Различныя главизны собранныя от иного Номоканона, о тайнах святых.

Священник аще по небрежению, пролиет святыя дары, имать запрещение, лета три, творя на всяк день поклон пятьдесят.

Вопрос. Аще от святаго потиря или от святаго дискоса, пролиет что на землю, кое тогда священник исправление подъимет. Ответ. Понеже ина слава солнцу, а ина слава луне, а иже на землю пролиявшимся святыням, есть различие, аще убо прежде херувимския песни, и еже на святей трапезе предложения святаго потиря, и святаго дискоса, случится некое таковое прегрешение, лености будет истязание и малым запрещением вещь исцелеет, ибо прежде жертвы святых молитв, и еже теми совершения падшееся, тело и кровь Господня не вменяется, аще ли же по освящении и совершении божественых таин припадет зло, и святая убо со всякою честию да соберутся, и место на нем же падоша, огнем и водою да почтется и изменится, яко же выше написася во 155, главе. Поползнувыижеся, да будет истязан, и аще убо от небрежения его, припаде зло, зельными запрещеньми, и лишением литургии, да исцелеет, аще ли бесовскому искушению, легчае казнь приимет, и невольное бо согрешение, исцеления требует правильнаго, да не мнится снискати лукавыи, удобною казнию подкрадуя, священнодействущаго незазорное.

Вопрос. Аще по нерадению священическу, агньца снеде пес, или иное ползущее, что должно есть сотворити. Ответ. Священник да есть празден священьства, плежущее скрыи под землю доле. Аще ли от зависти диявольския бысть зло, да есть празден на время, яко же изволится архиереови, яко же глаголет Нил сиречь Кавасил Диррахийский епископ.

Вопрос. Аще падет некое ползущее, во святыи потир, литургисающу ему, что достоит сотворити. Ответ. Развали оное ползущее, и погреби е на сокровенном месте, священник же да есть празден на время, яко же изволится архиерею.

Вопрос. Аще священник пренебрежет врученная ему святая, и от нечистых снедена будут. Ответ. Да отлучится лет шесть. Аще ли литургисающу ему, падет звезда от дискоса, да есть празден дний осмь. Кир Симеона Солунскаго, о священстве.

Вопрос. Недостойне священнодействущаго, прията ли есть жертва, и крещение, и от него бываемая вся, или ни; или духовник быв, прощавает ли согрешения многажды и не имея книгу или заповедь, убо ли суть прощена от него. Ответ. Яко же не всех убо избирает Дух Святыи, всеми же действует, прочее архиерей же и иерей, и духовник имея служение, и всяк ин причетник, правильно рукоположеный. Божий есть истинный раб, и спасению человеческому слуга, и ангел Божий, и святыни преподатель, и весь есть божественнаго просвещения, и благодати, и мзду своея службы, тамо приимет многую от Бога, паче же елико тщатель есть к божественным, и неленостно к ним имея, ниже нерадивне прилежа, мнимаго ради благоговения, несть бо говение еже праздну остати, но аще точию правильне прият служение, да действует, занеже спасительно есть ему, и всем верным, живым же и усопшим, аще ли ни, слово о своей праздности даст Богу, и сие глаголет богоявленныи Василии. Всяк же не [?] по правилом рукоположеныи святитель, или священник, или причетник, или духовнаго служения слуга, действует убо рукоположения благодать, за приходящих спасение, и когождо по вере приемлет, и ни един есть непричастен, н е [?] рукополагаемии от сих, рукоположени суть, и разрешении от грех, или связании, разрешении суть, или связании, и тайны же вся тайны. Не человек бо действует, но сквозе орудие благодать. Горе же орудию оному, еже чрез волю действующаго действует, и горе человеку оному, призрителеви толиких, аще бо в дольних, и человеческих, недаемая недостойне приемляи в себе, великаго достоин бывает осуждения, яко тать сыи и разбойник, и дерзнутель и хищник, и чрез достоиньства его пренебрегатель. кольми паче осужден будет, иже в божественых и небесных пренебрегая, и наипаче в самого Бога делех, и аще причащаяися токмо недостойне, осужден есть, недостойне же действуяи, кольми паче, и сия убо о приемших рукоположение, иже аще прежде, и аще послежде согрешиша, недостойнии суть вси. И аще покаятися, и спастися радят, да престанут действовати, священьства святейшая дела, исповеданием и плачем, Бога милостива деюще, несть им иное что на покаяние, аще не прежде, престанут священнодействовати.

Аще ли нецыи попущением Божиим в толикое приидоша дерзнутие, яко еже неверне и злочестивне, неверие бо есть вещь таковая, еже кроме священьства прияти хиротонию, священная действовати, несть слово рещи о осуждении сицевых, сие бо дело горше есть и самых тех нечестивых бесов во ангела светла, точию преобразующихся, безбожных же сущих и противных Богу, таковии не токмо велие и неисчетное томление подъимут, на божественыя от них, ниже божественая дела, понеже благодати рукоположения не имут, но и месть приимут иную, за прельстившихся от них, или негде крещенных, или рукоположенных, сии бо не хиротонисани, ни крещени суть, ни что же бо дает не имеяи, и ничто же приемлет что, от неимущаго, аще и мнится имети, тем же и прельщен бысть, и веруяи быти священник, или крещен, несть, и погибели сих крестивыи повинен, не может бо человек имети не прием от Бога, кроме бо Мене рече не можете творити ничтоже. О духовнем же служении, подобен есть согрешению, нерукоположне действующаго, и иже без повеления и заповеди святительския действует.

И се да уведят и хранят епископи и священницы, яко должни суть имети духовники, пред ними же часто да исповедают помышления своя и грехи вся, кроме же исповеди да не дерзают литургисовати. Аще бо людином сие узаконоположися. и никтоже тайнам божественным причастник будет не исповедавыися, колми паче иерей должен есть сие хранити. Тогожде, аще случися пролияти святая на входе, или снедена будут от некоего животнаго, что сотворити подобает. Случаются сицевая, и проливаются святая, паче же искушением лукаваго, и невниманием священническим, священник убо ему же случится пролияти святая, да исповесться прежде архиереови, и потом довольныи да приимет канон, наипаче же аще разделением сего, или невниманием случися, и божественныя службы да возбранится на время, аще ли же нужда и потреба есть священника на месте, воздержанием и молитвою, и коленопреклонением, буди канон ему, да не отнюд преткнется спасительное дело, во время же оное в не же случися бывшее на святая, аще убо в храме, входу совершающуся, излияся еже в потиру все, единение паки да творит, и молитву предложения да глаголет, и тако прочее от великаго входа, молитвеная да совершает.

Такожде аще случится пренесеный божественый хлеб, от мышей, или от инаго животнаго снеден бытии, и неведыи священник, по входе же увесть, да принесет ин хлеб, пресек обычне, глаголя пророческая словеса, и елика глаголати и творити обычно, и молитву проскомидии глаголати, таже наводит от великаго входа молитвы, яже тайнейшии суть паче, яже первее убо речены быша, очишение и моление имущая, и к священнодейству устрояющая священника, пролияныя же дары должен есть собрати в сосуд некии свят, и на месте священнем, и известнем скрыти, да не будут попираема, или ино что от неподобных постраждут.

Изрядно же место да будет, идеже по причащении, священник омывается, еже должен есть утверждено имети отвсюду, исчинено, и внимати да не отпадет что отвне места онаго, и от помытия, понеже свято есть, устне же от причастия освященная, и руце умыи, и яко священ потирь, оно есть место, и помытие свято, им же и исцеления яко же познахом бывают, мажущимся от сего неким недужным, или испивающим, и подобает сие подаяти просто, но хотяи испити, постен да будет, такожде и хотяи помазатися должен есть омыватися послежде, на особнем месте. или тамо идеже священник по причащении омывается, или на твердейшем месте.

Пролиянная же святая, собрати должен иерей благоговейно, с сущею тамо землею, и персти останком, аще мраморие постлано есть, взяти е оттуду, и на месте священнем, и особнем положити, аще ли велико и недвижимо, да просек во глубину довольне место, идеже распрострешася святая, и изнесено тамо положити на месте, якоже рехом, но и просеченое место да измыет, аще возможно, аще ли святая не вся излияшася, но часть оста, да и другую приложь елико в потребу, свершит яже священнодейства. Аще ли святая на одежду излияшася, аще убо прежде совершения, честная же суть и многоценная, особно в сосуде священнем омыеши довольно, яко да ничтоже останет во одежде, омытие же влиеши в место священное, и утверженое, яко же речеся. Аще ли по совершении излияшася, по всякой нужде, да отрежется часть оноя священныя одежды, и божественныи покров да будет измовен, и той на особне месте, идеже и священныи потирь измывати мощно, и губу наполнившуюся гноения, и молия, и священныи покров, и сия омывати во время свое, точию в твердем месте благоговейно, а наипаче во еже добре имущии и твердо, глаголемей умывальницы несть вред, но паче боголюбезно, в честь и красоту, Божиих священных сосудов, обретаем бо и в ветсем учинении, яко великая церковь имеяше некую калпу, сиречь умывальницу, в ней же священныя омываху чаши теплою водою.

Тем же внимати должен есть священник, всем святостем, и священному преданию прежде священных, и соединению животворящия крови, и божественныя плоти, яко еже на скрижали чисто, и твердо имети, с чистым утвержено платном и честным. то бо есть божественое тело, и кровь Владычняя, и поклонятися, и кадити, и почитати подобает всем прилежанием, и горе к востоком над божественою трапезою поставлены имети, и призирати, да не случится некое нерадение, от неподобающих.

Аще не сотворит священник соединения.

Аще по забвению священническому случится, не быти соединению, и покрыет празден потирь, аще убо в входе увесть, абие на трапезе соединение сотворити должен есть, и молитву рещи, и тако литургию кончати. Аще же не внят, и литургию соверши, внегда же хотети причаститися, сие позна, должен есть соединение сотворити, и молитву рещи предложения, и изначала паки, яже от великаго входа молитвы глаголати, и призыванием Святаго Духа, точию потирь запечатлети, и прочая скончати, и тогда причаститися.

Тако аз о сем помышляю праведно быти, сотворити священнику, аще и иным изволится архиереом Христовым, сие быти ключимо, паче же великому собору, занеже не будет совершено, не приемшее молитв, и печати и призывания Святаго Духа, и в божественую кровь не преложится, и не обрящется тамо тогда, еже бо священно действоватися, и молитвы от священника и печать прияти бывает.

О рукоположении правило двадесять девятое святых апостол.

Аще кии епископ за сребреники достоинства сего приятель бысть, или презвитер, или диякон, да извержется и той, и рукоположивыи, и да отсечется общения всячески, яко же Симон волхв, от мене Петра, правило, 30-е, аще кии епископ, мирския князя поем, тех ради держатель будет церкви, да извержется, и отлучится, и сообщающииися ему вси. Толкование, от Валсамона. Сия два правила, 29, и 30-е, не точию низлагают, но и общения отсецают, иже сребреник ради, быша епископы, сиречь отлучают, или презвитеры, или дияконы, и тех иже ради княжескаго предстательства, быша епископы, благодать бо Всесвятаго Духа, продаема несть, рече.

Послание же, иже во святых Тарасия патриарха Цареградскаго, к Андрияну папе Римскому глаголет, легчайши паче есть Македония, и от него духоборец злочестивая ересь, нежели продати дерзающии, благодать Всесвятаго Духа, тии бо убо тварь, и раба, Богу и Отцу Святаго Духа буесловят, сии же своего яко же мнят [разсудити] раба Того творят си, иже бо кто нечто продает, яко владыка его продает, и купуяи, владыка быти хотяи купующаго, сребром сего стяжав ценою, прилагает же, яко сих согрешение равно есть Июде предателю, тако смышляющих, аще бо единосущен Сыну Дух есть, и единочестен, осуждается Июда, Сына продаяи на сребре, нужда есть негли и Дух Всесвятыи продающим, не менши оного казни подъяти.

Окружное же послание Генадия патриарха Цареградскаго со инеми и сие содержит, буди убо, и суть отлучени, и всякаго священническаго достоиньства чюжди, и проклятию анафеме подлежат, и даяи и приемляи, не продаемую благодать Всесвятаго Духа, и иже стяжати священьство за сребро мнит, и сие подаяти на сребре обещаваяи, аще причетник, аще людин есть. любо обличается, любо не обличается сие сотворь.

Вопросив же некто яко тридесятое правило, точию воспомяну епископа, такожде и двадесят девятое, поддияконы же не воспомяну, или четца. Вопрос. Аще презвитер кто будет, или диякон, или поддиякон, или чтец, предстательства ради князьска, или поддиякон и чтец, даянием сребра, что должно быти. Толкование. И сии извергутся, и отлучатся, от конца настоящаго правила, глаголющаго. не токмо первовиновников злу низлагати, и отлучати, но и приобщающихся им. И послание Генадиево, не точию священыя, но и людины, иже таковое злое сотвориша, проклятию подлагает.

Правило 2-е. иже в Халкидоне, собора 4-го.

Аще кто епископ, сребра ради рукоположение сотворит, и непродаваемую благодать, в продание низведет, и рукоположит на сребре, епископа, или презвитера, или диякона или иного кого, в причте счисляемых, или произведет на сребре, иконома, или екдика, или панрамоанария, или кого любозаконных причетников ради сквернаго прибытка, сие начен, и обличен быв, да приимет беду о своем степени, и рукоположенныи, ничтоже от купленаго да пользуется рукоположения, или произведения, не [?] буди чюждь достоиньства, или правления, еже на сребре получи. Аще же кто и ходатай явится, сице скверным и нелепым взятием, и сей убо аще причетник есть, своего да отпадет степене, аще ли людянин, или инок, да будет проклят.

Правило 22. шестаго собора.

На сребре рукополагаемых, или епископов, или коих любо причетников, а не по искусу, и жития изволению, изврещи повелеваем, и рукоположивших сицевыя. Правило пятое, седьмаго собора, и тех иже злата ради честь некую улучивше добродетельми чести сподобльшихся уничижают, томужде суду подлагает. Великии же Василии, к сущим под собою епископом пишет, яко еже не хиротонисати на сребреницех, со инеми и сие глаголет. Непщуют нецыи не согрешати, занеже не абие взимати, но по рукоположении, взяти же есть, еже что любо взяти. молю убо сия приходы, паче же приведения в геенну, отложити, и да некако руку осквернивше, сицевыми прияти, себе недостойных сотворити, еже совершати святыя тайны. В книзе же деянии написано, видев же Симон, яко возложением рук апостольских, дается Дух Святыи, принесе им сребро, глаголя, дадите и мне власть сию, да на него же аще возложу руце, приимет Дух Святыи. Петр же рече к нему, сребро твое с тобою да будет в погибель, яко дар Божии непщевал еси сребром стяжати и прочая. Аще кто даянием злата, епископ или причетник будет, или странноприимец, или больничарник, или правитель светлому, некоему дому, или иному некоему церковному, промыслитель служению, и давыи и приемыи, исходатайствовавыи священьства, или причта, и ввереннаго правления, да обнажится, зде добре бы было перси биюще, болезнено возопити, аще беззакония назриши Господи, Господи кто постоит, кто бо есть, иже правление светлому дому, или службу некую церковную прият, или причетник бысть, или монастырь объят без некоего даяния, аще бо всеми сими, дающими же, и приемлющими беззаконно, в последних священная правила почитаются, паче же уничижаются, кая нам спасения надежда, не отступающим всех сих общения.

Святаго Никона от послания к Енклистию.

Веждь убо отче мой, яко божественая писания, с божествеными канонами определяют, яко неправедно налагаемая запрещения, у Бога не связуют, аще я и архиерей положит, кольми паче аще меншии, яко же глаголет святыи Дионисии. Иже убо неразсудным изречением, и невоздержным сердцем от верных кого отлучи, сего не токмо не коснуся, но и на главу его возвращается, яко же и святии соборы провещавают, не сия запрещения связуют, яже по божественым правилом и законом наложишася, а не по своей воли, безсловесне бо казнь налагаяи, сам отлучается, и сам сию казнь должен есть соблюдати, яко же божественнии и святии правила усмотряют.

Такожде Великии Петр к Клименту, ты убо свяжеши яже достоит связати, и разрешиши яже достоит разрешити.

Глаголет бо и святыи патриарх Николай Богом произведеныи. Имут бо архиерее власть запрещати и решити, яко же и святыи собор определи, яко закон вязати и решити от Бога приемшии. Аще убо архиерей чрез волю Божию кому запретит, Бог ему не последует, и се обретается запрещение его неправедное, и сего ради некрепкое.

И о священьстве рече Господь Петру, яже свяжеши на земли, будут связана на небесех. виждь силу глагола. Не рече яже свяжеши на земли, будут связана на земли, но на небесех, да отлучаяи, или налагаяи, или возбраняяи, вещь быти страшную мнит, аки Бога, ко общему с собою изречению призываяи, сиречь, под свидетельством сущаго на небесех сие творя, и низлагаемыи боится, аки вне царства небеснаго изгоняется. Виждь рече, еже твориши о иерею яже доле связуеши, сия мни яко горе написуются. Несть от издания словесе свободен соуз, аще неправедно свяжеши, на суде ангелом указати имаши, аще не гневом, или смущеным сердцем соуз нанесл еси, аще не себе отмщая. Бог бо неправедно связаннаго возбраняет и отмщает.

Отлучая же кого от церкве, прежде нежели вина явится по правилом, разрешается от большаго архиерея, сам же отлучится, да еже неправедно сотвори, праведно претерпит.

Симеона Солунскаго.

Всяк отлученыи, или безсловесне яко же сему мнится или законне, да не пренебрежет отнюд. ниже судия сам себе да будет, ниже инако сам да прельщается, яко не касается ему, но усердно к запретившему да преступит, с душевным смирением и сокрушением. Аще ли не приемлет запретивыи, по еже приходити многажды, со инеми благоговейными к большему архиерею да идет, и тогда ищет прощения, не на запретившаго же ходя, но смиренне и благоговейне ища прощения, да будет и разрешение по словеси, и не оскорблен запрещеныи отпустится, да некогда в правду оскорбится. ин бо рече, суд человечь, а ин Божии. А яко же не подобает, аще кто и неправедно страждет, самого себе отмщати, собору же не возвещати, научает всех, повесть сия, яже есть во Арменополи, книга, 3-я, соборная.

Егда господин Николай Музалон реченныи Амиклийский епископ, по нужде от местников пострижен бысть, и много моляшеся. да по нужде на нем бывшее изнесется, и да паки действует епископская. Святейшии оныи патриарх Лука, видя сего оболчена в епископская и на собор пришедша, не прият и, глаголя, яко аще бы соборнаго изречения и исправления ждал епископ, обрел бы убо правильную помощь. а понеже по нужде возложенная нань иноческая одеяния безчинно отложи, и самомстителен бысть, не улучит помощи.

Но святейшему патриарху сему преставльшуся ко Господу, иже по нем святейшии патриарх Михаил, по нужде убо бывшее стрижение, яко же небывшее вмененое упраздни, епископа же яко пренебрегша, и самого себе оправдивша, временнаго нелитургисания запрещению подложи.

Такожде и сам себе отлучивыи, или прокляв наглостию и яростию, или отвержение на Бога изрек, должен есть со слезами и сокрушением, ко архиерею изряднее приступити, или сему несущу к духовному некоему отцу искусну, известити и прослезитися, и прощения просити, и молитву и дела покаяния творити, и не просто к таковым належати, ибо многое есть осуждение, иначе яже от слова, а иначе яже от дел согрешения судятся.

Тем же рекии от ярости словом единем нечествовати, священник сыи, и не сотворив, осуждается убо, и священства возбраняется на многое время, и не подлежит извержению, за еже не соверши дела, занеже о иночестем образе написаша отцы.

Яко аще некто поучится поврещи образ, и не поверг предварит умрети, со иноки будет, яко же и людин с людины будет, аще поучився точию инок быти, и не постиже. В нем же бо кто постиже быти, и есть и судится, обаче канона требует тяжчайшаго, и праздности велия.

О священницех.

Священник, и диякон, или кой любо клирик действуяи, да хранится от бесед женских, да сокровище душа своея некрадомо по четыредесят первому правилу святаго собора, иже в Карфагене соблюдет, да похвалитжеся о девьстве своем, и не возносится, и не уничижает посягших, да не погубит еже имать, по рекшему.

Иже имать возмется от него, и сего ради да не будет проклят, по девятому и десятому правилу собора иже в Гангрех.

Священик позван быв на праздник от кого, и не имея подобнаго времене отъити и благословити, да благословит, или диякон, или чтец.

Ибо Господь наш Исус Христос, многим апостолом священьства не имущим, повеле крестити.

Священник ловец, да отлучится от литургии, месяц шесть, и да творит на всяк день поклонов двесте.

Священник за причащение святых даров, приемляи злато, или сребро, или яица, или иное что, да извержется, яко лютейшии суд подъимет нежели Июда, иже на худей цене Господа продаде.

Священник, млеко или мед, или сыр, или животная, или сочива во олтарь принося, разве точию гроздие, масло, свещу, и фимиян, да извержется, по третиему правилу святых апостол, и по осмьдесять девятому, иже в Трулле.

Аще кии священник литургисав, и от чревообъядения изблюет в той день, да не служит, дней сто, творя на всяк день поклонов тысящу. аще ли от соумереннейшаго случится быти сие, пол сих да имать.

Аще ли священник изблюет алчен, или истечет кровь из ноздрей его, или от зубов, не может литургисати в той день.

Вопрос о священствиих.

Аще кто единою соблудив, восхощет быти священник, прежде престав сицеваго греха, может ли рукоположитися, или ни. Ответ. Аще и мертвых воскресит, рече Великии Василии, священник не будет, ибо священное неблазнено есть.

Осквернившиися литоргисающии священницы, аще и не страждут зде в наказании, но тамо ожидает их вечная мука, аще не престанут литургии, и грехов не покаются достойне.

Недостоит священнику одежду краткую носити, но даже до кости долняя, и со страхом и прилежанием хранити вся, священная церкви литургии, ниже паки неизмовенное одеяние носити, во святом олтари, такожде завещает правило, 27. собора шестаго иже в Трулле.

Вопрос. Аще священник измыется, может ли в той день священьствовати, и людянин по отшествии в баню, отлучитлися в той день божественых причащении, и сопротивне, священно таиньствовавыи иерей, или людянин божественых святынь, сподоблься измытися, или жилу сещи может ли или ни. Ответ. Иже в врачех, всеучительныи Галин, баня рече, и солнце, и обучение, на движение устремляют, яже прежде безмолствующая избытки, тем же ничтоже будет, о них же вопросил еси, и сечения бо жилам обличают, яже сих злобы и свойства, по Иппократским книгам, иногда убо раждают разседение, иногда же паки твердыню, вскую же чаемое негли зло, спасительному таин причастию да совокупим, и разленением, свет нашего спасения покрыем, идеже священно действующих, праведное понуждает слово, и прежде священства и после, со всяким умилением и говением, колена прекланяти к Богу, и благодарити за Господняго тела и крови причащение, а не дрочитися разленением, и кроплением теплых вод, аще ли посечением жил понуждает смертныи недуг, за спасение больнаго да будет.

Вопрос. Аще кто изблюет по божественом причащении, по коему исправится преданию. Ответ. Храняи рече, преподобне преподобная, и преподобен будет, и освятится, предаяи же благодать, сквернен будет, аще убо от невоздержания поползеся в блевотину, божественых святынь причастивыися, зельными запрещенми исправится. аще ли же за припадшаго негде недуга озлобление. по епископскому разсуждению, легчае запрещение приимет, и сие бо есть дело оставления.

Вопрос. Без антимиса за скудость, мощно ли священно действовати. Ответ. Отнюд несвященно действовати, ниже стриморфом, ибо вина сатанинска есть, еже не взимати икону в пусто место.

Вопрос. Елико аще крещают несвященнии, мужие же и жены, или иноцы, что достоит творити. Ответ. Аще умрет крестивыися, прежде нежели постигнути священнику, божественая благодать совершает и, аще ли же жив будет, да паки поставит и священник в купель, и молитвы и мvро по обычаю творит, то же и Никифор патриарх Цареградскии глаголет.

Вопрос. Аще разболевся священник, причастится от инаго священника, возбраняет ли ся священно действовати. Ответ. Не возбраняется Никифора правило, первое надесять, не грешно едину проскомисати просфиру о трех человецех, или едино вжизати кадило.

Вопрос. Может ли священник едину токмо имея просфиру. и во ином простом хлебе сотворити кресты, и изображения, и от тех приносити. Ответ. Сие ниже правильно есть, ниже написан обычай церковныи, тем же и сотворивыи то священник, возбраняется священства, во унареченное время.

Вопрос. От укруха хлеба, может ли кто литургисати. Ответ. Тожде речеся, и о творящих агньца со укрухом хлеба, си речь взимающих печать с малостию хлеба за скудость человек, еже снести, не укрух бо хлеба прием Христос, рече, приимите и ядите, сие есть тело Мое, но совершенныи хлеб, яко же бо совершен есть Бог, и совершен человек, и совершена плоть Его, ибо и древнии обычай, и закон есть, сего ради и хощет, совершенаго всецелаго и чистаго хлеба, аще ли же есть скудость человеку, сотвори малую печать, или просфиру, и довлеет.

Вопрос. Может ли священник литургисати хлебы благословеными на велицей вечерни. Ответ. Ниже сие есть церковныи обычай, ниже обретеся кто когда сотворь сие, сего ради и вы да не творите.

Вопрос. Аще достоит приносимая в церковь, сиречь, просфиру и вино, неразсмотрительне ясти священнику, и яже хощет, и яко же хлеб общии, должен ли есть снести. Ответ. Еже убо воздвиженыя укрухи, никако же, но в церкви точию ясти есть, аще вся иждивут, а яже излишняя онех, не с млеком и сыром, ни с яицы и рыбами, но опроче и особне, благочинно потребляти.

Воньми же в настоящем ответе содержимым, и плачися како пренебрегомо есть от всех то кольми священник, иждивение невозносимых просфир, мнози бо и с мясом ядят я, и ино образно обще творят.

Чрез всю великую четыредесятницу, в постныя стихари и фелони да облачаются священницы, и диякони, кроме Благовещения, и Цветоносия, и Великия суботы, тогда бо в белыя облачатся.

Правило иереом, иже не облачаются во освященныя ризы, или неразумием, или гордостию, или леностию.

Стихарь есть правда, а фелонь истинна, и прииде правда с небесе, и облечеся во истинну, Слово Божие облечеся в плоть, и неразлучно пребывает, ты же брате изволил сан иерейскии, не разлучай стихаря с фелоном, аки Христа во двою естеству, слыши Господа рекша учеником, шедше научите вся языки, крестяще их во имя Отца и Сына и Святаго Духа, учаще я блюсти вся елика заповедах вам, и паки рече, тако нам есть лепо исполнити всяку правду, виждь како ти рече блюсти все и исполнити. Павел рече, облечетеся во вся оружия Божия, яко избраннии Божии, и Давыд рече, иереи Твои облекутся в правду, и во отец твоих место быша сынове твои, и поставиша я князя по всей земли, во Авраамовы чада место, апостолы постави, во апостол место святыя отца, архиепископы и иерея.

Правило святаго Иоанна Милостиваго, поучение попом.

И се паки некто иерей от церкви Иоанна Милостиваго, начат служити вечерню без стихаря, видев же Иоанн Милостивыи, повеле изгнати и, и иному иерею повеле служити вечерню, и неколико дней пребысть не служа, и призва архиепископ рече ему, чадо ведением ли се сотвори, или неведением, или леностию или величаяся, и рече поп, владыко неведением се сотворих, и рече ему Иоанн, аще бы ведая се сотворил или величаяся или леностию, то отнюд бы тя извергл из поповства, но да простит тя Бог, и служи яко иерей Христов, в стихаре и в фелоне, на вечернях и заутренях, и кресты нося, како соблазнился еси отлагаеши начало иерейству, поставлен еси прежде в дияконы в стихарь, и потом ти фелонь возложен, како главы не храниши, а поконцыся держиши, начало иерейству отверг дияконство, и всего причта священническаго яже о Христе, и раздираеши ризу от ризы, яко он первыи злодей ризу раздра, жидовьстии же воини разделиша стихарь Господень, слыши Господа глаголюща, Аз есмь начало и конец, и паки рече испытайте писания, яко в тех имате обрести живот вечныи, и та суть о Мне послушествующа, и рече поп, владыко, большия видех попы, тако творяща, и рече Иоанн, и аз веде же, яко вы творите богатыя и величавыя попы большими, тии же у Бога хуждьши суть, а хуждьшии же в веце сем, и работающеи Господеви со страхом, в будущем веце вышши будут, слыши Господа глаголюща, не приидох да ми послужат, но да послужу, и кто в вас хотяи быти болии в царствии небеснем. буди всех меньши и всем слуга, и то рек, отпусти его с миром.

О иеромонасех, еже о священноиноцех.

Аще кии священноинок падется в блуд, да престанет литургисати, каяся три лета, и поклоны яже обычно творят иноцы, да усугубит, и тако да будет прият к причастию, но не священнодействует.

Вопрос. Аще подобает по вине извержену бывшу священнику, или волею священьство оставльшу, зазревшу же себе, предглаголати. благословен Бог наш, и Боже ущедри ны, и Христос истинныи Бог наш, или кадити кадильницею, или причащатися внутрь олтаря. Ответ. Никако, ибо в простолюдин место учинен будет, аще кии священноинок во истицание падется, да не литургисает в той день, аще и великая нужда есть. Аще священноинок со инокинею падется, да запретится лет девять, поклонов пятьсот на всяк день, и сухоядение, кроме субот и недель, аще ли сей великаго образа будет, да запретится лет дванадесять, и поклонов тысяща, на всяк день, и прочая вышьше написана. Священноинок опився и изблевав, да не литургисает лето едино, и поклонов триста на день творит, аще ли литургисав, от объядения изблюет, лета два да не причастится. Инок в баню отходя, и помазуяся помазанием, или на всяк день мыяся, разве точию за немощь. аще убо священник есть, да не литургисает лето едино, поклонов пятьсот, аще ли послушник есть, пол сих.

Вопрос. Имать ли власть духовник священноинок держати мирских прихожан. Ответ. Сие дело безчиния есть, яко же глаголют священная правила, ибо духовник должен есть сидети в своей келии, и правити си правило.

Аще ли обязуется сицевыми самовольно, кроме нужды учительства, и спасения ближняго, и паче же аще не повеленно ему на се от архиерея, сей несть духовник, но телесныи купец, корчемствуя благодать Святаго Духа.

Вопрос. Подобает ли священнику благословити женитву, или отроча крестити, или дати роженице молитву. Ответ. Священноиноку убо, аще и духовник есть, но не подобает благословити женитву, крестити же человека, яко иерей имать власть, невозбранибося в нужду, даже до сего токмо.

Вопрос. Коликих лет должен есть имети дети, хотяи быти духовник. Ответ. И сие святии отцы уставиша, аще есть добродетельныи, и тщателныи в духовных чинех, должен быти повышше четыридесяти лет, а ниже сих лет, аще видиши кого духовника, не имей его духовника, ниже дерзай ему что исповедати, ибо диявол в нем ликует, и уязвляется на всяк день, и не познавает, сокровищуя себе вечныи огнь, аще и скопец есть, но сердцем на всяк день блудит.

Вопрос. Аще достоит быти духовнику мирскому сущу священнику благоговейну старцу, имуще подружие. Ответ. Сие несть возбранено, аще токмо есть благоговейныи, и добродетельныи вельми, обаче зде со отлучением, возбрани сие, всесвятейшии наш владыка вселенскии патриарх, не менше быти, от прежде реченных лет.

Вопрос. Аще суть иноцы священницы неискусни слову, во еже приимати помышления, друзии же несуще священницы, знают сей искус, достоит ли сицевым помышления приимати неких, или ни. Ответ. Иже помышления приемлют, врачев искусных чин содержат, знающих на недужных подобная наводити былия. Аще убо кто есть священник, неискусен же, а другии несвященник, искус же имея духовнаго деяния, сему паче священника, праведно есть помышления приимати, и правильно исправляти, обаче иже не суть священницы иноцы, паче же неискуснии, приемлющии же неких помышления, и связующии и решающии, да знают, ибо не по правилом сие творят, и ни во что же есть, яко святии отцы ниже священником изволяют без повеления архиерейска примирити кающихся, яко же шестое, и четыредесять третие правило, иже в Карфагене собора изъясняет.

Вопрос. Достоит ли несвященному иноку, или освященному исповедания человеческая приимати самовольне, или ни. Ответ. Ко богопроповедником рече Господь апостолом, вы есте соль земли, и елика свяжете, и елика разрешите на земли, разрешена суть на небеси, тем же от божественых отец наших узаконися, даже исповедающимся примирителе бывают епископы, приемшии апостольское место от Бога, освященныи же инок. множае паче несвященныи, чрез волю епископскую Богови примирити не может исповедающагося, елицы убо суть освященнии, по повелению епископа исповедания человеческая да приемлют, несвященному же иноку, наказание его искусства, дает власть примирения, аще убо себе самого безбедно соблюдает, и исповедающихся, Богови да примиряет. Зерцало духовнику, из Номоканона есть от правил Иванна Постника. Подобает же убо приемлющему исповедания, смотряти и юность и силы старости, и места различие, и нрава им же лукавое содеяся, и аще с советом и предумышленне, или случаем бысть. и аще от вина, или от сытости, или инако, но или страхом или нуждею, или нищетою, и прочая сим подобная, послушаяи исповедания, должен есть испытовати и час и место и житие, и мудрость, такожде и сокрушение, и срам и печаль, и страх, и веры благопостояние, или непостояние, и милосердие, такожде и наказанна и невежу, богатаго и нищаго, раба и свободнаго, благороднаго и безродна, и воина, и иже священное восприят одеяние, и иже в сих объумирает. такожде и презирателя, и безстуднаго могущаго смиритися, сия вся истязовати должен есть послушаяи исповедания, и сице казни, сиречь епитемии налагати.

О иноцех от собора второперваго, правило второе.

Понеже нецыи иноческим житием облещися образуются, да не Богови чисто работают, но да честностию образа одеявшеся, славу наследствуют, да самовольне своих отсюду сластей обрящут восприятие, власом бо точию отложение сотворше во своих домех приседят, ни едино же иноческое исполняюще последование или устроение, повеле святыи собор, никому же во иноческии образ достойну быти одеятися, кроме старца в послушание его приемлющаго, и спасти его могущаго, за еже яко во игралище, в такии святыи и ангельскии образ облечется, сицевии убо да будут правилы мучимы, запрещеньми довольными аки хульницы имени Божия.

Во святыи убо и ангельскии образ одеявшиися, и в монастырех живущии, под руку Божию первее, таже игуменску, ни словом имут именовати, твое или сего, или оного, аще бо и пятьтысящь суще мужие мирстии, яко же написано есть в Деянии святых апостол, и никто же от имении своих глаголаше что свое быти, но бяху им вся обща, кольми паче во общине живущии, не суть должни имети своя вещи, и особная попечения неполезная и вредная, ниже да будет посреде их, мое и твое, или сего, или оного, идеже бо суть от плевелосеятеля диявола, во обще житиих возрастаемыи пекул, несть лепо нарицатися общая жития, но разбойническая сонмища, святотатству, и всякой злобе, и лукавству делателища, сего бо ради нарицаются общая жития, да вся обща имут, и да по повелению, по Бозе наставляющаго их повинуются, единем мудрованием покаряющеся тому, и послушающе во благое, и тако достойно живуще, обрящут упокоение и спасение вечное.

Ведомо же буди, яко от игумена яко же иная вся благая, сице и обще житие начинатися имать. той бо прежде и имение свое и волю свою отложити должен, да братию в тожде повинен, аще бо будет свет тма, то тма кольми.

Аще кии инок без повеления игумена своего, сотворит что от нуждных, не к пользе, но к своей его страсти, должен есть игумен испалити то, и тако благословити брата, да начнет другое дело, сие же сотворит, аще тем пользовати брата, аще же ни, жестосердие разсуждением да мерится. Аще кии инок без вины благословныя и разсудныя прекословит игумену своему, да отлучится от обители, аще и вельми есть разумен, отгоним есть отнюд, яко же красту имущая во скотех, едина, от сих отгонима есть, да не окраставеет все стадо, аще бо старейшии суть прекословцы, преслушателие, како послушанию, и смирению, и терпению, научат новоначальных.

Аще кии инок вземся на игумена своего, и досадит ему, да запретится лето едино, и поклонов тысящу на всяк день да творит.

Аще кии инок в руку свою взем древо, и уязвит игумена своего, да отсечется рука его, понеже отцеубиица бысть.

Аще кии инок в коем любо словеси ко спасению его изглаголанном прекословит игумену своему, и противится ему, яко соперник Божии обретается, и да уцеломудрится от общаго совета запрещенми.

Аще кто от инок идет в некии путь без повеления игумена своего, да отлучится братства, седмицу едину, творя поклонов тысящу.

Аще кто от инок тайно яст, кроме братства, да отлучится две седмицы, творя поклонов 1000 и пятьсот.

Инок ядыи от плода новаго без благословения игуменска, да отлучится днии осмь.

Аще кто от инок оглаголует и клевещет старейшаго, несть далече гнева Божия, сицевыи да отлучится месяц шесть, творя поклонов две тысящи.

Аще кто от инок обличает, и потязает игумена своего пред миряны, аще и истинна суть глаголемая от него, и той и верующии ему, с ним погибль наследят, покаявжеся, да запретится лето едино, и поклонов тысяща, и осмь сот творит, пред собором бо братии, аще нань что имать должен есть глаголати.

Аще игумен имать советы с женами, или с детьми, да престанет начальства.

Сие святителем и игуменом должно есть исполняти ко всем еже учити братию по правилу Великаго Василия, глава 50.

Аще игумен не прилежно учит люди своя, сиречь, уверенную ему паству, и не творит со опасением по правилу, но предания неполезная и суетная, и самохотение дарует прежде бывшим, и овех убо любит, овех же ненавидит, инех же ни любит, ни ненавидит, а других паче любит, да весть яко за сие на [?] равенство, далече есть любве Божия, сицевыи да оставит власть, и последних достоинство да имать.

Инок аще ударив с яростию якова любо животное, или разбиет, да отлучится, три месяца, и поклонов триста [и пса не бити с яростию, аще животное не бити кольми паче человека].

Аще ли в руку взем древо, окровавит и, шесть месецев, да запретится, и поклонов тысяща на день.

Аще кии инок потязует иного инока, в коей любо главизне, или клевету нань изречет, и посмеяние, имать запрещение, пятьдесят дний, и поклонов сто на день.

Имеяй ненависть на кого, в дом молитвы да не входит, донеле же примирение сотворит, да сотворят же оба, и поклонов пятьдесят.

Аще кии инок спутьшествует жене, поприще едино, да отлучится едину седмицу, на всяк день творя поклонов сто.

Инок соблудив, без причастия да будет, лет 7, творя всегда, поклонов триста, окроме епитемии.

Аще кии инок пляшет, или корчемная поет, или бесовьская творит вся, яже юнии творят, да отлучится три лета, на всяк день поклонов тысяща.

Инок играяи в гусли, и с миряны часто сообщаяся, а не с подобными себе, да отлучится два месяца, творя поклонов, сто и пятьдесят.

Инок сокровищуяи и в росты дая сия, или престанет, или да отлучится покаявжеся, да запретится лето едино, поклонов сто и пятьдесят.

Аще кто от инок куплю деет, или да престанет, или да лишится образа.

Аще кии послушник особь имать вещь, кроме воли игумена своего, да отлучится лето едино, и поклонов две тысящи.

Инок аще сокровенно что имать во общем житии, да отлучится дондеже покается, такожде игумен, имеяи что особное, да запретится.

Аще кии инок имея сребреники, и не исповесть я при смерти своей, должен есть игумен расточити их над ним, глаголя сице, сребро твое с тобою в погибель да будет, и тако без пения погребут и, да молитжеся о нем игумен с братиями дний 40, творяще на всяк день поклонов 40, и минувшим четыредесятним днем, начнут пети над ним уставленыя помины, и погребения, а яже утаеная от него вся, требующим и нищим да разделяется.

Аще кии инок лишится собора святыя литургия, да сотворит поклонов, 200, исповедаяся греха сего, зане смертен есть, паче же, аще в неделю и святыя дни, лишится кто небрежением литургии.

Лишивыися вечерни, и павечерницы, да сотворит поклонов, 150. Лишивыися полунощницы, да сотворит поклонов, 100. Лишивыися утрени, да сотворит поклонов двесте.

Аще кии брат укоризну приим от брата, и молен быв от дружины си, и не простит согрешившему, да отлучится седмицу едину.

Инок аще имать вещи, и любит я, да отвержет от себе, ибо пакостит души его.

Аще кии брат буесловит, и безчествует братию, и миряны рогалюет, поклонов 100, еще же должен есть пред ими же оболга и оклевета, славу и честь благую воздати, глаголя, яко он сицу оклеветах и ложь рекох, но он честен, праведен и свят есть, по святому Златоустому и Отечьнику.

Аще кии инок речет, яко имам род, да отлучится днии осмь, поклонов всегда, 40, отнелиже бо пострижеся, и обещася Богу, рода не имать.

Инок на блуде ят быв, или на брако общению, супружества видом си, блудодеющих запрещению подлежит, сиречь, лет, седмь.

Аще инок будет мужеложник, имать лет шестьнадесять, творя, всегда поклонов шесть сот.

Инок имея великии образ, аще соблудит да запретится лет, пять надесять, сухоядыи всегда хлеб с водою, плачася и рыдая, творя поклонов сто шестьдесят, кроме канона своего.

Инок великаго образа, аще биет кого верна, или неверна, да сотворит поклонов триста.

Аще кии инок пиет вино чрез силу, болие ему мясо ясти, а не упиватися вином, в нем же есть блуд.

Инок аще упиется или оклеветает, или без страха смеется, или от чревообъядения изблюет, да запретится яко же выше.

Крадыи, иже вверенныя ему службы, конечнее да возвратит, и отдаст под анафемою, а зане украде запрещается лето едино и поклоны, аще же церковное украде или присвоив или даде кому, вящьшему запрещению подлежит, чти канон, 10, первовтораго собора, и апостол, 25. священныи же да извержется.

Инок аще лобжет якову любо жену, или отроча спящее, да сотворит поклонов пятьсот, негли рещи, яко ниже в светлую неделю достоит иноку, ниже матерь свою лобзати, а сотворивыи сие имать поклонов триста.

Аще кии инок сотворит без причастия божественных таин быти днии четыридесять, кроме вины, да запретится лето едино.

Аще кии инок уснет без молитвы игуменовы, да сотворит поклонов пятьсот.

Иноку не достоит да власы его прост мирянин стрижет, но освящен кто или инок.

Аще кто презвитер, или диякон, или инок, ведыи писания, а пренебрежет си утреню, или часы и вечерню, аще и в пути сыи, но пекиися о житейских, свое правило презирает, да имать запрещения лета два, простыи же да сотворит поклонов осмь сот.

Иже не извещает деяния, и помыслы своя духовному си отцу на всяку седмицу, да запретится днии пятьнадесят, иерей же прежде литургии неисповедаяся тому же подобне да запретится.

О устроении трапезы прежде причаститися коей любо святыни да потом ясти.

Не приноси брашна во уста своя, о иноче прежде даже не пожреши, ниже беседуй, сущу брашну во устех твоих, ибо ядыи в трапезе, и глаголяи что, кроме Исусовы молитвы, юже заповедахом глаголати, подобен есть псом ядущим, и свиниям, и коткам.

Но сие есть устроению иноческому лепо, еже благодарити прежде ястия и послежде, такожде беседовати нимало что, но спасительная и полезная, и да не возрадуется враг о безчинии нашем, паче же да возрадуется, иже обретающеися с нами ангели, о них же и повесть сия прилично зде прилагается [Патерик, слово 16].

Глаголаше убо некии старец, яко седящим единою с старцем, и глаголющим о пользе, бе некто мних прозорливыи, и видяше ангелы помогающия им и хвалящя я. егда же прихождаше иная беседа, отхождаху ангели, и каляхуся свиния посреде их полныя смрада, и оскверняху я, егда же паки глаголаху о пользе, прихождаху ангели и прославляху я.

О святей и великой, 40-це, и о всякой среде, и пятке

[ выш. прав. 98. святых апостол прав. 69 ].

Аще кто епископ, или священник, или диякон, или поддиякон, или чтец, или певец, не постится великую 40-ницу и дни страстей, и всяку среду, и пяток, да извержется, аще ли мирянин да отлучится, но точию за немощь телесную да пощадится.

От Зонарева толкования.

Всяцем образом сие правило ищет, да вернии святую 40-ницу, и дни страстей, среды и пятки, во всех седмицах, во всем годище, кроме светлыя недели, и всех всеедных недель, в посте пребывают, разве кто за телесную немошь поститися не может, ибо за смирение плоти, пост умышлен бысть, аще же недугом, или немощию, соодолевается плоть, еже от поста смирение оное несть нуждно, а правила сего не хранящих, освященных убо изврещи повелевает, простых же отлучает, сиречь, от причастия на время.

Ведомо же буди, яко в равном чину полагает правило, святую 40-ницу, и всяку среду и пяток. Разрешаяи же среды, или пятка пост, кроме немощи телесныя, и праздников, приимет месть, иже апостольское шестьдесят девятое истязует правило, но иже немощи ради понуждени, оливою и рыбами тело успокоити возмогут, мяса же и сыра и масла кравияго, ниже коснутися есть прощено, в великую 40-цу, аще и конечне умрети хощет.

Такожде ниже в среду, или в пяток, ибо егда разрешаем за еже несмешатися со инославными, единомудрствовати, вкушающе мяса и сыра, зазор отражаем, и наипаче аще с таковыми случится жительствовати, да не убо изветом сим чреву угаждаем.

В постных днех, о девятом часе по обычных молитвах, точию хлебом и водою, и зелием, и смокви, и финики, потребу исполняем телесную, аще кая сему не стужит немощь.

Толкование.

Смотри зде опасно, что святых апостол правило глаголет, аще бо не за немощь телесную возбранится кто, поститися должен: но понеже нецыи немощи разум, зле приемлюще, и равносущею и несущею немощию, разсуждающе вину, за уповаемую немощь, от самолюбия бо водими, не хощут покоритися апостольскому правилу, непомышляюще вины о гресех.

Приведем же мало что, и мы по вместному о сем, и изъясним на пользу чтущих.

Немощь веждь сие божественое правило глаголати, яже тело преклонитися устрояет, и все совершеное недвижение, тому подает, а не за уповаемую немощь ему заповеда.

Ложен сии извет есть и вина, стомах болит ми. Слезень студенеет, нозе не стоят просто. Руце недобре суть, уши звенят. Глава горит с болезнию. и недуг мя лют сих ради ожидает, и о сих попечение противное. Владычнему повелению не пещибося о утреней повелени быхом, но насущнаго хлеба дневнаго просити, здравия дар свышьше есть, и живота соблюдение и даяние, и смотри наведение. Аще ли же сопротив речет кто, како Тимофееви Павел, вина мало пити повеле, стомаха ради его и частых недуг да знает сицевыи, яко неведения есть полн сыи, буди первее ты яко же Тимофей, и тако пии и ты вино яко же и он, изсушися от частых, постися прежде крепце, и воду пии леты многими, и прочая труды Тимофеевы покажи, умертви си тело, и тогда пии вино в меру, но и то убо не в постныя дни, несть бо явлено, аще Тимофей в тех вино пияше, но в прочая за укрепление плоти, да может многочеловечныя грады учити, и приводити к Богу живу и истинну.

Великаго Афанасия. Среды и пятка час поста учинен есть, даже до девятаго часа, излишнее же аще сотвориши, сие на твоем изволении, аще ли и приложение возможеши сотворити, и в том доблествене обучися. Такожде от счинения. Не приступай поста Господня, сиречь среды и пятка, аще не некиим недугом отягчен еси, кроме самыя Пятьдесятницы, и Богоявления четыридесятницу же и святую седмицу страстей Христовых сохранено соблюди.

Разрешай посты, егда брат к тебе придет, посты же соборныя, сиречь, среды и пятки, и великия 40-ца, не разрешай, но иже от своего произволения, сиречь понедельник, вторник, и четверток.

Никифора патриарха.

Аще навечерие коего любо Владычняго праздника, в среду или в пяток случится, не достоит разрешати поста в вечер, ради утрешняго праздника.

Вопрос. Не достоит ли разрешити среду и пяток, ради памяти святаго великаго, или апостола. Ответ. Отвеща собор, никакоже. небо сию и сию рекоша апостоли, но просто всякую среду и пяток.

Обаче настоятеля в том разсуждение да держится, праведнику бо закон не лежит.

Ельма же в памяти святых, и Господьских праздник, паче же в няже бдения бывают, достоит нам разрешати пост среды и пятка. Глаголет Великии Григории, еллинския быти со пресыщением, и вино питием праздники. А отец наш Иоанн Лествичник показует не творити извета чревообъядению, праздники.

Глаголет и Лаодикийскаго собора правило, не достоит иноку разрешати поста во все лето, кроме субот и недель, в тыя бо достоит и варение ясти, и порано разрешати, и не ожидати девятаго часа, и просто вси отцы повелевают согласно, яко подобает иноку все лето поститися, до часа 9-го кроме субот и недель.

Аще кто Бога ради, произволит воздержатися от вина, или сыра, или иного чесого, невозбраняется от отец, токмо особночиние, яко мнению подательно. А со советом воздержаяися, и сокрушением сердца, и многим смирением, не точию да не возбраняется, но и да поработитится на овощие, или ин вид обилующ. Глаголет бо Великии Антонии, послушание с воздержанием, покаряет и зверя. Изряднее же всяк спастися хотяи, всяку среду и пяток всего лета, по 69-му правилу святых апостол, сухоядением, и водопитием, должен есть совершати, аще ли кто не может, за немощь телесную, да разрешает на вино точию, и то с сокрушением сердца, удаляяся всячески рыбы и масла, храняижеся и вина, яко заповеди исполнитель, мзду обрящет.

О Господьских праздницех, в среду, или в пятки.

Аще Господьскии праздник случится в среду, или в пяток разреши на рыбы, и оливу сиречь квас. Аще ли праздник святых апостол, единаго от дванадесяти, на вино и оливу разреши, в прочия же памяти празднуемых святых на вино точию разреши, тако бо изобразиша божественнии отцы, разсуждению же искуснаго настоятеля не прекословь.

О понедельнике.

В понедельник же, миряне от мяса, иноцы же от сыра, и яиц и рыб, да воздерржатся, аще ли и больше может кто, оста на еговем произволении.

О великой четыридесятницы.

В великую же 40-ницу, должен есть всяк християнин понуждатися, и опаство велие имети, яко десятину Богу всего лета приносяи, и очищение грехов исполняяи.

О первой седмицы, 40-ницы.

В первую седмицу, обычно есть всем тщащимся о своем спасении, ясти в среду и пяток, тонкую пищу, аще ли кто за недуг не может, да вкушает на всяк вечер первыя седмицы хлеба мало и воды, негде и суровое зелие, или моченое сочиво, обаче воздержательне, со страхом и сокрушением сердца, аще ли и юху без оливы, во вторник и в четверток, сотворит за немощь, и сие беспорочно есть. В суботу же и в неделю всея четыридесятницы, разрешаем на оливу и вино, на рыбы же, точию в праздник Благовещения, и в неделю Цветоносия, яко же речеся выше, правило, 221. по первой же седмицы, ямы на всяк день сухоядение.

О великой седмицы.

Великую седмицу, яко Господня спасительныя страсти обносящую, достоит хранити паче иных, в великии же четверток, труда ради божественныя литургии, разрешаем на масло и вино, в великии же пяток, по силе да понуждаются вси боголюбцы и постнии пребывати даже до совершения божественныя литургии в великую суботу. аще ли кто не возможет за немощь, или за старость, в вечер великаго пятка, да снесть мало хлеба с водою, и сице убо о велицей четыридесятницы.

О посте Христова Рожества.

Прежде же Рожества Христова святыи пост, в суботу и в неделю точию разрешаем на рыбу, а во вторник и четверток, на масло и вино, в понедельник, в среду и в пяток, пост до 9-го часа, аще ли не может кто воду пити в понедельник, да разрешает на масло и вино, среда же и пяток хранити по силе, кроме великаго и тяжкаго недуга.

О посте святых апостол, и Пресвятыя Богородицы.

О посте святых апостол, и Богородицы, той же устав да есть; аще ли же многажды знойнаго ради времене не может кто довершити девятаго часа в среду и пятки, поне да хранится еже не многоразличная да яст, но худую да представляет трапезу.

О чаровницех.

Иже чародействуют, в дванадесятодневном времени с приемлющими сих чарования, и со глаголющими яко истинна суть, анафема да будет, сия бо вся идолослужение есть, аще ли покается, да запретится два лета.

Вопрос. Аще ли суть жены глаголемыя гилуди сиречь ведьмы, и ссысающе кровь из детей, и умерщвляют их. Ответ. Сия есть диявольская прелесть, и отнюд не приемлите сего. Бог бо мертвит и живит, а бесове ниже в свиниях неймут власти, яко же убо прельщает в мертвецех, их же глаголют преисподники, сице и зде, воздвиже неких злая помышляя непщевати о человецех, тем же по силе возбраняй глаголющим что таково, занеже и Великии Никифор, Исповедник патриарх Цареградскии, вельми запрети верующим в сия, причетники убо низлагает, людяны же отлучает.

А иже како видят нецыи мечты на пути, сие бывает от бесов, попущением Божиим, ибо человецы вместо благих, и добрых словес сквозе язык произносят диявола, и понеже того присно призывают, приходит к ним усердно отступившу Богу [Бог того отступает кто бесом или дияволом человека называет].

Вопрос. Аще обрящется мертвец, глаголемыи у нас преисподник, что годе быти. Ответ. Несть сие несть, диявол бо хотя прельстити неких, еже сотворити нечто нелепо, и во искушение и гнев Божии, творит сицевая ложная знамения.

Множицею бо и в нощи привидится некиим, аки идет некто, его же видяху прежде, и беседует с ними, есть же тогда, и прорицает нечто.

Иногда мнится виден быти на пути, или стоя, или ходя, иже умерл прежде времени, подвизает же живых, да прокопывают гроб, и видят мощи, и понеже совершенныя неймут веры к Богу, преобразуется диявол, и облачится в мертвое тело, и многовременен мнится быти мертвыи, и плоть имети, и кровь и нокти, отсюду окаяннии, на огнь устремляют, и собравше древеса, сожигают мощи, и потребляют я огнем, себе же соблюдают во огнь вечныи, да сожжени будут, яко же и тии сожгоша онаго мощи.

И мощи убо единою сожжени и истреблени ныне, востанут паки в день воскресения, и сопротив отвещают сим, пред страшным Судиею, они же послани будут в огнь вечныи, безконечно мучащеся, аще не покаются присно, о них же согрешиша. Сего ради и божественнии отцы, шестолетному запрещению предаша, сицевое беззаконие творящих мирян, священники же отнюд повелеша изврещи.

Обычай есть нечестому бесу, многия мечты творити во еже прельстити человеки, и сицевыи бес подобен есть пчеле. Яко же пчела обретши улии тощь без прилежания, многажды вселяется тамо, сице и бес, тело обрет тщее, и не прилежное, входит в не, и творит мечты, и прельщает человеки.

Подобает убо, егда обрящется таковыи бес призвати священники, да сотворят молебен Богородице, и освящение воде, таже да литургисают, и да поют трисвятое в помощь всем, да сотворят и помин с коливы. Посем запрещения две от крещения да прочтут, и святою водою да кропят люди прилучившияся тамо, и излишнее излияти на мощи, и благодатию Христовою, отбегнет бес оттуду.

Тако бо и святыи Макарии молитвою исцели жену, претвореную в кобылу, волшебною хитростию.

О немилости старейших церковных.

Святых апостол правило, 59, не подающа епископа, или презвитера, от церковных имений причетнику нищу, но презирающа убожеством дручима, отлучену быти повелевает, пребывающа же в том, изметает яко брата убивша елико по нему, аще отнуду он промыслом божественнейшим, яже на пищу притяжа.

О мерилех сугубых, во предании.

Последует обычай миролюбцем, и сребролюбцем, скупо ценити пшеницу, и воду размешивати в вино, да погибельное соберут богатьство. Мы же убо от ветхаго и новаго писания соглядавше, завещаваем всякому благочестно жити хотящему, внимати себе, о сицевом безместии.

Аще бо имуще меры сугубыя, сиречь великую и малую, великою убо купуют, малою же продают, повелеваем отврещи таковых от среды християн, и прокляти, по рекшему. Скупо ценяи пшеницу, от народа проклят. Аще же престанут сицеваго недуга, и покаются да запретятся лета 4, сухоядением с поклоны, такожде и на лихву дающии сребро свое, понеже бо богатым сребро дарует Бог, нищих ради, сего ради лишающии сих, и не дающии нищим, яко убиицы осудятся.

Да будет же разумно, яко несть леть, не точию иереом, но ниже архиепископом, и епископом противу каноном что дерзати, творити же и разрешати, во уверение же сего от блаженнаго Феодора Валсамона патриарха Антиохийскаго, от толкования его.

На правило 32-е, Карфагенскаго собора полагаю сия. Пишет рече святыи Игнатии, иже глаголет паче еже узаконена суть, аще бы был и верныи, аще бы и постился, аще бы и девственик был, аще бы и знамения творил, аще бы и пророчествовал, волк тебе да мнится быти в кожи овчей, убийство овцам содеваяи.

И великий Федор Студит глаголет. Власть предстателем ни в чим же дается, по преступлению правила, разве токмо да прилежат тем яже узаконена суть, и последуют яже преидоша, и да связуют и разрешают не неразмыслено, но яко же мнится истинне, и канону и правилу высочайшаго закона, слово бо Господне не имать привязоватися, к сему приложити и вняти казнение оного архиепископа иже воина чрез правила разреши.

О устроении пения вкратце главизны от правил соборных, и некиих святых, собора шестаго, еже в Трулле, правило, 75, ищи в Матфее.

Еже пети в церковь приходящии хощем, да ниже вискание безчинное творят, и естество на вопль понуждают ниже что приглаголют, от иже неприличных церкви и не своих, но со многим вниманием, и умилением псалмопение приносят, сокровенных видцу Богу, ибо благоговейны быти сыны Израилевы, священное научи слово.

От Валсамона, и от Зонарева. толкование.

Божия церкви, домове молитвам глаголются, тем же и молящиися, молити Бога должни суть со слезами и смирением, но не бесчинным, и безстудным образом.

Уставиша убо отцы, да не поются священная пения и псалмы, вищанми безчинными, и пиянственными, и естеству нужду приносящими. Ниже некими доброгласии неприличными, церковному составлению и последованию. якова же суть мусикийская пения, и излишняя различия гласовом [италийских разносогласии любителю внимай], но со многим умилением, и нравы благочестными и святыми приносити Богу молитвы, ведущему тайная сердец наших.

Сия же повелеша, последованне евангельскому речению заповедавшему.

Яко не подобает нам якоже язычником молитися, с лишесловием и воплем, яко мнящимся нам услышаном быти, за многоглаголание наше, но в тайне приносити песнь Богу, творити же и прошения подобне, да и Отец наш небесныи видя в тайне, воздаст нам яве, ельма же рече, и Моисейскии закон глаголет, в Леввитице, яко благоговейны быти имут сыны Израилевы.

Мы же такожде иже закона сего прияхом кончину, должни есмы благоговейнейши быти, и по узаконеному жительствовати.

Прочти еже в Маргарите слово, святаго отца нашего Иоанна Златоустаго, написанное, на истолкование речения пророческаго глаголющаго.

Видех Господа седяща на престоле высоце, и превознесенне. ибо возбраняет скиническая песнопения, и плясания руководящих, и презельныя возгласы. Ведомо ти буди и сие правило, како возбраняет органы, и прегудныя пения, и песни блудническия, во псалмопениих ухищряемыя.

Такожде и глаголемая, усугубления, и безстудное сих бываемое пренебрежение. Поющии, висканми безчинными, и подобная презревшее, то со многим вниманием, и умилением да поют, аще ли же ни да запретятся. еже пети тропари, и каноны мирским священником, и прочим миряном прилично, иноком же, особь вне собора и на уединении, или в пустыни живущим, неполезно есть се, многажды же и виновно и на вред им бывает. Яко же рыбарь, удицею, и червием ловит рыбы, сице и диявол сими тропарями, и песньми, на тщеславие, и сластолюбие, и человекоугодие, воздвизает инока. Песни многих в преисподняя земли низведоша, не точию мирян, но и священников, иже умягчивше себе удобне в блуд, и во иныя многия скверныя страсти низвергошася [святаго Силуяна], песнь, убо мирским есть, да людие собираются в церковь. Да не убо согласом вопиения молитву творим, но со усердием сердца, ниже в показание, но со всякою кротостию, и вниманием ума, тако бо и Моисей с молчанием моляся, услышан бысть. Веждь же о сем, яко зде песни егда воспоминает, не самыя умны богодохновенныя уничижает и отвергает, понеже в творцех. Песней, и гласов церковных Дух Святыи сам действоваше, но нравы петия, и поющих, зане петия убо от некоих бывают с воплем, со движением всея плоти, помаванием главы, плесканием рук, попиранием ног, не суть се пения, но безчиния, поющии же глас или отончевают, и возносят или одебелевают, или велии вопль испущают, се же да лучши инех явятся, и человекоугодие и тщеславие исполнят, сицевая пения от церкви суть далече, и сице поющии правильно да запрещаються.

Дар всякому духовнику.

Виждь всякии духовниче, яко егда послушаеши исповеди кающагося, осмь облежащих грехов истязовати должен еси.

1. Кто есть согрешивыи, си есть коего жительства, коликих лет, коея мудрости, коего чина и достоиньства, елико бо степень высочайшии, толико есть падежь страшнейшии, и неблагодарство вящьшее, такожде лета зрительна суть, абие егда человек отрок начинает разумети, совесть его исправляти подобает.

2. Что согреши. Аще злое заповеданное, или злое от рода своего, аще грех смертныи, аще повседневныи: о смертных бо гресех наипаче исповедатися подобает, о них же вышше.

3. Где согреши. Аще на месте святом, или простом, и прочее.

4. Коими согреши. Си есть аще исповедаяся иных привлече словом, или образом злаго жития ко греху, или мздою приведе. сие бо есть дело диявольское, иже бо соблазнит единаго от малейших, уне ему было жернов камень. и прочее, яко же рече Христос, Матф., 18.

5. Коль краты согреши, аще обыкл есть к греху, или ни, обычай бо лукавыи не облегчает греха, но паче обтягчавает, и сего ради кождо число грехов своих, должен есть исповедати.

6. Почто согреши. Сие есть аще от немощи, аще от страсти, аще от неведения, или паки от избрания и совершеннаго произволения, нежели инако исполнися.

7. Како согреши, аще по естеству, или противу, уби кого кто, аще древом аще мечем, нравом коим грех содеяся исповедати должен есть.

8. Когда согреши, си есть аще в пост, или иногды, аще в день делательныи, или в праздньственныи, аще во дни или в нощи; аще в той час егда друзии в церкви бяху и прочее, сие бо облегчает, и обтягчавает грех.

Сия вся со опасением испытай, да ни сам преткнешися, ни исповедающагося соблазниши, или погубиши.

От книги сведительныя ко архиерею, о хотящем прияти священьства степень.

Священная добре уставившии, богопроповедницы апостоли, и с ними священное сословие богоносных отец, повелеша и заповедаша, да никто же без истязания, на степень священьства восходит, да не деются божественная несвященне, сего ради и сей по духу сын мой, имярек, пришедыи к моей худости, его же поставих пред икону Владыки Христа, и Пресвятыя Богородицы, и воспомянух ему страшное судище Христово, да чистым исповеданием исповесться прежних своих согрешении, яже яко человек согреши в животе сем, и испытав опасно глубину сердца его, и обретох и достойна священьству, и свидетельствую его, достойна сему быти, в славу Отца и Сына и Святаго Духа, аминь.

Молитва,

юже дают епископи духовным отцем, да приемлют человеков на испытание.

Не нашли, что искали? Воспользуйтесь поиском: