НАМАЗНЫҢ МӘКРУҺЛАРЫ

113. Намазда мәкруһ булган эшләрнең мәшһүрләре илле:
1) үз ихтыярың белән намазда сөннәт булган бер гамәлне үтәмәү (ваҗиб гамәлне үтәмәү – хәрам, фарызны үтәми калдыру намазны боза);
2) намазда тәкәбберлек кыяфәте белән тору;
3) үз ихтыярың белән иснәү, йөткерү, тамак кыру;
4) сәбәпсез борын сеңгерү, төкерү, какыру, уфылдау һәм кикерү;
5) билгә таяну, гәүдәне бер тарафка авыштырып кыек тору, бер аякка салынып ял итү;
6) кул белән берәр нәрсә тотып тору, кулны я күлмәкне селкеп җилләнү;
7) бер кул белән башка бүрек я чалма кию, бүрекне салу (ике кул белән бер эшне кылу намазны боза);
8) сәҗдә урынындагы туфракны, йөздәге тирне яки тузанны сөртү (маңгайны селкеп, авырттырырлык ташлар булганда бер-ике мәртәбә сыпырырга ярый);
9) бер-ике мәртәбә бер үк җирне кашу (өч мәртәбә кашу намазны боза);
10) сәбәпсез намаз укый торган урыннан бер-ике адым читкә күчү (берьюлы өч адым атлау намазны боза);
11) теш арасыннан чыккан ризык валчыгын йоту (борчак зурлыгындагы валчык йоту намазны боза);
12) кыямга торып басканда җиргә (намазлыкка) яки берәр нәрсәгә таянып тору.
13) йөзне Кыйбладан авыштыру, югарыга таба карау;
14) рөкүгътә башны бик түбән иеп яки бик югары күтәреп тору;
15) сәҗдәдә аяк һәм кул бармакларын җирдән (намазлыктан) күтәрү;
16) сәҗдәдә беләкләрне җиргә я кабыргаларга, корсакны ботларга тидереп тору (сафта урын тыгыз булганда, бу эш мәкруһ түгел);
17) намазны яланбаш, җиңнәрне сызган килеш, күкрәкләр я аркалар ачык килеш уку;
18) киемне уртасыннан эләктермичә, җилләтеп, селкеп уку;
19) бүреккә я чалмага сәҗдә кылу (намаз укучы сәҗдә кылганда маңгае җиргә яисә намазлыкка тимәү);
20) чәчне төреп, бәйләгән килеш уку;
21) киемдә я намазлыкта яки әйләнә-тирәдә хайван сурәте булу (әгәр сурәт артта булса, яки чебен зурлыгы кадәр кечкенә булса, яки башы бозылган булса – зарары юк);
22) намазны яна торган зур утка каршы, башка кешенең йөзенә яки йөзе күренерлек көзгегә, нәҗес нәрсәгә, кабергә карап уку (шәм, яктырткыч һәм лампа кебек утларга каршы торып уку мәкруһ түгел);
23) алдагы сафта урын була торып, фарыз намазны арттагы сафта уку;
24) тәһарәте кысталган килеш намазга керешү;
25) намазны алъяпкыч кебек буялган кием белән уку;
26) кыямда ике үкчәне бер-берсенә дүрт бармак киңлегеннән якын китерү;
27) намазны бик ашыгып уку;
28) кагъдәдә куллар белән җиргә таянып тору;
29) кагъдәдә ике үкчә өстенә утыру;
30) кагъдәдә аякларны бөкләп утыру;
31) рөкүгъ һәм сәҗдәгә барганда киемне тоткалау;
32) тәкбир һәм зекерләрне яки сүрәләрне икешәр кат уку;
33) укыган зекерләрне бармак белән санау;

34) зекерләрне үз урыннарында укып бетермичә икенче урында уку;
35) бер сүрәне бер намазда ике мәртәбә уку;
36) соңгы рәкәгатьтә беренче рәкәгатьтә укылган сүрә алдындагы сүрәне уку;
37) икенче рәкәгатьтә беренче рәкәгатьтә укылган сүрәдән соң килгән сүрәне укымыйча, аннан соңгы сүрәне уку (әгәр арада ике сүрә калса мәкруһ түгел);
38) мәгънәсен уйлап, бер аятьне ике кат уку;
39) бер аятьнең мәгънәсен уйлап туктап тору;
40) дөнья эшләрен искә төшереп, елмаеп көлү, тавышсыз елау;
41) оючының намазның бер гамәлен имамнан алдарак башкаруы;
42) имамның оючылардан югарырак я түбәнрәк урында торып, яки михрабның эченә тәмам кереп укуы;
43) имамның намазны халык зарыгырлык кадәр озак укуы;
44) ир белән хатынның янәшә укуы;
45) тамак кырып я ухылдап авыздан бер-ике аваз тавыш чыгару;
46) намаз вакытында чалманы салу яки баштан төшкәч, аны алып кию;
47) намаз вакытында күңел белән бер нәрсәнең санын хисаплау яки намаз сүзләреннән башка нәрсәләрне уку;
48) намаз вакытында бармак белән ничә рәкәгать укыганны күрсәтә бару;
49) намаз вакытында баш я каш белән ишарә итеп яки тамак кырып яисә чырайны бозып, янындагы кешегә нәрсә дә булса аңлату;
50) ни рәвешле булса да, уйлаган рәвештә кылану.

НАМАЗНЫҢ МӨФСИДЛӘРЕ
(НАМАЗНЫ БОЗУЧЫ НӘРСӘЛӘР)

114. Намазны түбәндәге 20 төрле эш боза:
1) тамак кырып яки ухылдап авыздан өч авазлы тавыш чыгару;
2) мәгънәле бер сүз әйтү (намаздагы зекерләрдән башка);
3) бер кешегә сәлам бирү яки сәлам алу;
4) дөнья эшен сорап дога кылу;
5) дөнья эшен уйлап, тавыш чыгарып көлү;
6) дөнья эшен уйлап, тавыш чыгарып елау;
7) борчак зурлыгы кадәр берәр нәрсә йоту;
8) бер тамчы чамасы су йоту;
9) гадәттә, ике кул белән башкарыла торган берәр эш үтәү (мәсәлән, киемне кию яки салу, ниндидер зур нәрсәне күтәрү һ.б.);
10) бер эшне берьюлы өч мәртәбә башкару (мәсәлән, 3 мәртәбә битне сөртү, 3 мәртәбә бер җирне кашу, 3 мәртәбә мыекны төзәтү, 3 мәртәбә бармак шартлату, 3 мәртәбә төймәне эләктерү я ычкындыру, берьюлы 3 адым атлау, 3 мәртәбә бер нәрсәне чәйнәү, бер авазны 3 мәртәбә әйтү һ.б.);
11) сүрәләрне Коръәнгә карап уку;
12) коръән сүрәсенең мәгънәсен бозарлык итеп хата белән уку;
13) моктәдинең (имамга оючы) имамнан алдарак торуы;
14) җәмәгать намазында ир белән хатынның бер сафта булуы;
15) иртәнге намазны укыганда кояш чыга башлау;
16) гаурәтнең дүрттән бер өлеше ачылып китү;
17) намазда фарыз булган бер гамәлне үтәми калдыру;
18) күкрәкнең Кыйбла тарафыннан авышуы;
19) тәннең, киемнең я намазлыкның нәҗесләнүе;
20) үз ихтыяры белән тәһарәтне бозу.

Не нашли, что искали? Воспользуйтесь поиском: