Сказание о различных недузехъ преподобнаго старца Генадия

Клирикъ некий именемъ Саватия, каменьский постриженикъ, одержимъ бы зубною болезнию и обещася писати канонъ и житие преподобнаго старца Генадия. По написании же здравъ бысть от недуга своего. Живоначалныя Троицы во граде Любиме диякъ Прохоръ, зовомыи Богданъ, рязанския страны, велми одержимъ зубною болезнию. Врачи же исторгоша ему два зуба и не получих ослабы, скоро притекох к чюдотворному гробу, обещася писати канонъ// преподобнаго старца Генадиа и житие и отиде здравъ во свою страну рязаньскую. Жена некая именемъ Елисафия одержима бысть болезнию очною и припаде чюдотворному гробу преподобнаго старца Генадия, отры и покровом своя очи, здрава бысть, и некогда приспе еи время чадородия, томлени бысть три дни и три нощи, проглагола ей священникъ канонъ преподобнаго, и молитвами его Богъ простилъ того часа.

Некий диякъ, зовомый Черкасъ, покралъ книги церковныя и скатерть трапезную обители преподобнаго, отиде мало поприщь до Андомы реки. Отнялися у него ноги и руки, и весть бысть ко игумену во обитель преподобнаго. Игуменъ же скорее послал человека, привезлъ его во обитель и с книгами. Диякъ же припаде к чюдотворному гробу, прошает прощениа своеи дерзости, рукам и ногам ослаблениа и молитвами преподобнаго бысть здравъ.

Человекъ некий именемъ Игнатие зле бешенъ от нечистаго духа, многие люди едва его приведоша ко гробу преподобнаго, поживе ма//ло дней у гроба и паки здравъ бысть молитвами преподобнаго. Сецкиа волости бортникъ именемъ Антипа хожаше по своему ухожею бортному, наидоша на него многиа беси, аки человеки черныя, он же начася от них резати ножем и пререза себе горло и многихъ человекъ зубомъ поядалъ в дому своемъ. Великими силами привлекоша его ко гробу чюдотворному. И како начнет ясти, то ества ему исходила вонъ горломъ на груди. Поживе же в дому Спасове месяць и паки здравъ бысть молитвами преподобнаго. Отиде в домъ свой, славя Бога и преподобнаго старца Генадия.

Послуживший человекъ именем Иустинъ зело бешенъ былъ, такова его неприязненная сила, привязанъ былъ у столпа трапезнаго, изломалъ кругъ трапезный и како на него положили вериги преподобнаго и молитвами его здравъ бысть. Михаила Гурьева некий христианинъ именем Дементей, зело бешенъ был, соседи и сродичи привели его в дом Спасов и к чюдотворному гробу Генадиеву. Он же бияшеся о древе и о землю, скрегчюще зубы и пены теща, елъся за руки и за ноги, пожил во обители десят дней. В день Преображениа Спасова по заутреннем пении. Братиа отнесли его на полозии во гробницу и положили его на помостии у святаго гроба во время литоргии молитвами преподобнаго аввы Генадиа, здравъ бысть самъ прииде въ церковь Божию к обедне и паки отиде в дом свой радуяся и славя Бога и преподобнаго аввы Генадиа.

Бе некий сынъ боярский Василеи Ванинъ, жена его была немощна очима год, сам приехалъ в дом Спасовъ молитися игуменъ и священницы молебны пели и воду святили. Он же отвез воду святую жене своей. Жена же его умылася водою святою, здрава бысть очима своима молитвами преподобнаго старца Генадиа.

Чернець Патрекеи коли был в мирском пребывании, тогда жена его испортила горкою немощию. Он же свое имение роздалъ врачемъ, не мог улучити ослабы своей немощи, како же обещался пострищися в дому Спасове и у чюдотворца Генадиа молитвами преподобнаго здравъ сталъ.

Не нашли, что искали? Воспользуйтесь поиском: