̀бче.

По̀лный истощава̀ется на̀с ра̀ди, и приѐмлет Безнача̀льный от Тебѐ нача̀ло Дѐво Пренепоро̀чная, и вѝдится Невѝдимый, и пита̀яй вся̀ческая, млеко̀м пита̀ется, обновѝти человѐки помышля̀я.

Исцелѝ сокрушѐние на̀ше Дѐво Неискусобра̀чная, Исцелѝтеля ро̀ждшая, и Го̀спода, вхо̀д на̀м к жѝзни показа̀вшаго благода̀тию: Его̀же непреста̀нно молѝ ущѐдрити и спастѝ рабы̀ Твоя̀.

Сла̀ва: Я̀же едѝна естество̀ человѐков обожѝвшая, па̀че естества̀ Всенепоро̀чная, ро̀ждшемуся из Тебѐ молѝся, согрешѐний на̀ших прощѐние да̀ти, и ра̀дование вѐчное, Пресвята̀я Дѐво Всепѐтая.

И ны̀не: В лѐности иждѝв жѝзнь, припа̀даю Тѝ Пречѝстая, я̀же к Бо̀гу прѝсными молѝтвами Твоѝми воздвѝгни мо̀й у̀м, и просветѝ всего̀ мя очернѐнаго, покая̀ния светлостьмѝ, да вѐрою и любо̀вию сла̀влю Тя̀.

Пѐснь 4

Ирмо̀с: Го̀ру Тя̀ благода̀тию Бо̀жиею приосенѐнную,/ прозорлѝвыма Авваку̀м усмотрѝв очѝма,/ из Тебѐ изы̀ти Изра̀илеву/ провозглаша̀ше свято̀му,// во спасѐние на̀ше и обновлѐние.

Божѐственную Тя̀ пала̀ту Сло̀ва зна̀ем, в ню̀же вселѝся пло̀тию, обновѝ на̀с истлѐвших страстьмѝ. Тѐмже Чѝстая, Бо̀жию Ма̀терь Тя̀ чтѝм, и от Тебѐ ро̀ждшагося сла̀вим.

Вселѝся во утро̀бу Твою̀ Дѐво, Сло̀во вопло̀щшееся, и всѐльшуюся прѐжде кля̀тву в естество̀ человѐческое изгна̀, и своѝм божѐственным совокуплѐнием обожѝ боголѐпно, сего̀ ра̀ди Тя̀ воспева̀ем.

Сла̀ва: Мѐртвость подъя̀т Ада̀м Всенепоро̀чная, отнѐлеже вкусѝ плода̀ тлѐннаго: ны̀не же Твоѝм рождество̀м оживѐ, и в селѐниих ра̀йских водворя̀ется. Сего̀ ра̀ди Тя̀ по до̀лгу воспева̀ем.

И ны̀не: Уста̀вила есѝ то̀к смѐртный, ро̀ждши безсмѐртия исто̀чник Христа̀ Бо̀га, Чѝстая. Того̀ у̀бо молѝ Богоблагода̀тная, душѝ моея̀ уморѝвшыя исцелѝти стра̀сти, и спастѝ мя.

Пѐснь 5

Ирмо̀с: Просветѝвый сия̀нием/ пришѐствия Твоего̀ Христѐ,/ и осветѝвый кресто̀м Твоѝм мѝра концы̀,/ сердца̀ просветѝ свѐтом Твоего̀ богоразу̀мия,// правосла̀вно пою̀щих Тя̀.

Возсия̀ от чрѐва Твоего̀ незаходѝмое Со̀лнце Пренепоро̀чная, и тьму̀ до конца̀ потребѝ, и зѐмлю уяснѝ ра̀зумы божѐственными: тѐмже вѐрно воспева̀ем Тя̀.

Ра̀дуйся, а̀нгельский гла̀с взыва̀ем Тѝ Пречѝстая: родила̀ бо есѝ Велѝкаго совѐта А̀нгела, и Отцу̀ собезнача̀льна, пло̀ть бы̀вшаго Дѐво, за ѐже спастѝ человѐка.

Сла̀ва: Госпо̀дь всѐлься Чѝстая, во чрѐво Твоѐ, ѝже благочѐстно в Него̀ вѐрующия, изба̀вил ѐсть от влады̀чествия вра̀жия: тѐмже велегла̀сно всѝ воспева̀ем Тя̀ Пречѝстая.

И ны̀не: Облѐкся в мя̀ Влады̀ка, из Тебѐ про̀йде Всенепоро̀чная, и истлѐвшее естество̀ обожѝ: но Того̀ молѝ Богородѝтельнице, на̀га вся̀каго греха̀ сотворѝти мя̀.

Пѐснь 6

Ирмо̀с: Обы̀де на̀с послѐдняя бѐздна,/ нѐсть избавля̀яй,/ вменѝхомся я̀ко о̀вцы заколѐния./ Спасѝ лю̀ди Твоя̀, Бо̀же на̀ш:// Ты̀ бо крѐпость немощству̀ющих и исправлѐние.

Без сѐмене Бо̀га во чрѐве зачала̀ есѝ, и по рождествѐ стра̀ннем Дѐва пребыла̀ есѝ Всенепоро̀чна: тѐмже хвала̀ми сла̀вим Тя̀, ѝже Тобо̀ю Пречѝстая, изба̀вльшеся кля̀твы.

Лѐствица, ю̀же Иа̀ков вѝде: гора̀ присѐнная: всесвѐтлый о̀блак божѐственнаго свѐта: двѐрь, ѐюже Бо̀г едѝн про̀йде: благословѐнная в жена̀х, Ты̀ есѝ Пренепоро̀чная.

Сла̀ва: Зако̀нов естѐственных кромѐ родила̀ есѝ Дѐво неискусобра̀чная, Сло̀во Бо̀жие ипоста̀сное, исцеля̀ющее на̀ше сокрушѐние: Его̀же прилѐжно молѝ, спастѝ всѐх на̀с.

И ны̀не: Болѐвшую мою̀ ду̀шу преступлѐньми принѐс, взыва̀ю Тѝ Всесвята̀я, Пресла̀вная, Чѝстая: исцелѝ и спасѝ мя хода̀тайством Твоѝм, я̀ко да воспою̀ и велича̀ю заступлѐние Твоѐ.

Го̀споди, помѝлуй, трѝжды. Сла̀ва, и ны̀не:

Седа̀лен, гла̀с 1: Твоѐ предста̀тельство иму̀ще Пречѝстая, и Твоѝми молѝтвами лю̀тых избавля̀еми, кресто̀м Сы̀на Твоего̀ вездѐ соблюда̀еми, по до̀лгу Тя̀ всѝ благочѐстно велича̀ем.

Пѐснь 7

Ирмо̀с: Тебѐ у̀мную Богоро̀дице,/ пѐщь разсмотря̀ем вѐрнии:/ я̀коже бо о̀троки спасѐ трѝ Превозносѝмый,/ мѝр обновѝ, во чрѐве Твоѐм всецѐл,// хва̀льный отцѐв Бо̀г, и препросла̀влен.

Зако̀на сѐни, и прѐдняя гада̀ния богогла̀сных проро̀к, Твоѐ безсѐменное рождество̀ я̀ве провозвестѝша, Пречѝстая Всенепоро̀чная: ѐже воспева̀ющее зовѐм, воспѐтаго отцѐв Бо̀га и Препросла̀вленнаго.

Восто̀к со̀лнца родила̀ есѝ Богоблагода̀тная Чѝстая, просвѐщшаго вѐрных всѐх исполнѐния, но̀щь же ума̀льшаго злочѐстия. Тѐмже чтѝм воспѐтаго отцѐв Бо̀га и Препросла̀вленнаго.

Сла̀ва: Купина̀ иногда̀ неопа̀льная, Всенепоро̀чная, Твоѐ вообража̀ше чрѐво, ѝбо не опалѝ Тя отню̀д о̀гнь Божества̀. Тѐмже молю̀ Тя, огня̀ негасѝмаго изба̀ви мя̀, я̀ко да пою̀ немо̀лчно Чѝстая, велѝчия Твоя̀.

И ны̀не: Ма̀ти Бо̀жия, вѐрных по̀моще, согреша̀ющих очищѐние, благѝх всѐх Пода̀тельнице, приимѝ мя благоутро̀бием Твоѝм милостивны̀м припа̀дающа, и приходя̀ща к Тебѐ с пла̀чем, и прося̀щаго разрешѐния согрешѐний моѝх.

Пѐснь 8

Ирмо̀с: В пещѝ о̀троцы изра̀илевы,/ я̀коже в горнѝле добро̀тою благочѐстия,/ чистѐе зла̀та блеща̀хуся, глаго̀люще:/ благословѝте вся дела̀ Госпо̀дня Го̀спода,// по̀йте и превозносѝте во вся вѐки.

Зако̀ннии о̀брази, и прѐдняя гада̀ния Дѐво, Госпо̀дню Тя̀ Чѝстую Ма̀терь предсказа̀ша я̀ве: мы̀ же сбытиѐ вещѐй ны̀не вѝдяще, поѐм Тя̀ согла̀сно, и славосло̀вим во вся̀ вѐки.

Украсѝся божѐственными добро̀тами, без разсуждѐния в добро̀тах, Сло̀во Бо̀жие ро̀ждши Всенепоро̀чная, красота̀ми божѐственными всѐх сердца̀ уясня̀ющее, вѐрою песносло̀вящих Его̀ во вся̀ вѐки.

Сла̀ва: Свящѐнными гла̀сы издалѐча сказа̀ша проро̀цы, Ма̀терь Тя̀ бы̀ти Всенепоро̀чная Влады̀це Бо̀гу, Ему̀же всѝ зовѐм: благословѝте вся̀ дела̀ Го̀спода, по̀йте и превозносѝте Его̀ во вся̀ вѐки.

И ны̀не: Я̀ко красна̀, я̀ко предобра̀ Дѐво, кра̀снаго в добро̀тах, па̀че вины̀ родила̀ есѝ Христа̀, Ему̀же всѝ зовѐм: благословѝте вся̀ дела̀ Го̀спода, по̀йте и превозносѝте Его̀ во вся̀ вѐки.

Пѐснь 9

Ирмо̀с: О̀браз чѝстаго рождества̀ Твоего̀,/ огнепалѝмая купина̀ показа̀ неопа̀льная:/ и ны̀не на на̀с напа̀стей свирѐпеющую/ угасѝти мо̀лимся пѐщь,// да Тя̀ Богоро̀дице непреста̀нно велича̀ем.

Естество̀ Ѐже прѐжде осуждѐнное земны̀х Дѐво, преестѐственным Твоѝм божѐственным рождество̀м безсмѐртие улучѝ: и добро̀ту прѐжнюю восприя̀т, пою̀ще Тя̀ согла̀сно ра̀достными пѐсньми.

Но̀сиши вся̀ Нося̀щаго, и млеко̀м пита̀еши, всѐм пѝщу даю̀щаго: вѐлие и стра̀шное, ѐже па̀че ума̀ Твоѐ та̀инство, ковчѐже честна̀го свящѐнства Дѐво Богоро̀дице. Тѐмже Тя̀ всѝ ублажа̀ем.

Сла̀ва: Свѐт мнѐ лежа̀щу, Пречѝстая, в лѐности тьмы̀, ны̀не возсия̀й, ослепля̀ющия мѝ по̀мыслы страстѐй реша̀щи, и мѝр глубо̀к Всенепоро̀чная, прѝсно содева̀ющи в душѝ моѐй, сла̀вити Тя̀.

И ны̀не: Страшу̀ся судѝща неумы̀тнаго, и Судиѝ незабвѐннаго Всенепоро̀чная: ѝмам бо мно̀жество согрешѐний безчѝсленное, в лѐности жѝв всестра̀стный: тѐмже мя̀ Богоро̀дице, ущѐдривши помѝлуй.

Та̀же, Досто̀йно ѐсть: И покло̀н. Трисвято̀е. И по О̀тче на̀ш: тропарѝ, и про̀чее обы̀чное, и отпу̀ст.

В срѐду у̀тра,

по 1-м стихосло̀вии, седа̀льны крѐстны. Гла̀с 1.

Распѐншуся Тѝ Христѐ, погѝбе мучѝтельство, и попра̀на бы̀сть сѝла вра̀жия: нижѐ бо а̀нгел, ни человѐк, но Ты̀ Са̀м Го̀споди спа̀сл есѝ на̀с, сла̀ва Тебѐ.

Стѝх: Возносѝте Го̀спода Бо̀га на̀шего, и покланя̀йтеся подно̀жию но̀гу Его̀, я̀ко свя̀то ѐсть.

Креста̀ Твоего̀ дрѐву покланя̀емся Человеколю̀бче: я̀ко на нѐм пригвоздѝлся есѝ Животѐ всѐх, и ра̀й отвѐрзл есѝ Спа̀се, вѐрою пришѐдшему к Тебѐ разбо̀йнику, и пѝщи сподо̀бил есѝ исповѐдающаго Тя̀: помянѝ мя Го̀споди. Приимѝ я̀коже о̀наго и на̀с зову̀щих: согрешѝхом всѝ, милосѐрдием Твоѝм не прѐзри на̀с.

Сла̀ва, и ны̀не, крестобогоро̀дичен: А̀гнца на крестѐ А̀гница зря̀щи, с разбо̀йникома распина̀ема Тя̀ долготерпелѝве Сло̀ве, и копиѐм в рѐбра пробода̀ема, восклица̀ше вопию̀щи ма̀терски: что̀ стра̀нное и ужа̀сное, Иису̀се мо̀й, та̀инство, несказа̀нно соверша̀емое; ка̀ко покрыва̀ешися гро̀бом неопѝсанный Бо̀же; да Мя̀ ро̀ждшую Тя не оста̀виши, Сы̀не Мо̀й Сладча̀йший.

По 2-м стихосло̀вии седа̀льны, гла̀с 1:

Спасѝ Го̀споди лю̀ди Твоя̀ и благословѝ достоя̀ние Твоѐ, побѐды на сопротѝвныя да̀руя и Твоѐ сохраня̀я Кресто̀м Твоѝм жѝтельство.

Стѝх: Бо̀г же Ца̀рь на̀ш прѐжде вѐка, содѐла спасѐние посредѐ землѝ.

Ору̀жие крѐстное во бранѐх явѝся нѐкогда благочестѝвому царю̀ Константѝну, непобедѝмая побѐда на врагѝ вѐры ра̀ди: сего̀ трепѐщут сопротѝвныя сѝлы: сѐй бы̀сть вѐрных спасѐние, и Па̀влу похвала̀.

Стѝх: Дѝвен Бо̀г во святы̀х Своѝх, Бо̀г Изра̀илев.

Му̀ченичен: Болѐзньми святы̀х, ѝмиже о Тебѐ пострада̀ша, умолѐн бу̀ди Го̀споди: и вся̀ на̀ша болѐзни исцелѝ Человеколю̀бче, мо̀лимся.

Сла̀ва, и ны̀не, крестобогоро̀дичен: Твоѐ предста̀тельство иму̀ще Пречѝстая, и Твоѝми молѝтвами лю̀тых избавля̀еми, кресто̀м Сы̀на Твоего̀ вездѐ соблюда̀еми, по до̀лгу Тя̀ всѝ благочѐстно велича̀ем.

По 3-м стихосло̀вии седа̀льны, гла̀с 1.

Подо̀бен: Гро̀б Тво̀й:

На дрѐве Тя̀ Сло̀ве крѐстнем, за милосѐрдие мѝлости, повѐшена пло̀тию во̀лею, я̀ко вѝде со̀лнце, не терпя̀ дерзновѐния помрачѝся. Тѐмже омрачѐнную ду̀шу мою̀ просветѝ непристу̀пным свѐтом Твоѝм, и спасѝ мя, молю̀ся.

Распростры̀й на крестѐ дла̀ни Твоя̀ Щѐдре, язы̀ки бы̀вшия далѐче от Тебѐ, собра̀л есѝ сла̀вити мно̀гую Твою̀ благосты̀ню: но прѝзри на наслѐдие Твоѐ, и низложѝ вою̀ющих на ны̀, Кресто̀м Твоѝм честны̀м.

Сла̀ва, и ны̀не, крестобогоро̀дичен: Несквѐрная А̀гница, А̀гнца и Па̀стыря повѐшена на дрѐве мѐртва зря̀щи, пла̀чущи веща̀ше, ма̀терски восклица̀ющи: ка̀ко претерплю̀ Твоѐ ѐже па̀че сло̀ва Сы̀не Мо̀й снѝтие, и во̀льныя стра̀сти, Бо̀же Преблагѝй.

Кано̀н Честно̀му и Животворя̀щему Кресту̀, [его̀же краегранѐсие: Кресто̀м спаса̀емь ѐсмь, пострада̀вшаго Влады̀ки. Творѐние Ио̀сифово.] Гла̀с 1

Пѐснь 1

Ирмо̀с: Го̀рькия рабо̀ты изба̀влься Изра̀иль,/ непроходѝмое про̀йде я̀ко су̀шу,/ врага̀ зря̀ потопля̀ема,/ пѐснь я̀ко Благодѐтелю поѐт Бо̀гу,// чудодѐющему мы̀шцею высо̀кою, я̀ко просла̀вися.

На крестѐ воздвиза̀ем Христѐ, совоздвѝгл есѝ па̀дшаго человѐка, и всю̀ вра̀жию сѝлу низвѐргл есѝ Сло̀ве. Тѐмже Твоя̀ стра̀сти воспева̀ю пострада̀вшаго, и от страстѐй изба̀вльшаго мя̀.

Сла̀вы Госпо̀дь Ты̀ есѝ, ѝже сла̀вою венча̀вый человѐка, тѐрнием венча̀лся есѝ, я̀ко да терноно̀сное естество̀ на̀ше сотворѝши плодоно̀сно, Садѝтелю божѐственных дея̀ний.

Му̀ченичен: Святы̀х собо̀р Пресвяты̀й зако̀нно пострада̀вый, всю̀ кровѐй святы̀х течѐньми тва̀рь освятѝл ѐсть, и сквѐрныя бесо̀м жѐртвы приносѝмыя, о Бо̀зе Отцѐ потребѝл ѐсть.

Му̀ченичен: Ва̀ша всесвятѝи му̀ченицы, о̀блацы мучѐний не скры̀ша терпелѝвныя борѐния: тѐмже па̀че со̀лнечных лу̀ч сла̀внии явѝстеся, облиста̀юще я̀ве зарѝ спасѐния.

Богоро̀дичен: Ору̀жием снеда̀шеся Пречѝстая, страстѐй Сы̀на Твоего̀, я̀ко зря̀ше Того̀ копиѐм пробода̀ема, ѐже в раѝ возбранѝтельное отрева̀ющаго ору̀жие, не даю̀щее вѐрным божѐственнаго вхо̀да.

Другѝй кано̀н Пресвятѐй Богоро̀дице, гла̀с 1

Пѐснь 1

Ирмо̀с: Твоя̀ победѝтельная деснѝца/ боголѐпно в крѐпости просла̀вися,/ та̀ бо безсмѐртне,/ я̀ко всемогу̀щая, протѝвныя сотрѐ,// изра̀ильтяном пу̀ть глубины̀ новосодѐлавшая.

Струѝ мнѐ слѐз душѐвных да̀руй Всенепоро̀чная, я̀же исто̀чник оставлѐния ро̀ждши, грехо̀вную сквѐрну отмыва̀юща, и во смирѐнии жѝзнь мою̀ изводя̀ща.

Превы̀шши бы̀сть Чѝстая тва̀ри, Бо̀га вопло̀щши. Тѐмже молю̀ Тя̀: от гно̀я страстѐй возста̀ви мя̀, и к божѐственней высотѐ безстра̀стия возведѝ.

Мѝлостива мѝ явѝся Чѝстая, в дѐнь су̀дный, молю̀ся, вся̀каго избавля̀ющи мя̀ стра̀шнаго стоя̀ния и лю̀таго мучѐния, прибега̀ющаго под кро̀в Тво̀й Пречѝстая Влады̀чице.

Мра̀ком грехо̀вным одержѝма мя̀, и па̀дша Пречѝстая, воздвѝгни, слѐз ту̀чу даю̀щи мѝ, ѝмиже омы̀ю сквѐрная дела̀: Тя̀ бо едѝну Засту̀пницу ѝмамы Богоро̀дице.

Пѐснь 3

Ирмо̀с: Не му̀дростию и бога̀тством да хва̀лится смѐртный своѝм,/ но вѐрою Госпо̀днею/ правосла̀вно взыва̀я Христу̀ Бо̀гу,/ и поя̀ прѝсно:// на ка̀мени Твоѝх за̀поведей утвердѝ мя Влады̀ко.

Ископа̀ша Тѝ беззако̀нии ру̀це и но̀зе Иису̀се мо̀й, дла̀нию неизречѐнно созда̀вшаго пѐрвее Христѐ Бо̀же человѐка, и стра̀стию страстѐй, и тлѝ всѐх свобо̀ждшаго.

Да ста̀нет, вопия̀ше Иису̀с, луна̀ же и со̀лнце, ѐже на крестѐ пропису̀яй пострада̀вшаго Влады̀ку пло̀тию, светѝлом помрачѐние. Ѝмже тмы̀ нача̀ла лука̀вая посра̀млена бы̀ша.

Му̀ченичен: Терпя̀ху усѐрдно ра̀ны сла̀внии му̀ченицы, и уязвля̀еми, велиа̀ра змѝя уязвѝша крѐпко: тѐмже ду̀ш на̀ших ра̀ны исцеля̀ют прѝсно, божѐственным мановѐнием.

Му̀ченичен: Ка̀пища бесо̀вская и хра̀мы разорѝсте му̀ченицы, болѐзньми же и му̀жеством са̀ми себѐ пресла̀вно хра̀мы воздвиго̀сте благода̀тию, вместѝтельны Отцу̀, и Сы̀ну, и Свято̀му Ду̀ху.

Богоро̀дичен: В ча̀с страстѐй, кра̀снаго доброто̀ю зря̀щи Дѐво, видѐния нижѐ добро̀ты иму̀ща, вопия̀ла есѝ го̀рько Чѝстая, восклица̀ющи: увы̀ Мнѐ, ка̀ко стра̀ждеши Сы̀не, от страстѐй всѐх хотя̀ изба̀вити;

Ѝн

Ирмо̀с: Едѝне вѐдый человѐческаго существа̀ нѐмощь,/ и мѝлостивно в нѐ вообра̀жся:/ препоя̀ши мя̀ с высоты̀ сѝлою,/ ѐже вопѝти Тебѐ Святы̀й:// одушевлѐнный хра̀ме неизречѐнныя сла̀вы Твоея̀, Человеколю̀бче.

Хра̀м была̀ есѝ Пречѝстая, всѐми ца̀рствующаго, бы̀вша мя̀ вертѐп душетлѐнных разбо̀йник, исхитѝ от тѐх озлоблѐния, и божѐственнаго Ду̀ха чѝсто жилѝще явѝ мя.

Слѐз мѝ послѝ ту̀чу, изсуша̀ющу течѐния лука̀вых моѝх дея̀ний, молю̀ся, я̀же благоутро̀бия ро̀ждши тѝхую пучѝну, Христа̀ Бо̀га на̀шего, Богоро̀дице Дѐво всепѐтая.

Крѐпость на̀м и сто̀лп непоколебѝм бу̀ди Богора̀дованная, и щѝт, и ору̀жие непобедѝмое, мы̀сленных вра̀г полкѝ от на̀с возбраня̀ющи, Богоро̀дице Пречѝстая, вѐрою и любо̀вию почита̀ющих Тя̀.

Пѐснь 4

Ирмо̀с: Слы̀ша дрѐвле Авваку̀м Христѐ чу̀дный Тво̀й слу̀х,/ и стра̀хом взыва̀ше:/ от ю̀га Бо̀г приѝдет, и Святы̀й от горы̀ приосенѐнныя ча̀щи,/ спастѝ пома̀занныя:// сла̀ва сѝле Твоѐй Го̀споди.

Ра̀ны и я̀звы Христѐ претерпѐл есѝ, я̀звы сѐрдца моего̀ исцеля̀я, жѐлчи вкусѝв го̀рькия, сла̀дкаго вку̀са тлетво̀рнаго отъѐмля врѐд: на дрѐве же пригво̀ждся дрѐвнюю кля̀тву потребѝл есѝ.

Далѐче отриновѐнныя от Тебѐ язы̀ки, воздвиза̀ем на крестѐ блѝз привлѐкл есѝ, примирѝл же есѝ на̀с Отцу̀ Долготерпелѝве, в среду̀ ввѐл есѝ я̀ко хода̀тай Себѐ: и посредѐ землѝ стра̀сть претерпѐл есѝ поно̀сную.

Му̀ченичен: В мо̀ре кровѐй ва̀ших та̀йно богоблажѐннии, со всѐми своѝми во̀инствы, мы̀сленный фарао̀н впа̀д потопѝся. Тѐмже ра̀достию вы̀ спа̀сшееся приидо̀сте ко обетова̀нней землѝ, и небѐснии гра̀ждане бы̀сте.

Му̀ченичен: Возмого̀ша вжиля̀еми Христо̀вою стра̀стию блажѐннии, стра̀сти разлѝчныя восприя̀ти на честнѐй пло̀ти. Сего̀ ра̀ди уставля̀ют стра̀сти ду̀ш же и телѐс, восхваля̀ющих тѐх, и блажа̀щих всегда̀.

Богоро̀дичен: Непра̀ведно зря̀щи заколѐние Тя̀ Христѐ ро̀ждшая, рыда̀ющи вопия̀ше Тѝ: правосу̀де Сы̀не, ка̀ко непра̀ведно осудѝлся есѝ, хотя̀й оправда̀ти преступлѐнием осуждѐнныя дрѐвле, и к тлѐнию попо̀лзшияся;

Ѝн

Ирмо̀с: Го̀ру Тя̀ благода̀тию Бо̀жиею приосенѐнную,/ прозорлѝвыма Авваку̀м усмотрѝв очѝма,/ из Тебѐ изы̀ти Изра̀илеву/ провозглаша̀ше Свято̀му,// во спасѐние на̀ше и обновлѐние.

Бесо̀вскими лѐстьми лю̀те отвлачѝмаго мя̀ от за̀поведей Бо̀жиих, не прѐзри Блага̀я: но ущѐдри молю̀ся, и того̀ прелѐсти покажѝ мя вы̀шша, прибега̀ющаго Пречѝстая к Твоѐй мѝлости. [Дважды.]

Едѝне Сы̀й мѝлостивне Христѐ Бо̀же, Тебѐ ро̀ждшия молѝтвами, на Тя̀ упова̀ющих помѝлуй, и ущѐдри, и к свѐту за̀поведей Твоѝх наста̀ви, и вѐчныя жѝзни сподо̀би.

Усну̀вша в смѐрть, и во гро̀бе лежа̀ща отча̀яния Пречѝстая, око̀вана желѐзы прегрешѐний моѝх, Твоѐю бо̀дренною молѝтвою воздвѝгни, и к покая̀нию испра̀ви, молю̀ся.

Пѐснь 5

Ирмо̀с: Свѐт Тво̀й незаходѝмый возсия̀й Христѐ/ в сердца̀ вѐрно пою̀щих Тя̀,/ мѝр подава̀яй на̀м, па̀че ума̀./ Тѐм от но̀щи невѐдения ко дню̀ свѐтом Твоѝм теку̀ще,// славосло̀вим Тя̀ Человеколю̀бче.

Со̀лнце Спа̀се обнажѝся свѐта, на дрѐве на̀га Тебѐ зря̀ вѝсяща, на вода̀х повѐсившаго зѐмлю: ка̀мени же, на ка̀мени я̀ко ощутѝша воздвѝжена, распада̀шеся стра̀хом, и основа̀ния поколеба̀шася.

Воздвѝжен на дрѐво, гвоздьмѝ пригво̀ждся, окровавѝл есѝ пѐрсты Долготерпелѝве, и копиѐм пробода̀ем в рѐбра, исцелѝл есѝ я̀зву Ада̀мову, ю̀же прия̀т ребра̀ послу̀шав, и преслу̀шав Сотво̀ршаго ѝ.

Му̀ченичен: Ра̀й явѝся му̀ченик мно̀жество, живо̀тное имѐя посредѐ дрѐво Христа̀: за Него̀же поно̀сную до̀блественным по̀мыслом смѐрть претерпѐвше, снѐдию ро̀ду нача̀льники умертвѝвшаго змѝя, Божѐственною сѝлою умертвѝша.

Му̀ченичен: Кро̀вными ка̀плями Христо̀вы страда̀льцы, безбо̀жия глубину̀ изсушѝсте, и божѐственными источѐнии чудѐс свящѐнных, страстѐй течѐния ду̀ш же и телѐс загражда̀ете. Тѐмже достодо̀лжно ублажа̀еми естѐ.

Богоро̀дичен: Удивля̀шеся непоро̀чная, на дрѐве зря̀щи Христа̀ воздвѝжена во̀лею, и пла̀чущи вопия̀ше: Сы̀не Мо̀й и Бо̀же, болѐзни в рождествѐ избѐгши, ны̀не болѐзни стражду̀, непра̀ведно от беззако̀нных распина̀ему Тѝ.

Ѝн

Ирмо̀с: Просветѝвый сия̀нием/ пришѐствия Твоего̀ Христѐ,/ и осветѝвый кресто̀м Твоѝм мѝра концы̀,/ сердца̀ просветѝ свѐтом Твоего̀ богоразу̀мия,// правосла̀вно пою̀щих Тя̀.

Пото̀цы мно̀гих мѝ прегрешѐний приверго̀шася, и хра̀м душѝ моея̀ низложѝша Пречѝстая: но я̀же есѝ исправлѐние пра̀отцем Богоро̀дице, возста̀ви мя̀ раба̀ Твоего̀.

В тимѐнии мя̀ страстѐй углѐбнувша окая̀ннаго, и бу̀рею мно̀гих согрешѐний потопля̀ема, ру̀ку пода̀вши Влады̀чице, возведѝ мя, и ко приста̀нищу покая̀ния напра̀ви.

Душѐвных мѝ сквѐрн очищѐние да̀руй, и плотскѝх мя̀ болѐзней исцелѝ молю̀ся, и от обдержа̀щаго лю̀таго уны̀ния пременѝ молѝтвами Твоѝми.

Пѐснь 6

Ирмо̀с: Вѐсь от страстѐй безмѐрных содержу̀ся,/ и кѝтом зо̀л снизпадо̀х:/ но возведѝ из истлѐния мя Бо̀же,/ я̀коже прѐжде Ио̀ну,/ и вѐрою безстра̀стие мѝ да̀руй,/ я̀ко да во гла̀се хвалѐния,// и спасѐния ду̀хом пожру̀ Ти.

Егда̀ Моисѐй ру̀це воздѐв на высоту̀, Твою̀ стра̀сть вообража̀ше, простѐршаго на дрѐве дла̀ни, и лука̀ваго разрушѝвша держа̀ву па̀губную, тѐмже Изба̀вителя вѐдуще Тя̀ и Спа̀са поѝм, Человеколю̀бче.

Мѐртвость претерпѐл есѝ воздвиза̀емь на дрѐво, и умертвѝтеля на̀шего умертвѝл есѝ: и оживѝв руку̀ Твоѐю Христѐ созда̀ние, в рѐбра же копиѐм пробода̀емь, источѝл есѝ двѐ рецѐ оставлѐния, во двою̀ во̀лю воспева̀емый.

Му̀ченичен: Честна̀ ва̀ша смѐрть святѝи пред Го̀сподем ны̀не бы̀сть, почѐтших всѐх честны̀ми Своѝми страстьмѝ, и безчѐстнаго велиа̀ра посрамѝвших, всѐми приложѐнии му̀к низложѝти всѐх ва̀с ко̀знствующаго.

Му̀ченичен: Всѐю душѐю ко всѐм отлучѝстеся многовѝдным прему̀дрии мучѐнием, всю̀ обрето̀сте спосо̀бствующую ва̀м по̀мощь, во всѐ человѐчество обо̀лкшагося. Тѐмже на у̀ды ссека̀еми: и огню̀ приближа̀ющеся веселя̀стеся.

Богоро̀дичен: Распя̀тие Твоѐ зря̀щи Пречѝстая, вопия̀ше: Сы̀не, что̀ зрѝмое стра̀нное видѐние; ѝже стра̀сти боля̀щих исцеля̀яй, ка̀ко стра̀сть Христѐ терпѝши новѐйшую; что̀ Ти вразѝ возда̀ша Благода̀телю, за ня̀же благода̀ть прия̀ша;

Ѝн

Ирмо̀с: Обы̀де на̀с послѐдняя бѐздна,/ нѐсть избавля̀яй,/ вменѝхомся я̀ко о̀вцы заколѐния,/ спасѝ лю̀ди Твоя̀ Бо̀же на̀ш:// Ты бо крѐпость немощству̀ющих и исправлѐние.

Рукописа̀ние Пречѝстая, прегрешѐний моѝх копиѐм расто̀ргни, ро̀ждшагося ра̀ди из безсѐменнаго Твоего̀ чрѐва: в кнѝзе мя написа̀ти сподо̀би избра̀нных, прибега̀ющаго к божѐственному покро̀ву Твоему̀. [Дважды.]

Очѝсти Христѐ, рабы̀ Твоя̀ молѝтвами ро̀ждшия Тя̀, и низпослѝ я̀ко едѝн бла̀г согрешѐний прощѐние: Ты̀ бо есѝ Спа̀с, и Изба̀витель всѐм надѐющимся на Тя̀.

Умерщвлѐна мя̀ страстьмѝ Пречѝстая Дѐво, я̀же Жизнода̀вца ро̀ждшая, оживѝ ны̀не Твоѝми молѝтвами, и победѝтеля явѝ мя на врага̀ зла̀го: Тя̀ бо едѝну ѝмамы к Бо̀гу Помо̀щницу на̀шу.

Пѐснь 7

Ирмо̀с: Проидо̀ша я̀ко черто̀г/ пѐщный пла̀мень нестерпѝмый,/ ѝже за благочѐстие иногда̀ о̀троцы святѝи показа̀вшеся я̀ве,/ и согла̀сно воспева̀юще, пѐснь поя̀ху:// отцѐв Бо̀же благословѐн есѝ.

Влады̀ка Сы̀й от раба̀ прия̀т Иису̀се мо̀й, ударѐние, свободѝти мя̀ хотя̀й порабощѐннаго врагу̀, на крестѐ же пригво̀ждся спаса̀еши мя̀ пою̀ща: ѝже отцѐв Бо̀же, благословѐн есѝ.

Потрясѐся вся̀ тва̀рь, распина̀ему Тѝ благоутро̀бне Го̀споди, копиѐм пробода̀ему Тѝ, вра̀г всетелѐсную прия̀т я̀зву, уя̀звенный же Ада̀м исцелѐ, вопия̀: благословѐн Бог отѐц на̀ших.

Му̀ченичен: Кресто̀м ограждѐнное страстотѐрпец во̀инство сла̀вное, ополчѐния вра̀жия погубѝ благода̀тию, и побѐды венцы̀ прия̀т, вопия̀: благословѐн Бог отѐц на̀ших.

Му̀ченичен: Огня̀ сѝльнейше стяжа̀вше страда̀льцы произволѐние, не опа̀льшеся огню̀ приобща̀ющеся, но попалѝсте злочѐстия лука̀вую вѐщь, вопию̀ще: отѐц на̀ших Бо̀же благословѐн есѝ.

Богоро̀дичен: Рождество̀ Твоѐ Дѐво, пресла̀вно вѐки породѝ: и Воздвѝжен на крѐст, па̀дшия совоздвѝже, и небѐсныя жѝтели показа̀ вопию̀щия: отцѐв Бо̀же благословѐн есѝ.

Ѝн

Ирмо̀с: Тебѐ у̀мную Богоро̀дице,/ пѐщь разсмотря̀ем вѐрнии:/ я̀коже бо о̀троки спасѐ трѝ Превозносѝмый,/ мѝр обновѝ во чрѐве Твоѐм всецѐл,// хва̀льный отцѐв Бо̀г, и препросла̀влен.

Я̀ко исто̀чника жѝзни ро̀ждшая, умѐршую мою̀ ду̀шу живоно̀сною деснѝцею, Пречѝстая, воскресѝ, и вопѝти сподо̀би во умилѐнии сѐрдца моего̀: прехва̀льный отцѐв Бо̀же благословѐн есѝ. [Дважды.]

Но̀в Ада̀м от чѝстых кровѐй Твоѝх бы̀ти изво̀лил ѐсть, ѝже прѐжде вѐк Бо̀г. Его̀же ны̀не молѝ, обетша̀вшаго мя̀ обновѝти, зову̀ща: прехва̀льный отцѐв на̀ших Бо̀же благословѐн есѝ.

Богоро̀дичен: Гнѐва путѐм вра̀г приходя̀, восхѝтити хотя̀ неща̀дно ду̀шу мою̀ смирѐнную, сего̀ совѐты, Пречѝстая разрушѝ: и пою̀ща мя̀ ущѐдри: восхваля̀емый отцѐв Бо̀же благословѐн есѝ.

Пѐснь 8

Ирмо̀с: Чу̀да преестѐственнаго показа̀ о̀браз,/ огнеро̀сная пѐщь дрѐвле:/ о̀гнь бо не опалѝ ю̀ныя дѐти,/ Христо̀во явля̀я безсѐменное от Дѐвы божѐственное рождество̀./ Тѐм воспева̀юще воспоѝм:/ да благословѝт тва̀рь вся̀ Го̀спода,// и превозно̀сит во вся̀ вѐки.

Распя̀т бы̀л есѝ на крестѐ во̀лею, ѝже ма̀нием нѐбо простры̀й: гвоздьмѝ же пригвоздѝся, упразднѝти хотя̀ поползновѐние стра̀стное первозда̀ннаго Ада̀ма. Тѐм воспева̀юще поѐм: да благословѝт тва̀рь вся̀кая Го̀спода: и превозно̀сит Его̀ во вся̀ вѐки.

Егда̀ Тя ка̀меня на ка̀мени каменосердѐчный собо̀р воздвѝже, го̀ры поколеба̀шася. Земля̀ потрясѐся, Сло̀ве Бо̀жий: и ду̀ши колѐблемыя утвердѝшася к божѐственней жѝзни, вопию̀щия всегда̀, да благословѝт тва̀рь вся̀кая Го̀спода, и превозно̀сит Его̀ во вѐки.

Му̀ченичен: Истка̀ша одѐжду спасѝтельную себѐ я̀ве святѝи страстотѐрпцы: в наготѐ телѐсней стра̀ждущее терпелѝвно, и посыпа̀ние ра̀нам приѐмлюще. Тѐм воспева̀юще пою̀т: да благословѝт тва̀рь вся̀кая Го̀спода, и превозно̀сит Его̀ во вѐки.

Му̀ченичен: Ноготьмѝ немѝлостивно страстотѐрпцы стру̀жеми, и неща̀дно на у̀ды ссеца̀еми, и ра̀нам вся̀ческим приобща̀ющеся, истука̀нным не пожро̀ша, му̀жестка же столпѝ вѐрным явѝшася: благословѝте Христа̀ дѐла вся̀, зову̀ще, и превозносѝте Его̀ во вѐки.

Богоро̀дичен: Да Тя̀ преогорчева̀яй безу̀мный собо̀р: я̀коже возмня̀ше от землѝ взя̀ти Тя̀: безча̀дна бы̀х и смуща̀юся, и ма̀терски сѐрдцем болѐзную, неискусому̀жная вопия̀ше иногда̀: на крестѐ вѝдящи Тя̀ воздвѝжена: с Нѐюже тва̀рь сла̀вит Тя̀, всѐх Изба̀вителя Иису̀се во вѐки.

Ѝн

Ирмо̀с: В пещѝ о̀троцы изра̀илевы,/ я̀коже в горнѝле добро̀тою благочѐстия,/ чистѐе зла̀та блеща̀хуся, глаго̀люще:/ благословѝте вся дела̀ Госпо̀дня Го̀спода,// по̀йте и превозносѝте во вся̀ вѐки.

Просветѝ ми о̀чи сердѐчныя, я̀же двѐрь свѐта чѝстая, о̀блак страстѐй, и тьму̀ глубо̀кую разгоня̀ющи, да пою̀: вся̀ дела̀ Госпо̀дня Го̀спода по̀йте, и превозносѝте Его̀ во вѐки. [Дважды.]

О всѐх Влады̀чице чѝстая, не преста̀й моля̀щися Тебѐ призыва̀ющих я̀ко Ма̀терь Бо̀жию, Дѐво всенепоро̀чная, и вопию̀щих: благословѝте вся̀ дела̀ Госпо̀дня Го̀спода, по̀йте и превозносѝте Его̀ во вѐки.

Спасѐния вину̀ Христа̀ неизречѐнно ро̀ждшая, молѝ о всѐх вопию̀щих прилѐжно Дѐво всепѐтая: благословѝте вся̀ дела̀ Госпо̀дня Го̀спода, по̀йте и превозносѝте Его̀ во вѐки.

Та̀же поѐм пѐснь Богоро̀дицы: Велѝчит душа̀ моя̀ Го̀спода: И покло̀ны.

Пѐснь 9

Ирмо̀с: Неизглаго̀ланное Дѐвы та̀инство:/ нѐбо бо сия̀, и престо̀л херувѝмский,/ и светоно̀сный черто̀г показа̀ся./ Христа̀ Бо̀га Вседержѝтеля.// Сию̀ благочѐстно я̀ко Богоро̀дицу велича̀ем.

Я̀коже вѝде Тя̀ дрѐвле на дрѐве повѐшена Спа̀се, зѐмлю повѐсившаго на вода̀х безмѐрных, разбо̀йник благоразу̀мный, вѐрно вопия̀ше Тѝ: помянѝ мя, с нѝмже благочѐстно Твоя̀ страда̀ния прославля̀ем.

Распина̀ем поколеба̀л есѝ землѝ основа̀ния, копиѐм же пробода̀ем источа̀еши безсмѐртныя ка̀пли, кро̀вь и во̀ду, ѝмиже человѐчество очѝстил есѝ от страстѐй Иису̀се: тѐмже Тя̀ воспева̀юще велича̀ем.

Му̀ченичен: Веселя̀хуся в мучѐниих святѝи, са̀ми себѐ поощря̀юще я̀коже на сла̀дость, до̀блии: ста̀нем, вопию̀ще: сѐ отвѐрзе по̀прище Христо̀с, венцы̀ ны̀не подаѐт тѐм, ѝхже возлюбѝ.

Му̀ченичен: Просвеща̀ется вся̀ко вѐрных едѝнственное торжество̀, страда̀ния почита̀ющее всѐх непобедѝмых му̀ченик, и тьмы̀ болѐзней: ѝхже ра̀ди неболѐзненныя сподо̀бишися сла̀дости и жѝзни, и присносу̀щнаго наслаждѐния.

Богоро̀дичен: Человеколю̀бца сло̀ва неизречѐнно поро̀ждшая, Его̀же зря̀щи Отроковѝца от человѐк во̀лею стра̀ждуща, что сиѐ; вопия̀ше; Бо̀г безстра̀стен стра̀сть приѐмлет: я̀ко да от страстѐй изба̀вит вѐрою покланя̀ющихся Ему̀.

Ѝн

Ирмо̀с: О̀браз чѝстаго рождества̀ Твоего̀/ огнепалѝмая купина̀ показа̀ неопа̀льная:/ и ны̀не на на̀с напа̀стей свирѐпеющую/ угасѝти мо̀лимся пѐщь,// да Тя̀ Богоро̀дице непреста̀нно велича̀ем.

Возмѝ тя̀жкое брѐмя моѝх согрешѐний, Богоро̀дице всепѐтая, и легча̀йшее ѝго Сы̀на и Бо̀га Твоего̀ сподо̀би мя̀ носѝти, и по стезѝ шѐствовати к го̀рнему совершѐнию возводя̀щей. [Дважды.]

Трепѐщу помышля̀я, Всенепоро̀чная, стра̀шный дѐнь пришѐствия Христо̀ва: вся̀ бо жѝзнь моя̀ во гресѐх сконча̀ся, и страстѐй душа̀ моя̀ испо̀лнися. Но ущѐдри мя̀ и вся̀каго изба̀ви тогда̀ осуждѐния.

Приимѝ Пречѝстая Влады̀чице, непотрѐбнаго раба̀ Твоего̀ молѐния, и душѝ моея̀ и тѐла смущѐние во глубо̀кую тишину̀ приложѝ: я̀ко да Тя̀ велича̀ю спаса̀емь.

Та̀же: Досто̀йно ѐсть: и покло̀н. Ектения̀ ма̀лая, и светѝлен. Та̀же псалмы̀ обы̀чныя.

На стихо̀вне стихѝры крѐстны. Гла̀с 1:

Тебѐ на дрѐве пригво̀ждшагося пло̀тию, и живо̀т на̀м пода̀вшаго, я̀ко Спа̀са и Влады̀ку, поѝм непреста̀нно.

Стѝх: Испо̀лнихомся зау̀тра мѝлости Твоея̀ Го̀споди, и возра̀довахомся, и возвеселѝхомся, во вся̀ днѝ на̀ша возвеселѝхомся, за днѝ в ня̀же смирѝл ны̀ есѝ, лета, в ня̀же вѝдехом зла̀я, и прѝзри на рабы̀ Твоя̀, и на дела̀ Твоя̀, и наста̀ви сы̀ны ѝх.

Твоѝм кресто̀м Христѐ, едѝно ста̀до бы̀сть а̀нгелов и человѐков, и во едѝном собо̀ре нѐбо и земля̀ веселѝтся, вопия̀: Го̀споди сла̀ва Тебѐ.

Стѝх: И бу̀ди свѐтлость Го̀спода Бо̀га на̀шего на на̀с, и дела̀ ру̀к на̀ших испра̀ви на на̀с, и дѐло ру̀к на̀ших испра̀ви.

Ва̀с всехва̀льнии му̀ченицы, ни ско̀рбь, ни теснота̀, ни гла̀д, ни гонѐние, нижѐ ра̀ны, ни я̀рость зверѐй, ни мѐч, нижѐ о̀гнь претя̀щий разлучѝти от Бо̀га возмого̀ша: любо̀вию же па̀че к Нему̀, я̀ко в чуждѝх подвѝгшеся телесѐх, естество̀ забы̀сте, смѐрть презрѐвше. Тѐмже и по достоя̀нию болѐзней ва̀ших мзду̀ прия̀сте, и небѐснаго ца̀рствия наслѐдницы бы̀сте, непреста̀нно молѝтеся о душа̀х на̀ших.

Сла̀ва, и ны̀не, крестобогоро̀дичен: У креста̀ Твоего̀ предстоя̀щи Сло̀ве Бо̀жий, А̀гница и непоро̀чная Ма̀ти Твоя̀, рыда̀ющи вопия̀ше: увы̀ Мнѐ Сы̀не, ка̀ко умира̀еши на крестѐ; увы̀ Мнѐ, Свѐте Мо̀й сла̀дкий, гдѐ Твоея̀ добро̀ты ны̀не за̀йде зра̀к; краснѐйший па̀че всѐх человѐк.

Та̀же, Бла̀го ѐсть исповѐдатися Го̀сподеви: И трисвято̀е, и по О̀тче на̀ш: тропа̀рь. Иерѐй глаго̀лет ектению̀, и отпу̀ст. Та̀же ча̀с 1-й и псалмы̀ обы̀чны, и конѐчный отпу̀ст.

В срѐду блажѐнны, гла̀с 1:

Снѐдию изведѐ из рая̀ вра̀г Ада̀ма: кресто̀м же разбо̀йника введѐ Христо̀с во̀нь, помянѝ мя зову̀ща, егда̀ приѝдеши во ца̀рствии Твоѐм.

Блажѐни изгна̀ни пра̀вды ра̀ди, я̀ко тѐх ѐсть ца̀рство небѐсное.

Поно̀сную претерпѐл есѝ стра̀сть Христѐ: и поношѐние на̀ше вся̀кое отъя̀л есѝ Бла̀же, и вы̀шняго ца̀рствия прича̀стники на̀с явѝл есѝ, покланя̀ющихся Твоему̀ сошѐствию.

Блажѐни естѐ, егда̀ поно̀сят ва̀м, и изжену̀т и реку̀т вся̀к зо̀л глаго̀л, на вы̀ лжу̀ще Менѐ ра̀ди.

Ада̀мово Христѐ обнажѐние ты покрыва̀яй, обнажѝлся есѝ пло̀тию: вознѐсл же ся на крѐст, вознѐсл есѝ на̀с от глубины̀ злы̀х. Тѐмже Твоѐ Сло̀ве сла̀вим свято̀е схождѐние.

Стѝх: Ра̀дуйтеся и веселѝтеся, я̀ко мзда̀ ва̀ша мно̀га на небесѐх.

Святы̀ми ва̀шими стру̀пы, прехва̀льнии му̀ченицы, мно̀жество бесо̀в острупѝвше, вся̀ человѐческия я̀звы и стру̀пы, благода̀тию всегда̀ воѝстинну исцеля̀ете.

Сла̀ва: Тро̀ица просвеща̀ет всѐх, чѝсте Сию̀ почита̀ющих, и вѐдущих ю̀, держа̀ву иму̀щу неразорѝмую, Ѐйже возопиѝм: спасѝ любо̀вию Тро̀ице пою̀щих Тя̀.

И ны̀не: Предстоя̀щи Пренепоро̀чная при крестѐ, и зря̀щи Христа̀ пригвождѐна пло̀тию, восклица̀ющи взыва̀ше: гдѐ Твоя̀ за̀йде Милосѐрде ны̀не добро̀та, сла̀вы Го̀споди.

[1] Стихиры поются на распев самоподобна. Для просмотра нот нажмите и держите Ctrl.

[2] Стихиры поются на распев самоподобна.

[3] Разметка согласно напеву сокращенного знаменного роспева (минорный ирмологический).

Не нашли, что искали? Воспользуйтесь поиском: