ДВОЕЖЕНСТВО и запрещенные браки

Правило 49.

Святотатец, иже священная крадет, 15 лет да не причастится, по святому Григорию Нисскому.

Правило 50.

Двоеженец, едино лето да не причастится, по четвертому правилу Великаго Василия, инии же глаголют, две лете, чти Никифора Исповедника патриарха Цареградскаго, в Арменополи книги 3.

Правило 51.

Троеженец, егда имяше нижае четыридесяте лет, и не имяше детей с первыми женами, лета четыри да не причастится, егда же есть вышше четыредесяте лет, и дети имать, непрощено есть троеженство, по правилом Матфеовым, 3 стиха, 4 главы, и о том, или книги Единения, не оставиша сему быти.

Правило 52.

Правило седмьдесят второе шестаго собора повелевает, яко не подобает православну мужу, еретичестей сочетатися жене, аще же и будет, неключиму вменяет женитву, и законопреступен брак.

Аще ли обещается покаятися лице еретическое, да не пребудет брак, донеле же обетование известится, по четыринадесятому правилу, собора четвертаго.

Такожде и с латини аще православная жена сочтется, с распустом брака, и запрещению подлежит, по двадесятой главе, 3, стиха, еже в Матфеи, аще ли кто преступит уставленная, да отлучится.

Правило 53.

Священник аще в ведении благословит, возбраненныи брак от сродства, или кумовства, или четвероженьства, или неимущь возраста, сиречь, аще несть муж пятьнадесят лет, а жена тринадесять лет, да извержется, и брак да будет не тверд.

Правило 54.

Аще кто со обручницею своею смесится прежде венчания, лето едино да запретится, удержаваяся от причастия, яко же шестьдесят девятое правило Великаго Василия, о четцы повелевает, священник сицевыи не бывает, яко брак окрадыи.

Правило 55.

Аще ли же кто прежде брака, падется с материю обручница своея, или со инем лицем рода ея, возбраняется таковыи брак, аще ли убо после брака бысть согрешение, не распущаются, но запрещаются, яко и кровосмешение сотворшии, по пятьнадесятой главе, 3, стиха, еже в Матфеи, канон же сицевым есть, 15 лет.

Правило 56.

Правило пятьнадесят третие шестаго собора. Священники иже в разуме на брацех ликуют, извержению подлагаются, людины же отлучаются, а наипаче жены, яко многих вреждающия.

Правило 57.

Тогожде собора правило двадесят четвертое. Священником повелевает, ниже видети лики и глумилища, или конская ристания, но и на брак аще пойдет, да благословит токмо трапезу, егда же внидут тамо игралищныя органы, да востанет абие отъидет. Правило же третие надесять, собора Лаодикийскаго, отнюд возбраняет, верным имети игрища на браце.

Правило 58.

Иже малакию сотвори, да сухо яст четыридесять дней, по святому Иоанну Постнику, и да творит на всяк день поклонов сто, аще же не может сухоясти, да удержится от причастия едино лето, и поклон пятьдесят на всяк день.

Правило 59.

Смешающиися друг с другом, яко сугубу делающе малакию, сухоясти имут днии осмьдесят, или да не причастятся две лете, творяще поклонов пятьдесят на всяк день.

Правило 60.

Аще ли кто от причетник, прежде священия в страсть малакии падется, первее подлежит канону малакии, таже рукополагается, по рукоположении же в неведении сие сотворивыи, священства да есть празден лето едино, в ведении же паки что сотворь, да извержется.

Правило 61.

Инок же простыи малакийствоваи, днии 60 запрещается сухоядением, по Великому Василию.

О женах.

Правило 62.

И жены елицы валяются с мужи, или сами малакию творят, запрещение малакии да примут, ибо и тии в той же грех падаются яко и мужие.

Правило 63.

В течении сущи жена, сиречь обычная си имущи, не причащается, и в день Пасхи, донележе очистится, ниже входит в церковь до 7 дний. ниже смешается с мужем своим, донележе очистится, по святому Иоанну Постнику, в иное же время друг друга не лишает, по апостолу, точию во время причастия, и анафоры [доры] в неделях, и в нарочитыя праздники и то по согласию.

Правило 64.

Рождьшая в великую седмицу, яст масло, и вино пиет, по осмому правилу святаго Тимофея.

Правило 65.

Людины во святыи олтарь да не входят, ни мужь ни жена, разве единаго царя православнаго, егда дары Господеви принесет, по 68-му правилу, еже в Трулле.

Инокиня же входит в монастыри женском и пометает, по 15-му правилу святаго Никифора Цареградскаго, а зде в Велицей Росии, обретохом то правило, 9, и Никифор не повелевает входити инокиням во святыи олтарь.

Арменополь же глаголет, яко.

Достоит инокиням в монастырех своих входити во святыи олтарь, вжизати свеща, и кадила, и украшати храм, аще будет достойна и чиста, но не вносити в жертовник ино что разве точию священная, по 4-му, правилу святых апостол, ниже излишныя просфиры, но вне церкви да полагаются.

Правило 66.

Аще инокиня насилуема будет, или девица от господаря своего или иная жена от кого, явитжеся первое житие ея чисто, 14, днии запрещается, или едино лето да не причастится, аще ли исперва бяше житие ея скверно, еже блуд деющих, запрещение да приимет, по 32-му правилу святаго Никифора Цареградскаго. Великии же Василии, в 49-м своем правиле, насилованную рабыню от господина своего си, без епитемии остави, а иже волею, яко блудница канон да имать, аще кто с попадиею паднет, или с дияконицею, осмьнадесять лет.

Иже в Халкидоне святых отец.

Правило 67.

Аще чие отроча нерадения ради умрет не крещено, три лета сицевыи да не причастится, и на всяк день да творит поклонов двесте. и да постится, понедельник, среду и пяток. Аще ли текут к священнику, а священник небрежет, грех есть священнику, и томужде канону подлежит.

Правило 68.

Жена спящая, и у сосцу младенца своего умертвивша, лет седмь да не причастится.

Правило 69.

Пренебрегшая чревоношение свое, сиречь рождьшееся на пути детище, и сие умрет, яко убиица запрещается, по 33-му правилу Великаго Василия.

Правило 70.

Аще ли за простыню и недоумение, или скудости ради нужных, или яко пусто есть место, не запрещается, по 52-му правилу тогожде.

Правило 71.

Аще кая жена снесть былие, или иное что сотворит, и убиет отроча во чреве своем, убиица есть, по второму правилу Великаго Василия, 10 лет, запрещение да приимет.

Такожде сотворшая, и давшая сицевое былие, по святому Иоанну Постнику.

Правило 72.

А иже в Агкире святыи собор в 21-м своем правиле, блудницами растлевшим и погубляющим младенца своя, десятолетием запрещает, такожде и давшим им таковая растлительная.

Правило 73.

Томужде запрещению подлежат, по Иоанну Постнику, яже изверзают детища своя в стогнах, или на порте [площади] градской, иныи же кто возмет е на воспитание, и прилежание свое, занеже елико по изволению их, убиица суть.

Правило 74.

Аще жена извержет детище неволею, лето едино да не причастится.

Правило 75.

Иже напаяет детище свое, глаголемыми антисикотии, едино лето да не причастится.

О иноцех.

Правило 76.

Инок или инокиня, аще приидут во общение брака, сиречь, аще оженятся, не судится то брак, но блуд, сего ради донележе не распустятся, в церковь да не входят, но да отлучатся, по шестому правилу Великаго Василия, по распущении же, пятьнадесять лет да не причастятся.

Аще ли случится им умрети без покаяния, да не погребают их, ниже да творят им помин, ибо чюжди суть християн.

Правило 77.

А еже в Трулле правило 44, сицевых по распущении, седмь лет запрещает, аще от своего яве произволения, на покаяние придут, аще же не повинуются, но пребудут в нечистоте, паче же прекословити начнут, прелюбодеяния правилом да запретятся.

Правило 78.

Тожде и блудодееви иноку правило запрещает, еже и блуднику, а не яко же прелюбодею, и сие правило держати достоит, кроме великаго образа.

Правило 79.

Аще кто дерзнет пострищи инока без приимца, сиречь без старца, да извержется, по второму правилу второперваго собора, сиречь, аще несть старец купно в постризе, иже бы приял и имел его в повиновении.

Правило 80.

Недостоит без искуса пострищи инока, или рясу возложити на него с страстию, но со искусом. искус же знаемым, и местным да будет, шестомесячия время, или егда увидит игумен, изволение добродетели их, и прилежания, аще ли же страннии суть и незнаемии, в трех летех искус да будет, по божественным правилом, искус же с мирскими одеждами должен есть быти, а не со иноческими.

Аще ли кто предвари почернитися, или рясу облещи внутрь искуса, аще и кроме страстнаго, да не дерзнет совлещи сего прочее, но и неволею понужден будет пострищися, от местнаго епископа с запрещением и отлучением, по третией главе, единонадесятаго титла, царских правил. Аще ли кто преступит пределы святых отец, и без искуса и приемника пострижет кого, или в рясу облечет, правильно казнь да приимет, по пятому правилу, глаголемаго второперваго собора, аще же немощь случится сущим во искусе, да постризаются без приятия даров, ту сущу и приимцу, хотящему их имети в повиновении, аще когда здрави будут.

О женах.

Правило 81.

А жены да искушаются, седяще в дому своем, и за тримесячное время, впрашательни суть, убо ли в добром сем помысле пребывают, и тако да постризаются и даются приемницам си, хотящим их имети в повиновении, сиречь, старицами яко же и мужие, без всякаго дара.

Правило 82.

Мирскии поп да не постризает инока, по завещанию иже в Никее святаго собора, како бо даст иному, его же сам не имать.

Правило 83.

Повелевает десятая глава, девятаго титла, никто же от родителей да не дерзнет препинати чадом своим, приходящим ко иноческому житию, или оттерзати от монастыря, или сего ради отчюждати их наследия, аще кто постигнет сие сотворити, да будет отлучен от церкве, дондеже покается.

Правило 84.

Иже во иноческии облечеся образ, за страх брани, или за иное некое коварьство, яко негли посмеваяся, и сие после нужды и лицемерия поверг, в четыринадесятницах три дни запрещевается, и тако приступает ко святому причастию, по двадесять первому правилу святаго Никифора Цареградскаго.

Правило 85.

Калугер сыи презвитер, не венчает женитву, неключимо бо есть, ниже приимец бывает детищу, сиречь, да то приимет от крещения.

Правило 86.

Инок презвитер млад, аще служит, и инокине, недостоит причаститися от него по 22 правилу, святаго Никифора.

Завещание Великаго Василия.

Правило 87.

Аще презвитер, или инок, не чтет часа перваго, 3, 6, 9, несть ясти достоин, и аще не правит всего правила своего, яко мертва вменяет сего Бог, и да запретится, яко же подобает.

Аще некнижныи есть инок, да творит на всякии час, поклонов пятьдесят, глаголя, Господи Исусе Христе Сыне Божии помилуй мя грешнаго. Аще ли не может творити поклонов, да глаголет пятьсот молитв, на час, глаголя со вниманием. Господи Исусе Христе Сыне Божии, Богородица ради помилуй мя грешнаго.

Паки тогожде святаго другое завещание.

Да творит безкнижныи инок, за полунощницу, вервиц десять, за утреню, вервиц десять, за часы, вервиц десять, за девятыи час, и вечерню, десять, за павечерню десять, вервица же да имать узлы, сто и три, на всяком же узле да чтет преднаписаную молитву, канон же им есть, сущим убо малаго образа, поклонов триста, схимником же, поклонов, шесть сот, тогожде святаго.

Правило 88.

Аще кии инок самоволне смеется, или беседует кроме нужда на правиле, запрещение да имать, поклонов пятьдесят.

Правило 89.

Аще кии инок стоя на всем соборе церковнем, при концы же не обрящется, да сотворит, поклонов пятьдесят.

Правило 90.

Инок презвитер, аще и пременит образ, сиречь, в большую схиму поступит, да литургисает, никая же бо сему препона пострижиение есть. Архиерей же, аще пременит образ, сиречь, аще будет схимник, да не действует к тому святительское отнюд, ниже священническое, по двадесят девятому правилу, 5, стиха в Матфеи.

Правило 91.

Инок схимник сблудив, яко прелюбодей запрещается, пятьнадесять лет, малаго же образа сыи, яко блудник, сиречь, седмь лет.

Правило 92.

Инок аще седит на пиру с мирскими, послушаяи и помогаяи, паче же благословя им неистовства их, запрещается отлучением недель шесть, на всяк день поклонов сто творя, и сухоядение.

Правило 93.

Инок аще седит в дому своем, яко мирянина сего вменяет Бог.

Правило 94.

Инок аще оставит ложе свое, и уснет на дружнем без благословныя вины, имать запрещение, поклонов пятьдесят.

Правило 95.

Инок аще упиется, запрещается недель пять, и аще сблюет от много пития, запрещается яко же ниже в Номоканоне сем о священницех.

Правило 96.

Инок аще что украдет из монастыря, или тайно яст, подобно со мнозем испытанием да исправится и запретится от настоятеля.

Правило 97.

Инок аще солжет, вольным хотением, имать запрещение, сто поклонов великих, аще ли да спасет душу, или свою, или ближняго, греха не имать.

Правило 98.

Инок аще отъидет на брань, имать канон дний, 30.

Правило 99.

Инок аще посмеется, паче усклабления, имать поклонов, пятьдесят.

Правило 100.

Инок аще идет с женою поприще едино, да отлучится днии седмь.

Правило 101.

Инок аще лобжет жену, или отроча, имать запрещение, днии четыридесять да не причастится, ибо ни на святое воскресение Господне, достоит иноку лобызати отроча, или свою матерь.

Правило 102.

Презвитер инок врачуяи, или жилу секии, да есть празден священнодейства днии седмь.

Правило 103.

Инок презвитер аще извержен есть, трапезу точию да благословит.

Правило 104.

Инок простыи, бияи кого, прежде да примирится оному, таже да сотворит поклонов триста.

Правило 105.

Инок после павечерницы, ядыи и пияи, да постится едину седмицу, сухоядение и поклонов двесте, аще повелит нужда ясти и пити, второе да поет павечерницу.

Правило 106.

Инок аще распояшется на ложи своем, да сотворит поклонов, пятьдесят.

Правило 107.

Инока пострижена, изшедша же самовольне, недостоит приимати в другии монастырь, по четвертому правилу, иже в Халкидоне святаго собора.

Правило 108.

Аще ли же игумен приимет и, лишается игуменства, разве аще понужден будет зря его погибнути хотяща, инако бо от рук его душа его взыщется, яко нечеловеколюбствова о брате.

Аще ли же епископ приимет сицеваго, и яко же причетника имать и, да будет епископ, своих людии точию общением доволен, другим ему сообщающимся, по осмьдесят третиему правилу, иже в Карфагене собора.

Правило 109.

Инок егда избежит отай из монастыря, идеже пострижеся, и обтичет всюду, причастия отлучению подпадает, по четвертому правилу четвертаго собора, зане тем хулится имя Божие, аще ли бысть ему душевныи вред, и сего ради бежит, должен есть обрести отца искусна, и прияти от него завет, или яко имать, канон дати ему.

Правило 110.

Игумен аще с прилежанием не взыщет, инока избегшаго, и не даст ему подобающаго лицу его врачества, и утверждения, да отлучится, по третиему правилу второ перваго собора.

Правило 111.

Аще кто весть брата, хотяща тай изыти из монастыря, и не возвестит игумену, да отлучится, яко небрегии о спасении брата.

Никифора Цареградскаго правило, 17.

Правило 112.

Три главизны изгонят инок из монастыря их, первое, аще еретик есть игумен, второе, аще путь есть женам, третие, аще учатся мирстии дети. Некто же от старец рече, яко древнии отцы нескоро отхождаху от места своего, разве триех сих вин. Первая, аще кто имать некоего скорбяща нань, и много творя еже угодити ему, не можаше преложити и, вторая аще прилучишеся от мнозех славитися, третия, егда случися во искушение блудное впасти.

Правило 113.

Глаголет Великии Василии, аще кии инок, в коем любо словеси ко спасению его изглаголанному, сопротивится игумену своему, или старцу, иди духовному отцу, яко соперник Божии обретается.

Правило 114.

Иже разоряет устав, духовнаго отца своего самою подстрекаем злобою, при животе и при смерти, повинен будет.

Такожде и родителей своих, в коей вещи благочестивой преслушаяи.

Василия Великаго.

Правило 115.

Аще хощеши оставити обитель, в ней же еси зван был, и отца, и братию, кроме ереси, но за укоризну и язву, или яко видел еси на час смутившуюся обитель, или бдения ради, и низу легания, и неумывания, или яко мнии еси всех, и яко желаеши мира и яже в мире, или яко огорчи тя отец твой игумен, или брат твой, и сего ради хощеши изыти, горе тебе, кому тя уподоблю, токмо Июде предателю, отлучившуся Христа, и ученик Его.

От святых апостол.

Правило 116.

Аще кии муж, или жена, отдавше своя, церкви, или монастырю, или за душу раздавше своя си, послежде раскаявшеся о отдании, восхощут взяти нечто от тех, аще убо в неведении суть, да запретятся, ниже во ум сие приимати, аще ли в разуме, и не повинуются, да отриновени будут, яко же Анания и Сапфира от апостола Петра, единою бо преданная церкви, недвижима суть, и недостоит двизати, зане писано есть и инде, иже отдаст село, несть господин селу.

От постных словес Великаго Василия.

Правило 117.

Аще подобает что, в братстве свое имети, сие сопротивно есть, еже в деяниих о веровавших свидетельству, в них же писано есть, яко ниже един что от имении глаголаше свое быти, тем же, и глаголяи быти что свое во общем житии сам себе чюжда Божия церкви сотвори, Господня любве, учащаго словом и делом, душу свою полагати по друзех, а не яже внешняя, тожде шестое правило, второперваго собора возбраняет.

Втораго собора иже в Никеи, правило, 20.

яко не подобает иноком в женском монастыри быти.

Отселе заповедаем не быти сугубу монастырю, яко соблазн и претыкание быти многим, аще ли нецыи соближники изволят отврещися, и мнишескому житию возследоваша, мужем убо подобно в мужескии отъити монастырь, а женам внити в женскии монастырь, сие убо угодно бывает Богу, сущии же до ныне сугубии, да держатся по каноном святаго отца Василия, и по повелению его тако воображени будут, да не пребывают во едином монастыри, мниси и черноризица, любодейство бо посреди пребывает и приемлет, да не имеет мних дерзновения к черноризицы внити, и черноризица ко мнихом, едина бо воследования, да не совокупляется мних в женьстем монастыри, и да яст черноризица едина, и егда нужная жития от мужеския части кождо им приносится, вне врат сия да приимет игумения, женьскаго монастыря, старицею некою черницею, аще ли ключится и ближика коего мниха видети, то при пришествии игумении, да беседует малыми краткими словесы к нему, и вскоре от нея да отъидет.

[ Толкование ].

Всяко утвержение положиша отцы, да не приложится порок никии же ко мнишескому житию, и повелеша черньцем и черницам не жити во едином монастыри, ни вкупе ясти, ни особно беседовати, но аще кто и сродницу свою черноризицу хощет видети, то при игумении да беседует с нею, аще что и от нужных потреб от мужескаго монастыря принесет мних черноризицам, вне монастыря стоя да предаст игумении.

Тогожде.

Правило 118.

Аще кто имать что во общем житии, внутрь монастыря, или вне монастыря, да пребудет непричащен.

Правило 119.

Духовник иного духовника, суд решити и вязати власти не имать. аще убо ин связа, а другии разреши, разделение есть. Христос же не разделися, не достоит, да связавыи и разрешит, по тридесят второму правилу, святых апостол.

Духовники же глаголем в правду, и по истине законныя духовники, иже по Бозе, о спасении человечестем промышляют, а не тщеславныя, неискусныя невежа, и ложныя, иже купечьством сквернаго ради прибытка, во образе духовнем, врачевание наводят, тыя бо суть убиица, яко душа человеческия убивающии, за нерадение и неискусство свое, обаче архиереови достоит разсудити.

Седьмаго собора.

Правило 120.

Духовныи отец, аще кому грех исповесть исповедавшагося. имать епитемию, три лета да есть празден, токмо да причащается в месяц единою, и да творит на всяк день поклонов сто, гражданскии же закон глаголет. ископати язык сзади сицевому.

Аще епископ или иерей исповесть грех на сына своего духовнаго, на исповеди от него слышаныи, никако же подобает верити сицевому свидетельству, по правилу 133-го, собора Карфагенскаго. Святейшии патриарх Лука запрещение положи, на игумена обители Гиротрофия, сущаго архиепископа Ираклийскаго еже не литургисати, зане свидетельствова на духовное свое чадо. Арменополь книга, 3. собора, 1-го. глава, 7.

О отлучении безсловеснем.

Отречено есть епископом отлучати когождо от святаго причастия, кроме благословныя вины, отлучаяи же безсловесне, лето едино от святаго причастия возбраняется.

Четвертаго собора.

Правило 121. (ПОДЛОЖНОЕ ПРАВИЛО)

Яко недостоит просту человеку, укорити священника, или запрещати, или поношати, или клеветати, или обличати в лице, аще негде и истинна суть, аще же постигнет сие сотворити простолюдин, сиречь простыи человек, да есть анафема, и да изгнан будет из церкви, отлучен бо есть от Святыя Троицы, и послан будет во Июдино место. Писано бо есть, князю людии своих да не речеши зла, такожде, и настоятеля безчествуяи.

Седьмаго собора.

Правило 122.

Яко неподобает простым людем, да повелевают священнику внити во святилище, или в кую любо вещь, даже и до мала, но своею волею, егда восхощет изволитися ему литургисати и пети.

Правило 123.

Аще кто имать вражду на кого, в церковь да не входит, ниже приносы его приемлются, дондеже примирится, ибо молитва его в клятву, и грех вменяется, да творит же, на всяк день, поклонов пятьдесят.

Правило 124.

Аще кто во время причастия печаль имея на брата, и не даст ему мира, да есть отлучен, аще ли священник со враждою литургисает, да будет празден, шестьдесят дней.

Правило 125.

Укаряяи и проклинаяи искреняго, прежде да смирится пред ним, таже ла отлучится три дни сухоядыи с водою. Писано бо есть глаголяи брату своему ракка, или уроде, повинен есть геенне огненей.

Правило 126.

Аще ли кто укорит священника, да запретится лето едино, аще даст ему заушение, или древом ударит, да запретится три лета, аще и священник простит ему согрешения.

Правило 127.

Аще кто имать с некоим вражду, и преставится едина часть, да запретится другая, о умершем лето едино, и канон отходя на гроб, скончавшагося днии четыредесят, и глаголя в себе, прости ми брате, и Бог да тя простит.

Правило 128.

Писано бо есть, аще кто досадит отцу или матери своей, смертию да умрет. Аще ли покается о том еже содела, да запретится яко же подобает, аще простит ему, и досаду приемыи родитель, аще ли двигнет древо, и ударит их, да отсечена будет рука, аще ли покается, яко же изволит архиерей, да ему даст канон.

Правило 129.

Аще кто своя чада, яко между себе воспитана любя, и неравно им свое имение разделяяи, яко чадо ненавистник, не причастится божественых таин, донележе от церкве отлучится, и исправится.

Правило 130.

Аще кто за еже иночествовати сыну своему, лишит его части и наследия, такожде и той да отлучится, по 53, главе. 30, титла.

Правило 131.

Иже яст мертвечину, или зверохищное, сиречь, волком снедаемое, или птицею пораженое, сиречь от крагуя, или от иноя птицы, или кровь, или удавлену, обретаемая в тенетах, или от тех яко же удавляют латини, священник убо да извержется. людин же да отлучится, по 63-му правилу святых апостол, сиречь да не причастится лета два, и канон.

Правило 132.

Такожде и ядыи мясо или сыр, в великую четыредесятницу, или в среду и в пяток, лета два да не причастится, и поклоны.

Правило 133.

Аще кто пойдет на праздник варьварскии, или еретическии, и снесть в той день с ними от них жремая за душу их, или спразднует им, лета два да не причастится, по седмому правилу, иже во Агкире святаго собора, аще ли священник есть да извержется, по седмьдесятому правилу святых апостол. Но и от них жремая не подобает ясти, аще и приносят нам, возбранибося от тридесят осмаго, 39-го и 40-го правила, иже в Лаодикии собора.

Правило 134.

Правило же 11, шестаго собора, иже в Трулле повелевает, аще кто в болезни дерзнет призвати евреина врача. или немчина или от иных вер еретических или русскаго ведуна или шепотника или баб богомерских ворожей или кудесниц, тако же и лопарей и самоядь и от него врачюется, или и со июдеи в бани мыется. аще убо священник есть, да извержется. людин же да отлучится.

Правило 135.

Священник ловец, или птицоятель, да есть празден три месяца.

Правило 136.

Клирик или людин аще из церкви возмет воск, или елей, да отлучится по 72-му правилу, святых апостол.

Правило 137.

Епископ или священник или диякон лихву взимая, или да престанет, или да извержется, по четыредесят четвертому правилу, святых апостол.

Правило 138.

Инок же или инокиня лихву взимающе, да отлучатся, и от причастия, да возбранятся, дондеже престанут.

Правило 139.

Священник упиваяся, или блюя, или куплю дея, или да престанет, или да извержется, по четыредесят второму правилу, святых апостол.

Правило 140.

Священник аще поищет златицу, или что ино, причастия ради, да извержется по двадесят третиему правилу, еже в Трулле.

Правило 141.

Священник аще послет чтеца, или иного кого, да причастит человека, да отлучится, по четыренадесятому правилу, еже в Лаодикии собора.

Правило 142.

Четвертое правило собора Гангрскаго, сего иже отвращается мирскаго священника, и глаголет, яко ему литургисающу неподобает от него причаститися, анафеме предает.

Правило 143.

Священник в кой день литургисаше, и аще изблюет, от многаго пития, шестьдесят днии да будет празден, по святому Иоанну Постнику. Аще ли без литургии изблюет, от многопития, пол сих, аще ли ходит в корчемницу, или да престанет, или да отлучится, людин же аще изблюет по причащении, четыредесят дний запрещается, творя на всяк день поклонов сто, и да чтет, псалом, 50. Помилуй мя Боже.

Правило 144.

Аще кто удержит причастие во устех своих, и повержет е в скоты, или в пчелы своя, четыри лета да не причастится.

Правило 145.

Аще причетницы имуще прю между себе, и оставльше епископа своего, на мирское судище идут, канонному запрещению да подлежат, по 9-му правилу, еже в Халкидоне собора.

Правило 146.

Священник аще сотворит клятву с латины, или собор на епископа, или ино что за мирскую вину, или камения собрание, да извержется, по осмьдесятому правилу, иже в Халкидоне святаго собора, и по тридесят четвертому правилу, еже в Трулле, мирстии же, да отлучатся.

Правило 147.

Священник от своего епископа за леность некую и прегрешение отлучен быв, и дерзнет литургисати, прежде даже будет испытано прегрешение его, и простит ему епископ, да судится яко сам противо себе изнесе осуждения изречение, по тридесят второму правилу, еже в Карфагене святаго собора. Правило же сто тридесят третие и четвертое тогожде собора, запрещению подлагает епископы, иже отлучают кого без благословныя вины.

Правило 148.

Аще кии архиерей приемлет праздна священника от инаго архиерея, или причетника, и сообщится ему, и литургисает, да будут извержени, по второму надесять правилу святых апостол.

Правило 149.

Правило тридесят третие, святых апостол возбраняет приимати странныя священники без писания.

Такожде и седмь надесятое правило, еже в Трулле, извержению подлагает епископа приемшаго страннаго священника без книги отпустные, своего ему епископа.

А по извержении явственных ради грехов литургисавыи епископ, или священник, или диякон, конечно да отсечется от церькви, по двадесят осмому правилу святых апостол.

Правило 150.

Аще кии от причетник съслужит ему, и той да будет извержен, по 11-му правилу святых апостол.

Правило 151.

Священник аще приимет жертву еретическую, или крещает турчину детищ, или приимет жертву его, или яко приемника детищу возмет и, или друга жениха на брак, да извержется, по четыредесят шестому правилу, святых апостол, кая бо часть верному с неверным, или кое общение свету ко тме, по божественому апостолу.

Правило 152.

Правило шестьдесят четвертое святых апостол глаголет, иже кто дерзнет внити в сонмище жидовское, или еретическое капище еже помолитися, аще убо священник есть, да извержется, аще ли же людянин, да отлучится.

Правило 153.

Святыи же Тимофей Александрийскии, в девятой главе своих правил содержит, яко еже не приимати еретика в церковь благочестивых помолитися, аще не обещается покаятися, яко же бо преподобнии освящают, тако мерзъцыи оскверняют. Правило же тридесят третие, иже в Лаодикии собора, возбраняет с ними молитися, или ясти, или приимати что от благословения их, сиречь милостыню.

Правило 154.

Правило же девятое святых апостол повелевает, яко моляися со отлученными, аще и не в церкви, ни в дому, да будет отлучен, и той такожде.

О тайнах пролияных.

Правило 155.

Священник аще по действу сопротивничу пролиет святая, шесть месяц да есть празден, по единонадесятому правилу святаго Иоанна епископа Китру, аще ли самохотне пролиет я, да извержется, обаче должен есть собрати святая добре, и стругав землю, идеже падоша, да изнурит ю огнем, и водою, сиречь первее да вложит ю в огнь, посем да ввержет в реку, или в море.

Правило 156.

Священник аще литургисает, и низпадает звезда с дискоса, да есть празден днии осм.

Правило 157.

Аще случится святым даром просмрадитися, и не может во снедение приятися, ниже съжещи достоит, ниже поврещи, но с вином сладце устроити чашу, и изнурити, сиречь снести.

Правило 158.

Священнику искусившуся во сне, недостоит литургисати в той день, кроме великия нужды, аще и вельми безстрастен бысть, по тридесятому правилу святаго Иоанна епископа Китру, и по второму надесять Тимофея Александрийскаго.

Правило 159.

В неделях, и в праздники завещавай не делати, но приходити в церковь, яко же подобает християном, аще ли кто делает в тыя дни, да отлучится.

Должен же есть священник в недели и в праздники слово Божие проповедати, и люди о вере и житии учити, по правилу 58-му святых апостол, и девятому.

Шестаго вселенскаго собора, не точию бо молитися должни, но и слова Божия послушати, глаголет убо в притчах, уклонивыи ухо свое не послушати закона, сей молитву свою омерзил есть, аще же иерей не проповедает слова Божия, и люди о вере и житии еже о Бозе не учит, да извержется, по 58-му правилу святых апостол.

Правило 160.

Маслосвящение не бывает за канон, сиречь за епитемию разве точию за недужных, по апостольскому уставу.

Правило 161.

Над умершим же маслосвящения, да не дерзаеши творити отнюд.

Правило 162.

Такожде и братотворения, да не твориши, законопреступна бо суть сия.

Правило 163.

Аще умирает человек, аще и яде да причастится, точию исповесться, по девятому правилу святаго Никифора Цареградскаго, беснуяися егда изтрезвится от беса при смерти то да причастится.

Правило 164.

Тело мертво да не приемлет причастия, по осмьдесят четвертому правилу, еже в Трулле.

Правило 165.

Аще кто сведе согрешающаго, и могии возбранити греху а не возбранит, или обличен быв от епископа, скры, толико время и той запрещен да будет, елико же и грех сотворивыи, по седмьдесятому правилу Великаго Василия.

Пристежение [ сиречь извещение ].

Сеже разумно да будет, яко иже людини, или духовныи, иже от сожительства и пребывания вкупе, сведят или слышат прочиих грехи и беззакония, вреды и тщету творящих, тогда любовию исправления и спасения ради ближняго, должни суть предстателем и старейшинам известити, да препнутся от греха и зла оного, да убо утаенныя грехи души не погубят, ниже падежа какова наведут, но творяй грех, исправлен же сыи, да спасется.

Сие же Василии Великии глаголет в главе, 39. Всяко согрешение воспоминати подобает настоящему, или от самого согрешившаго, или от познавших, лучше же обличение со дерзновением крыемыя дружбы, ниже убо ин иному да сокрывает, да не братоубиица вместо братолюбца будет. А во Арменополи книга, 2. в главе 8. от Валсамона о монастырех патриаших глаголет, християнин убо человек должен есть, егда что слышит сбывшееся противное, да речет сие общему духовному отцу и архиерееви, да прегрешения душевная не пребудут не обличена и не исправлена.

Знаменай.

Не оклеветание се будет ниже осуждение, но любовь и поболение, еже брата от греха избавити, и на путь спасения исправити, точию не пред коим любо, но пред старейшим емуже власть и начало есть вручено да извещает, извещаяи же да будет покровен.

Должен же есть и друг друга воспоминати, рече убо некто от отец, аще увидиши брата согрешающа, и не речеши, да познает грех свой, от рук твоих взыщется кровь его, аще же по обличении пребудет, он во гресе своем умрет.

Василии же Великии в правиле седмьдесятом, тожде сокрывающим грехи, еже и согрешающим запрещение подает.

Иоанна Златоустаго от послания Павла апостола к ефесеом, нравоучение, 18.

Услышите молю, вси елицы не хощете туне ненавидими быти, похищает, и не обличаешили, но боишися ненависти, обличи брата, приими вражду любве ради юже во Христа, любве ради яже к нему, возбрани ему в ров отходящему, еже бо трапезы приобщитися, и глагол благих, и привета, и приобщения, не зельныя любве есть. Таковыя другом нашим даруем дары да душу их извлечем от гнева Божия, в пещи злобы возлежащих их зряще, воставим, но не исправляется рече, но ты свое сотвори, и дал еси ответ Богу, не скрый таланта, сего ради слово имаши воздати, того ради язык и уста, да исправляеши ближняго, безсловесная бо токмо не печалуют о ближнем, ниже слово некое имеется о безсловесных, ты же Отца нарицая Бога, и брата искреняго, зря его безчисленая творяща злая, благодатию же от онаго пользы ради прелагаеши ли; ни, молю, ни единаго же есть презирати согрешающих братии, видел ли еси враждующих, разреши [умири] их, видел ли еси лихоимствующая, возбрани им, видел ли еси обидимыя, заступи их, не онем но себе первому угодил еси, сего ради друзи есмы да друг друга пользуем.

Тогожде от послания, к евреом в нравоучении 30-м, глаголет сице.

Аще увидиши друга блудяща, рцы к нему, зла есть вещь юже дееши, несрамляншилися, ниже чермнееши, зло се есть, той ли убо не весть, рече, яко зло есть, ей весть, но от похоти влеком есть, и недужнии бо ведят, яко студеное питие, зло есть, но обаче, требуют возбраняющих.

Аще гневлива увидиши, аще лихоимца, удержи, свяжи наказанием, се есть дружество, тако брат от брата помогаем, аки град тверд будет, не бо еже ясти и пити творит дружество, таковое бо имут и разбойницы, и мужеубийцы.

Типик когда престают помины.

Правило 166.

В два надесято дневном, по Рожестве Христове и во всю, 40-цу, и в светлую неделю, и в недельныя дни, и в великия праздники, помины не бывают, прочее же во все годище поминаются православнии християне.

О вещех даемых в церковь.

Правило 167.

Сосуды златыя и сребряныя и завесцы приносимыя от християн в церковь, да не дерзнет никто же во свое употребление обратити, законопреступно бо есть, и аще таковыи обрящется да казнится, по седмьдесят третиему правилу святых апостол.

О еже не пити в церквах.

Правило 168.

В церкви пирове да не бывают, законопреступно бо есть и се, и отлучаются сицевая смеющии по двадесять осмому правилу, иже в Лаодикии собора, и по 74-му иже в Трулле.

Правило 169.

Ниже да стоят мужи со женами вкупе в женском припрате, сиречь преграждении кроме великия нужды, по тридесять осмому правилу святаго Никифора.

Правило 170.

Мертвых погребати внутрь церкви освященной не подобает, возбранибося, по девятому правилу святаго епископа Китру.

О кричащих в пении.

Правило 171.

Недостоит пети велегласно, и естество на вопль понуждати, но тихо, и со умилением, по седмьдесять пятому правилу, иже в Трулле.

Правило 172.

Иже приводит боляр, да исходатайствуют ему от епископа священство, или некии сан, да извержется, и отлучен будет, со всеми обещниками по тридесятому правилу святых апостол.

О украшающихся.

Правило 173.

Правило же шестое надесять, седьмаго собора, запрещению подлагает епископы, и причетники, украшающия себе светлыми одеждами.

Правило 174.

Матфей же в девятой главе, третияго, стиха возбраняет верным украшати себе, или власы браде стрищи, и вапсати [ушаряти] власы, или плести власы главы своея, неповинующихжеся отлучати повелевает, се же приводит от правила, девятьдесят шестое, шестаго собора, иже в Трулле.

Правило 175.

Аще убиет сам себе человек, ни поют над ним, ниже поминают и, разве аще бяше изумлен, сиречь, вне ума своего, по четвертому надесять ответу святаго Тимофея Александрийскаго.

Правило 176.

Прелюбодей, или явленыи блудник, не приемлется в церковь, ниже приносы его, аще не оставит греха, по тридесят девятому правилу Великаго Василия.

Правило 177.

И брак законопреступныи, иже от сродства не приемлется в церковь.

Аще не распустится, по распущении же, яко кровосмешение сотворь, запрещаются, сиречь, пятьнадесять лет да не причастится, по седмьдесять пятому правилу Великаго Василия.

Правило 178.

И четвероженец не приемлется в церковь, аще не распустится четвероженьства, по распущении да не причастится осмь лет.

Правило 179.

Двоеженец не бывает поп, ниже клирик, по второму надесять правилу Великаго Василия.

Правило 180.

Собрание от различных правил, о иже кая согрешения возбраняют быти священнику, и внимай си со опасением, о друже. Возбраняет священьства аще невозможет люди учити о вере и житии, по правилу 58-му святых апостол.

Правило 181.

Аще растлено есть отроча от кого, или сам сыи отрок растлил иного отрока, или блуд сотвори с женою, или с мужем, или со скотом, или с птицею, или с женою си есть чрез естество, или жена его не бяше девица, или обручен быв иною, или жена его со инем, или двоеженец есть, или прежде венчания растли обручницу свою, или прелюбодействова жена его, или сотвори убийство, или клятся, или коня украде, или вола, или от сосуд церковных, и от одежди украде что, и есть святотатец, или разбойничествова, или бысть звездослов, или волхв, или чародей, или гадатель воск льяи, и олово, или превязуяи зверей, и скоты польския, или жен и мужей ускопствуяи, или отвержется когда Христа, или ино нечто сотвори от отреченных, да не смееши свидетельствовати ему быти попу, ибо сожжен будеши и ты и он, и внимай сим, елико по силе своей, да не наследиши вечнаго огня, и будеши яко Июда, занеже предаеши священьство недостойным.

Правило 182.

Аще священник будет, падется во едино от сих, да извержется, по пятдесят первому правилу Великаго Василия.

Правило 183.

Аще ли прежде рукоположения согреши, телесным согрешением, и послежде обличен быв, исповесть то, да извержется, по двадесятому правилу, иже в Неокесарии собора, ино бо врачевство сицевии не имут, по Великому Василию, аще подвигнутся яко и мертвых воскресити.

Правило 184.

Аще кто сыи отроча прият от иного истицание в бедра, да запретится первее, потом да освятится, по святому Иоанну Постнику, зане не бысть совершенное падение, и не вниде педогонон [детородныи уд] в афедрон, аще ли вниде, да не дерзнет священьство приятии, не занеже согреши несовершен сыи возрастом, но яко сосуд проседеся, и осквернение пострада, и бысть неключим в священьство.

Правило 185.

Такожде и он во ино лице истицание творя, аще и не вниде педогонон его, аще и несовершено бысть, возбраняется священьства.

Правило 186.

Елицы держат епитемию покаяния, и по разсуждению отца духовнаго не причащаются, тех имей сыны духовныя, а иже не держат епитемию, отжени их, да не погибнеши и ты с ними, чюждых сприобщаяся гресех, по осмьдесят четвертому, и пятому правилу Великаго Василия.

Правило 187.

Тако имей грехи исповедающихтися, яко же бы были твои, и тако имей попечение да отвещаеши Богу, сего ради убо внемли добре, да не усрамишилися кого и убоишися, и впадеши в такову велику беду.

Внемли и се о взятии.

Да не поищеши что когда, от исповедающаготися, или словом или манием, да тебе даст нечто, неключимо бо сие духовным есть отцем, паче же и законопреступно.

О не хотящих епитимию держати.

Правило 188.

Оного иже не хощет держати канон свой, да отженеши сего, аще ли приидет паки, и изволит держати, приими его паки, и да положит начало, по пятьдесят второму правилу святых апостол, аще ли не хощет, остави его, не убойся убо, той сам понесет грех, обаче должен еси наказовати его по своей силе.

Правило 189.

Аще чия жена прелюбодействует, сей в священьство приити не может. По рукоположении же прелюбодействовавшую, или да отпустит, или да оставит священьство, по тринадесятому правилу, иже в Неокесарии собора.

Правило 190.

Хотящаго священьство прияти, должен еси истязати, и жену его со опасением. Никифора патриарха. Аще от подложницы, или от двоеженьства, или от блуда дети рождьшияся обрящутся достойны священьства, да рукоположатся.

О возрасте лет рукополагаемых, во священство.

Правило 191.

Повелевает четыринадесятое и 15 правило иже в Трулле, яко не бывает священник, прежде тридесяти лет, а диякон, прежде двадесяти пяти лет, а поддиякон, прежде двадесяти лет.

Аще ли прежде реченных лет кому степень получити, то извержени да будут.

Аще и вельми достославнии суть, тем же внимай духовниче, да не свидетельствуеши ему, аще не будет совершен в летех, да не поставляетжеся неучителен, по правилу по пятьдесят осмому святых апостол.

О иже кии подлегоша извержению и отлучению.

Правило 192.

Подобает ведати и се, яко аще падутся в некия отреченныя страсти священницы, извержению токмо подлежат, но не отлучению от причастия, ибо довлеет, им осуждение извержения, по двадесять пятому правилу святых апостол, кроме триех сих великих законопреступлении, сиречь по мзде.

Иже на сребреницех рукополагают с рукополагаемым да извергутся, по 29-му правилу, святых апостол, и иных многих правил тожде являющих.

Правило 193.

Пременяющеися епископы по умыслу, и митрополиты, от малаго града в высочайшии, по первому и второму правилу, иже в Сардикии святаго собора.

Правило 194.

И хотящии прияти епископию, или сан, или священьство, ходатайства ради княжеска, или болярска, по тридесятому правилу святых апостол, в такова законопреступления падшиися, излагаются и отлучаются, сиречь изгонятся и от причастия.

Правило 195.

Такожде подлежат извержению, и отлучению чародей, сиречь волхв, и прорицатель, и звездочтец священник, и хранительная подая, и превязуяи звери, по тридесят шестому правилу, иже в Лаодикии собора.

Правило 196.

Изгонитжеся и священник, иже не постничества ради, но лицемерством мерзится брака, и мяса, по пятьдесят первому правилу святых апостол.

Еще же да извержется епископ и иерей аще не суть учительны, и ниже веры ниже жития людей учат, по правилу пятьдесят осмому святых апостол.

О горниле, и о кладези.

Правило 197.

В жертовнице имей место не попираемое, ключимое отлученное во едином угле, да умываешися по божественей литургии, и помытие оное внимай, да не падет вне, и попрано будет.

Правило 198.

Такожде паки да имаши, иное место не попираемое, на излияние великия святыя агиазмы, еже остается от крещения, егда крещаеши детищь, ибо великая есть та святая вода.

О еже како подобает крещати иерею.

Правило 199.

Отроча идеже крещаеши, да имаши тамо купель покровену и чисту, или ин сосуд отлучен, и егда влиеши елей в купель, яко же повелевает последование. и возми масла стопкою треми персты, и помажи отроча по всех удех, яко же сказует устав, и тогда вземлеши и наго, и став просто, крещаеши в три погружения, глаголя сице. Крещается раб Божии, во имя Отца, аминь. И погружаеши и в купель, и паки станеши просто, возводя отроча, и погружая вторицею в воде, и омочая подобне, и глаголя, и Сына, аминь. И паки станеши просто, и погружаеши третицею, такожде глаголя, и Святаго Духа, ныне и присно и вовеки веком, аминь. Да и куплеши конечне.

Таже взем от купели, даеши и приимцу.

Посем глаголеши молитву святаго мvра, и мажеши то по всех удех, яко же глаголет последование.

В купель же да не дерзнет приимец прострети руку, да крестит отроча, законопреступно бо есть сие, точию да приимет и от руку священническу, сего ради и приимец глаголется, яко приемлет е от святаго крещения, и бывает ему сын, да научит его благочестию и житию добродетельному.

Правило 200.

Глаголет пятьдесятое правило святых апостол, яко священник не крещаяи в три погружения, едино Отчее, другое Сыновнее, и другое Святаго Духа, и сице не творяи в единой тайне, да извержется.

Кии паки второкрещаются.

Правило 201.

Елицы не знают яко крестишася, от пленения негли, или от инаго некоего недоумения и несть никто же, да известит о них опасно, да крещаются паки, по седмьдесят второму правилу, иже в Карфагене святаго собора.

Правило 202.

Аще же агарянския дети крещени бывше, от еретик от кого, паки крещаются и тии послежде, аще от произволения обратятся по истинне.

Правило 203.

Второе крещаются, иже ложне творящеся, по истине же не суще священницы, крестиша, по третей главе, втораго стиха, еже в Матфеи.

А сии нужды ради.

Обаче не второкрещаются, иже от причетник, или от простца инока, или християнина некоего православнаго, и по нужде не сущу священнику, то крещени суть, но точию аще не рука еретическая бяше первее. Чти правило, Никифора патриарха Константинопольскаго, и Арменополь в канонех кратких, сечение, 4-е. титла, 2. и сечение 5-е. глава, 1. и в книзе, 3-е. собор, 1.

Правило 204.

О еретицех, кии второе крещаются, и кии токмо помазуются божественным мvром, ищи в Матфеи за множество, глав, 2-го. 1-го, стиха, идеже на концы, сущих тамо правил, сице написася во оглавленне же рещи, всех во едино погружение от инославных крестившихся, и соборней приступающих церкви, паки покрещевати божественная правила повелевают.

О пияных попех крестящих.

Правило 205.

Священник аще яде, да не крестит, понеже и то есть, служба Божия. обаче сущей нужде да крестит.

Правило 206.

Такожде и в великую четыредесятницу крещати не подобает, кроме великия нужды.

Правило 207.

Святое крещение прежде литургии должно быти, даже причастится отроча на литургии, егда сицевое случится время, сиречь кроме нужды, занеже с литургиею должно быти. Имя же отрочати на литургии нарицается.

Правило 208.

Аще несть ин поп, священник сам да крещает свой детищ, крещает же и той, со инем приимцем. Аще ли будет приимец детища своего, разлучается своея жены, сиречь матере детищу, занеже быша себе кумове.

Правило 209.

Такожде и сына своего женитву благословляет, со инем другом жениховым аще ин несть поп.

О духовнем сродстве.

Аще муж и жена крестят единому человеку дитя, повелеваем к тому не смеситися друг другу, понеже кумове вменяются, аще ли совокупятся, имеют запрещение, лет седмь надесять, и метании по вся дни сто, сухо ядуще среду, и пяток. прощаяй же сих, да будет проклят.

О друзем сродстве духовнем.

Два некая, иже не имеют кого сродника, аще детца их един кум крестит, сиречь, от купели святаго крещения приемлет, дети оны да не приходят в брако причастие, до осмаго степене, понеже братия суть, един бо отец роди тех духовныи святым крещением.

О возрасте начинающих исповедатися.

Феодор Вальсамон патриарх Антиохийский, в вопросе, 48. к патриарху Марку Александрийскому, должни суть мужеский пол и женский, по шести летех исповеданием исправлятися и освящати, в Матфеи състав.

О святой проскомидии, и колико просфир имети должне еси.

Правило 210.

На святой проскомидии божественыя литургии седмь просфир да имаши, первая, за Господьский хлеб, вторая, Пресвятыя Богородицы, третия, за святых, четвертая, за патриарха, пятая, за царя и за царицу и за чад их, а где будет царево пришествие туто вымают по имяном всем по просфире, шестую же за всех православных за живых человек, ихже хощеши поминати, а седмую за усопших, едину прямо со другою особно, кождо чином своим, яко же в Служебниках указано и изображено имаши.

Обаче же да будет первая просфира цела, да вымеши Господьскии хлеб, еже како разумееши, дати довлеет на причащение, иныя же, да будут печати токмо выняты, аще ли мног есть народ, да довлеет едина просфира, точию болши народа ради на причащение, и по причащении, вложи и Пресвятыя Богородицы часть, и иныя яже суть печати вынятыя.

Правило 211.

Аще ли литургисает с тобою диакон, той части да не взимает, разве точию священник, по апостольскому изображению, во втором правиле Петра и Павла.

Правило 212.

Достоит знати и сие, яко да не благословляет рукою священник на святом предложении, внегда глаголати ему молитву предложения, сиречь Боже Боже наш, иже небесныи хлеб, по второму надесят правилу святаго Никифора.

О святой четыридесятницы, и о всякой среде и пятку, правило шестьдесят девятое святых апостол.

Правило 213.

Аще кто епископ, или презвитер, или диякон, или чтец, или певец святыя пасхи четыридесятницы не постится, или среды, или пятка, разве аще недугом телесным возбранен будет, да извержется, людин же да отлучится, смотри яко правило сие святую четыредесятницу, и всякую среду и пяток равно узаконоположи поститися, кроме немощи и праздников, непостяижеся, священник убо да извержется, мирскии же да отлучится, сиречь святаго причастия на время да возбранится.

Правило 214.

Цареградскии же патриарх Никифор, в пятом своем правиле глаголет, яко от священника не постящагося среду и пяток, не достоит причаститися, ибо отчасти благочествовати, а отчасти нечествовати безместно.

Правило 215.

Великии же Афанасии глаголет, разрешаяи среду и пяток, сей распинает Господа яко же иудее, ибо в среду предасться, а в пяток распятся, разве точию в богоявленских, и пентикостии, и в седмицы от церкви разрешенныя, такожде в праздники разрешаяи неповинен есть.

Правило 216.

Иноцы же, и понедельник, да хранят всего лета, яко же среду, и пяток, тако бо от отец прияхом.

Кое бо прощение есть иноку, егда не преизбыточествует пост его, паче мирьских, наипаче же егда и от мирян благоговейнии, сие хранят, глаголет же святыи Симеон чюдотворец, во своем житии, да постится инок на всяк день, и кроме общих постов, не мнее девятого часа, тожде и вси отцы глаголют, о общих же постех святыи собор, иже в Гангре, во осмом надесять своем правиле глаголет, аще кто от подвижных инок кроме немощи телесныя разгордится, и преданныя посты, хранимыя церковию разоряет, сущу в нем свершенному разуму, анафема да есть.

О навечерии Просвещения, и Христова Рожества.

Правило 217.

А навечерии Христова Рожества, и Просвещения, в онь же день случится, постимся, рыбы и масла не ямы, точию пием вино, аще ли случится навечерие, в суботу, или в неделю, повечерни ямы масло, и пием вино.

Правило 218.

День Христова Рожества и Прсвещения, аще случится в среду, или пяток, миряне убо ядят мясо, иноцы же сыр и яица.

Правило 219.

Такожде постимся, и в день Воздвижения честнаго и животворящаго Креста, в 14 септеврия месяца, в онь же день случится, или в суботу, или в неделю, ямы же в той день, бывшаго ради обретения честнаго Креста, масло и вино пием.

О посте великия 40-цы.

Правило 220.

Во святую и великую четыредесятницу, ямы единою на день, сухоядение, точию сочиво без масла, вина же и масла в суботу, и в неделю вкушаем, такожде и от черепокожных.

Правило 221.

Рыбы же не ямы, точию в день Благовещения, по божественым правилом, и в неделю Цветоносия по церковным уставом, и разсуждению искуснейших старец, и обычаю древнему в монастырех и соборах християнских, аще же случится Благовещение в великую седмицу, сиречь страстную не вкушаем рыбы, точию масло и вино.

О великом четвертку.

Правило 222.

Но ниже в великии четверток, ямы рыбу по 50-му правилу, иже в Лаодикии собора, ядущии же рыбу, в день праведнаго Лазаря, или суботы и неделя 40-ца, яко же видим многих, сие творящих, суд себе имеют, и запретятся своего им сластолюбия, како бо дерзают разрешати, в таковыя дни, в ня же не повелевает правило святаго Никифора, патриарха Цареградскаго.

О посте святых апостол, и Христова Рожества. и Пресвятыя Богородицы.

Правило 223.

В пост святых апостол, и Христова Рожества, и Богородица, сухо ямы, три дни, сиречь, понедельник, среду, пяток, храним от рыб, и масла, и вина, кроме немощи, ямы же сочива без масла, яко и в великую четыридесятницу, хотящии же угодити Богу, в суботу и в неделю токмо вкушают от рыб и масла.

О еже когда и где, разрешается пост, среды, и пятка.

Правило 224.

Ведомо же буди и сие, яко разрешается пост среды и пятка, на рыбы всего лета, точию в Господьския праздники, и Богородицы, аще ли случится навечерие сим праздником, в среду, или в пяток, не разрешается пост в вечер, утрешняго ради праздника, яко глаголет священнейшии Иоанн епископ Китру, в двадесят осмом своем правиле, в Матфеи, разрешаютжеся во всей пятьдесятнице, среды и пятки, на рыбу, и масло и вино, обаче же сухоядение, сицевых дней разрешается, но в 9 час, буди же на коегождо изволении, в праздники же святых апостол, и святых мученик, и святителей, не разрешаем на рыбу, аще случится в среду, и пяток, точию на масло и вино, больше же ничто же, обаче по разсуждении настоятеля невозбранно, рыбы же ямы, на Рожество Предтечево, а в другии же еговы праздники никакоже, точию масло и вино, такожде и в день верховных апостол Петра и Павла, разрешаем на рыбу, яко же глаголет святыи Феодор Студит, во своем уставе, о сем да большая навыкнеши, паче же по времени месту. и лицем о пищах разсудное устроение многих старец узриши, чти слово 57 святаго Никона.

Когда должни суть причаститися право живущии.

Правило 225.

Ведомо буди и сие, яко должни суть право живущии, и среду, и пяток, хранящии всего лета, причащатися пречистых таин, сиречь в великую пасху, в день Христова Рожества, в праздники святых апостол, и Богородицы, аще и сия посты хранят, и елицы достойни суть, неподлежат канону, аще ли кто не хранит святых апостол, и Рожества Христова поста, и Богородицы, в церковь сего да не приемлеши, ниже чад его, аще не воздержится от мерзскаго, блудник, два лета да плачется, два послушая божественых писании, два припадая, и едино стоя с верными без общения, во осмое же лето, прият будет на общение [Василии Великии правило 59. выш. прав. 28, о тайных гресех], женскии же пол от церкве не отлучаем, но от приобщения удерживаем.

Созомен в книзе 7. глава, 16. Пишет яко в западных церквах, паче же в Римской древле сохраняшеся обычай сицев. Тамо бо явьственное бяше кающихся место, стояху же в нем сетующе, таже плачющеи, совершенной же божественной жертве не сподобльшеся причащения, их же чистым и богочетцем леть бе причастися с плачем и воплем себе ниц на землю помещуше. Тогда плача епископ притечет и такожде на землю с рыданием падает, в конец же и все церковное множество слезами омывается. По сих епископ первее востает, и лежащих возводит, и елико довольно есть, о грешницех покаяние творящих и моляся, тех отпущает, особь же кииждо от произволения своего, или пощением, или от умывания и брашен удержанием, или инеми яко же повелено ему есть себе измождати, времене ожидает, елико епископ заповеда, минувшу же уставленну дню, запрещению аки долгу возданну сущу, от грех разрешается, и народу в церкви присовокупляется. Сия римстии попове, изначала даже в наша времена сохраняют, дозде Созомен писа.

Не нашли, что искали? Воспользуйтесь поиском: