ТОР 5 статей: Методические подходы к анализу финансового состояния предприятия Проблема периодизации русской литературы ХХ века. Краткая характеристика второй половины ХХ века Характеристика шлифовальных кругов и ее маркировка Служебные части речи. Предлог. Союз. Частицы КАТЕГОРИИ:
|
КУЫРЫХОНЫ ЗОНДАМЫНД 5 страницаФæуыдзæни? — зæгъ раст. 1984 азы 17 август НОДЖЫДÆР МА ХÆДОНЫ ГУЫРДÆН Хæдоны кæй райгуырдтæ, уымæй Цы схъал дæ, дæ хорзæхæй, цæй! Хæдон у хæдон, æмæ уымæй Æппæт буарæн бамбæрзæн нæй. 1984 азы 17 август ГАЛИУ Уæрсты ма дæ хорздзинæдтæй хай фæци фæлхæрттæ, Уый тыххæй дæ се ’мгæрæтгы не ’руадздзысты лæгтæ... Зондджынтæ сæ фыдгултæй дæр аразынц æрдхæрдтæ, Аразыс ды та, гормон, дæ хæлæртгæй ызнæггæ. 1984 азы 30 август ФÆЗЗЫГОН БÆЛАС Ыскæны рæстæг халассæр кæстæры — Уæд чифæнды — кæсæд дзы мæйтæ, хуртæ... Кæддæр куыд фæзынд урсытæ мæ сæры, Фæзынд сыфтæ дæуыл та афтæ буртæ. 1984 азы 31 август ЗОНДДЖЫН ЛÆДЖЫ ЗАГЪДАУ Æрыхъусæггагæй Мæ фыдгой кæнын уыд йæ куыст, Йæ цъæлхъæр алы ранæй хъуыст. Ызнон та раппæлыд мæнæй: Кæмдæр фæрæдыдтæн, уæллæй. 1984 азы 5 сентябрь ÆЗДÆНОН Дæлджинæгмæ дæ кад фæхоныс, Мысты хуынкъæн фæфидыс туман... Дæхи уæлдæр æдзух фæхоныс, Кæй дæ дæлдæр æрмæстдæр уымæн... 1984 азы 6 сентябрь БОЦЪОТÆ Дзурынц мын адæм сæ фылдæр: «Боцъотæ зайы сæгъыл дæр», Фæлæ дзы иу уый æмбары, Боцъо æрмæст лæг кæй дары? 1984 азы 7 сентябрь КУЫРЫХОНЫ ЗОНДАМЫНД Клаудиусы мотив Уыдзынæ кадджын лæг нæ цæсты, Нæ хъæудзæн сомбоныл дæу мæт, Цы зоныс, уый дзурыны бæсты, Цы дзурыс, уый куы зонай, уæд. 1984 азы 9 сентябрь СÆР — Мæлын дæ ныхæстæм фырмæстæй. Мæныл дæр — сæр. Нæ дæн ныхкъуырд. — Сæр ис зæгæлыл дæр, æрмæст æй Фæхъæуы дзæбугæй тыхкъуырд. 1984 азы 11 сентябрь ХЪАЛ СÆНЫКК Æмхуызонæй дын дзурынц цалæй! — Нæ коммæ кæсыс ды уæддæр. Кæныс, цы-иу кодта фырхъалæй, Фырхъалæй иу сæныкк кæддæр. 1984 азы 16 сентябрь ПЪÆНÆЗ Чи у хом, уый куры фых, Æдзæхх нæ фæдомы цæхх... Ратт ын харбызæн йæ сырх, Джитъырийæн та — йæ цъæх. 1984 азы 16 сентябрь ЦÆРЫНÆЙ ХÆРЫНМÆ Сократы мотив Алчи алкæмæн нæу къай, Цард у хъулæттæ, гæрæм... Ды цæрыс, цæмæй хæрай, Мах хæрæм, цæмæй цæрæм. 1984 азы 16 сентябрь ÆНÆРАСТДЗИНАД Йæ сагъæстæ, судзгæ тыхстытæ Къоста мыхуыр кодта зынæй, Дæуæн та дæ лæмæгъ фыстытæн Æппындæр цæлхдурлæууæг нæй. 1984 азы 17 сентябрь ЗОНÆМ Йæ фæндтæ йæ хъуыры лæгмарæн Кæй баддзысты, зонæм уый мах... Æгас цæуæд иугæнæг арæн, Дæлзæхх фæуæд дихгæнæг хахх! 1984 азы 18 сентябрь ФЫЛДÆР ÆМÆ КЪАДДÆР Иуæй фылдæр кæй у иу æмæ ’рдæг, Ууыл зæрдæбынæй цин кæны лæг, Фæлæ дыууæйæ кæй разыны къаддæр, Уый йын йæ цин кæны къахыр, æнад дæр. 1984 азы 20 сентябрь ÆВДДÆСАЗДЗЫД УАРЗОНДЗИНАД Мах ыстæм дыууæйæ дæр зæрдæрыст, Худын ныл нæ фидауы — кæуын... Ды æддæмæ рацæуын нæ уæндыс, Æз нæ уæндын мидæмæ цæуын. 1984 азы 22 сентябрь ИУДЗЫРД Ныхас кæд æххуыс у хъуыддагæн, Зæгъдзынæн уæд иу дзырд дæуæн: Æмдзæвгæ æмбисондæй ма кæн, Æмбисонд æмдзæвгæйæ кæн. 1984 азы 28 сентябрь МАРДЫ ФÆЗМÆГÆН Дæ ивгъуыд бонты хорз æмгар Куыд цыди, уый фæзмыс дзæвгар, Фæлæ куыд амарди уый, куыд, Уый раздæр афæзмын дæу хъуыд. 1984 азы 1 октябрь СЫКЪАТÆ Дæ митæй фæкæныс лæджы зæрдæ риссын, Вæййы дыл куы голлаг, вæййы дыл куы хъисын. Æвæдза, куы заид сыкъатæ æвзæрыл — Дæуæй дзы дынджырдæр нæ уаид æндæрыл. 1984 азы 1 октябрь ÆНКЪАРД ХЪУЫДЫ Ацы фæззыгон æнтъыснæг изæрты Риумæ фæндæгтæ нывæнды æрхæндæг: Дуне батонын кæмæн уыд йæ зæрды, Уыдон дæр батыдта дуне йæхæдæг. 1984 азы 1 октябрь ДÆ ФÆНД Ацы дунейы æхцатæ Бахæрын уыди дæ фæнд, Фæлæ уыдонæн фыццагдæр Ды фæдæ дæхæдæг хæрд. 1984 азы 1 октябрь ÆНАХУЫР УАРЗОНДЗИНАД Дæ размæ куы бацæуын — лвдзыс мæ цурæй, Фæхъæбæрдæр вæййы тæргай зæрдæ дурæй, Мæхæдæг дæ цурæй куы ацæуын дарддæр — Дæ фæсмон нæ вæййы дæ тæргайæ къаддæр. 1984 азы 2 октябрь ЦÆХГÆР ДЗУАПП Хъæуы уый æмгæрттæй фæхъæуын, Цы лæппуйы хъару æгъдау дæттын нæу... Кæд дæ æз æвзæрæй нæ хъæуын, Уæд хъуамæ æз ма хъæуон хорзæй дæр дæу. 1984 азы 3 октябрь ÆППÆРЦЦÆГ ХЪÆБАТЫРТÆ ÆВДИСЫНУАРЗАГ ФЫССÆГÆН Ысты дæ хъæбатыртæ цъаммар — Кæйфæнды дзы ныггуыпп кæн, амар, Фæлæ сæ цъаммардæр дæхæдæг — Сæ рафæлдисæг уд, сæ фæтæг. 1984 азы 3 октябрь ТЫЗМÆГ ÆЦÆГДЗИНАД Мæ рæстдзинад зонын, нæй ууыл ныхас дæр Мæ ацы хъуыдымæ фæцыдтæн æз бонгай: Цы бынатмæ схызтæ, нæ уыдтæ уым раздæр, Цы ранæй ысхызтæ, уыдзынæ уым ногæй. 1984 азы 3 октябрь МÆРДХУЫССÆГ Дæхиау дæ искуы куы раппæлид исчи — Фæкæсид нæм, цыма дыл амонд ныйичъи, Фæлæ дæ дæхæдæг дæ кады кой мысæг, Дæ намыс дын уымæн æрцахста мæрдхуыссæг. 1984 азы 3 октябрь ЙÆ СÆРÆЙ ХЪАЗГÆ ЧИ ЦÆУЫ, УЫМÆН Царды цы уыдис æвзæрæй — Ссардта сæ цыфыддæр дæу... Чи цæуы хъазгæ йæ сæрæй, Уый сæр сæрмæ хæсгæ нæу. 1984 азы 4 октябрь НОДЖЫДÆР МА, ЙÆ СÆРÆЙ ХЪАЗГÆ ЧИ ЦÆУЫ, УЫМÆН Йæ сæрæй хъазгæ фæцæуы уынгты, Бæрзондмæ систа ныллæгæй рыгтæ, Уый хыгъд бæрзондæй йæ сæр ныллæгмæ Æрхауд. Цу агур цыт ахæм лæгмæ! 1984 азы 6 октябрь ЦАРДÆЙ ГЪÆПП ХАУÆГÆН «Дæ ахсæнæй хъуысы æппынæдзух зард», — Нæ зæгъын дæзæрдæ-мæзæрдæ... Дæ зæрдæйы хуызæи нын ма уæд дæ цард, Дæ царды хуызæн уæд дæ зæрдæ. 1984 азы 6 октябрь АРФÆЙЫДЗЫРД Ссыгъди Къостайы кад стъалыйау тары, Фехъуыста дуне йæ арфæйы дзырд. Раджы Уæлладжырæй амыдтой Нары, Нарæй Уæлладжыры амонынц ныр. 1984 азы 7 октябрь НЫМАЙДЖЫТÆ Æвæдза, кау кæм ысвæййы хæрзныллæг — Йæ цуры адæм — хизынмæ дзыгуыр... Йæхи æхца фæнымайы хъæздыг лæг, Кæйдæр æхца фæнымайы мæгуыр. 1984 азы 7 октябрь ЗОНД ÆМÆ ТЫХ Цалынмæ зæххыл цæрон — Хъусдзыстут мæнæй: Цонджы тыхæн ис кæрон, Зонды тыхæн — нæй. 1984 азы 8 октябрь ИУ ХЪУЫДДАГ Чи хъуыды кæны царды бæстон, Уымæй нæ вæййы иу хъуыддаг рох: Куыннæ фæллайы цæуынæй дон, Нæ фæллай’ афтæ лæууынæй хох. 1984 азы 16 октябрь БЕЦАУ Мæгуырæг, цæстытæй гæзæмæ куыд уыны, Йæ зонд дæр у афтæ мæгуырау, цыбыр: Ыстыр æм дæрддзæфмæ гыццыл дæр нæ зыны, Гыццыл æм хæстæгаæ фæзыны ыстыр. 1984 азы 16 октябрь СТАВДБÆРЗÆЙÆН Фыссæгæн æххуысæн Бæззы кæд бæрзæй, Уæд Иры дæу хуызæн Ыстыр фыссæг нæй. 1984 азы 16 октябрь ХÆРЗИУДЖЫТÆ ФÆЛГЪАУÆГ ФЫССÆГÆН Нæ дæ ды фæуынхъом хæрзиуæг, Дæсны дæ æрмæстдæр дзыхæй... Дæумæ æз нæ зонын хæрзиуæг, Кæцыйы нæ байстай тыхæй. 1984 азы 18 октябрь ДЫУУÆРДЫГÆЙ ГÆМÆХ Чи дæ нæ рахуыдта абонмæ сонт, Уымæн дæ саразын бахъæудзæн хуын... Ныронг дæ сæры куыннæ уыди зонд, Афтæ йыл нал и ныртæккæ та хъуын. 1984 азы 19 октябрь НÆ ХЪÆУЫ ЧЫЗДЖЫТÆ ÆМÆ ЧЫНДЗЫТÆ Бирæ хæрзæгъдау чызджытæ ис хъæуы, Никæмæ хæссæм нæ чындзытæй фау... Мидæмæ уадзын æвзæры нæ хъæуы, Ауадзæм хорзы æддæмæ фæлтау. 1984 азы 20 октябрь ÆГЪДАУЫЛ ХÆСТ АДÆМ Ис фыдтæй алкæмæн дæр хос, Æрмæст хъæуы йæ ыссарынæн сæр... Æддæмæ чи нæ уадзы хорз, Уый мидæмæ нæ бауадздзæн æвзæр. 1984 азы 20 октябрь КУЫВД Иу куывд уын зæгъын æз дæр, Хорз адæм — мæ уд, мæ зæрдæ: «Знонæй абон ут хуыздæр, Абон — райсомæй æвзæрдæр». 1984 азы 21 октябрь ÆМФАУД Æгад дæ хæдзары, куысты, Фæкæньгац дæ æмфауд. Дæ фыдгултау дæуæн ысты Дæ хæлæрттæ дæр цауд. 1984 азы 25 октябрь ЧИ ДÆ Нæй мын рæдийæн, ме ’вдисæн — зæхх, Зæххæн йæ сыджыт æмæ йæ кæрдæг: Чи у дæ фыдгул, уый-ма мын зæгъ, Æмæ зæгъдзынæн: чи дæ дæхæдæг. 1984 азы 29 октябрь РАД Нырма мæ рад у цин кæнын: цæрын, æнæниз дæн, Фæлæ æрлæудзæн иу заман — адзал ыссардзæн мæн, Уæд райдайдзæни цин кæнын мæ цыфыддæр фыдгул, Мæныл ныгуылдзæн хурзæрин, ыскæсдзæн ууыл хур. 1984 азы 31 октябрь ÆНАМОНД Омар Хайямы мотив Хуыцау, мæнæн хъысмæты ды равзæрстай фыстæн Фыдхъизæмар æвзарын, фæразын хъыг, рыстæн. Æз доны къусыл калын дæллаг галау мæ хид, Къæбæры фæдыл зилгæ хæтæгхуаг ысдæн. 1984 азы 1 ноябрь ХОРЗДЗИНАД Чехойты Сæрæбийы ныхæстæй Зындзырд æмæ зынвæдæн Лæгæн у масты хос... Кæд дын æвзæр нæ фæдæн, — Фæдæн дын уымæй хорз. 1984 азы 5 ноябрь ДЫМЫСДÆРТÆ Фæлæудзысты йын алкæцы ран хъузон, Æрмæст уæд хицау — ссардзысты йæм фæд. Цæмæн ысты дымыстæртæ æмхуызон? Æмхуызон ысты дымджытæ дæр кæд? 1984 азы 19 ноябрь АРТИСТ КÆМÆЙ НÆ РАУАД, ФÆЛÆ ЙÆХИЦÆЙ ФЫССÆГ ЧИ САРÆЗТА, УЫМÆН Дæуæн нæй ницæуыл тыхсæн, Дæ къæхтæй даргъдæр у дæ уат... Лæмæгъдæр зæрдæты æхсæн Ыссардтай фидардæр бынат. 1984 азы 24 ноябрь ÆРГОМ ÆМÆ СУСÆГÆЙ Бахæрис лæджы, æвæдза, хомæй — Фадат нæй — дæ мондæгтыл хæцыс. Æз дæ ныхмæ радзырдтон æргомæй, Ды мæ ныхмæ сусæгæй хæцыс. 1984 азы 5 декабрь ЦЫППУРС Сауæй кæд ыскæны урс, Уæд куыд рафауæм Цыппурс? Урсæй кæд нæ кæны сау, Уæд куыд хæссæм уымæ фау? 1985 азы 1 январь ÆВЗОНГДЗИНАД Дæ судзгæ цæстæнгас мын басгуыхти ронг. Кæддæрау мæ базыртæ систон бæрзонд... Мæнæй ды куыд сарæзтай ногæй æвзонг, Æвзонгæй мæ ма сараз афтæ зæронд. 1985 азы 9 январь АЦАЛ-АУАЛ АЗЫ Дæхицæй æвзæрдæр нæ разы Нæма ’рлæууыд ацауал азы. Кæй дæ ды дæ цауд митæй разы, Гъеуымæн дæ не стæм мах разы. 1985 азы 17 январь ЦИН Æртахти, æрбадти мæ уæхскыл бæлон. Тæхуды йæм кодтон æхсæв æмæ бон. Ирыстоны нал и мæхи хуызæн хъал: Рæсугъддæр чызгимæ ысхауди мæ хал. 1985 азы 17 январь КУЫД? Зондхъуаг кæй у, уый бамбæхсын Кæд йæ бон нæ уыд, Зондджын кæй у, уый равдисын Базондзæн уæд куыд? 1985 азы 27 январь ЙÆ ЧИНЫГ «РАЙСОМЫ МИГЪ» ЧИ СХУЫДТА, УЫЦЫ ФЫССÆГÆН Дæ «Райсомы мигъ» райсомæй изæрмæ Фæкастæн. Мигъ ма бадт бæзджын мæ сæрмæ, Дæ роман та æрбадæлдзæх, фæцыдæр, Хæрæ мигътæй йæ амбæхста кæцыдæр. 1985 азы 27 февраль КАР Мæхи мын нæй дæуимæ барæн, Цыфæнды дзур, цыфæнды фысс... Кæддæр уыдзынæ ды мæ карæн, Дæ карæн нал уыдзынæн æз. 1985 азы 25 мартъи ЛÆГ Дæ хуызæтгæн-иу кодтой хъæуы Гыццыл лæппутæ дæр «нæ-нæй!» Лæгæй лæг зæгъынæн лæг хъæуы, Дæумæ та уыцы ныфс дæр нæй. 1985 азы 25 мартъи СОМЫ Фыдгулы цонг æрцæуæд хауд, Нæ дæ кæд загъдкъахæг, ызмæнтæг!.. Дæуæй куы раппæлин, уæд фауд Æрцæуин дыккаг бон мæхæдæг. 1985 азы 25 мартъи БАРÆН Куыннæ разыны мах æхсæн дæр хин гуырдтæ! — Лæгдзинадæй сын нæй æппындæр барæн. Æнцонæй фыст кæй æрцæуынц дæ чингуытæ, Æнцонæй дæр сын уымæн ис ыссарæн. 1985 азы 30 мартъи НÆ ДАМГЪÆ, НÆ ДЗЫРД Фыдæлтæй нын баззад æмбисæндтæ цас! — «Ногъайагæн — дамгъæ, иронæн — ныхас». Дæу та, зæгъ, цы схонæм, кæцырдыгон гуырд, Кæмæ нæу нымады нæ дамгъæ, нæ дзырд? 1985 азы 3 апрель КÆНГÆ МИТÆ Дæ кæнгæ митæй фервæз, тæхуды, Цæттæйæ уымæ æдзух лæууын... Дæ кæуынмæ мæм фæцæуы худын, Дæ худынмæ мæм цæуы кæуын. 1985 азы 22 апрель ДУКАНИЙЫ ЧИ ÆРФЫСЫМ КОДТА, УЫЦЫ ЧИНЫГÆН Мацуал рауадзæд дæ уадзæг, Макуал дзы ыссæуæд сым, Кæд дæу рахуыдта уый «Уазæг», Фæлæ разындтæ фысым. 1985 азы 7 май АЗИМАГ Дæ митæй нывыл иу нæ хуыйны, Мæ хурхмæ ысвæййын дæ мастæй... Мæ дзыхы цы ацыди, уый мын Мæ фындзыхуынчъытæй ысластай. 1985 азы 9 май ДÆ САГЪÆС, МÆ МÆТ Нæ уавæртæм иу цæстæй ма кæс, Рæстдзинадыл дзурæг дæ кæд... Цы ныммыхуыр кæнай — дæ сагъæс, Кæм ныммыхуыр кæнон — мæ мæт. 1985 азы 11 май ЛЕНИН Ды байтыдтай нæртон мыггæгтæ мæры, Фæцыдысты цъæх æвзартæ бæрзонд... Æппæт зæххы зонд бацыди дæ сæры, Æппæт зæххыл та апырх и дæ зонд. 1985 азы 13 май ХÆДÆВЗÆРД ÆМÆ ХÆДМÆЛ Æз дзурдзынæн ныфсджынæй, Кæса мыл хур кæдмæ: «Æгас цæуæд ХÆДæвзæрд! Дæлдзæх фæуæд ХÆДмæл!» 1985 азы 13 май ХÆЗНА УСЫМАД — Хæзна у мæ каис, — фæзæгъы Мæ хæлæртты хуыздæр Къæдзæх, — Хæзна та фæныгæнынц зæххы, Хъæуы йæ æмбæхсын дæлзæхх. 1985 азы 13 май СТЫР БЫНАТМÆ БЫРСÆГÆН Нæ кæсыс ахуыргонд лæг иумæ, Бырсыс ыстыр куыстмæ уæддæр... Æртæ дзырды ныффыссыс иумæ, Ыскæныс иу дзырдæй æртæ. 1985 азы 19 май ЙÆ ЧИНЫГ «АФТÆ РАЙГУЫРД ЗАРÆГ» ЧИ СХУЫДТА, УЫМÆН Ма уæд мæ фыдгулы дарæг, Судзæд йæ къæхты бын зæхх... Афтæ кæй райгуырди зарæг, Афтæ у уымæн лæмæгъ. 1985 азы 28 май ÆНДÆР УАРЗТ Тæрсгæ-ризгæ уарзын, ныгъуылдæй Мæ бон нæу дæу хуызæн мæнæн. Зынг хур мæ нæ хъæуы ныгуылдæй, Дзымарийы хуызæнæй — сæн. 1985 азы 31 май ДÆУÆЙ ÆРМÆСТ Лæгæн кæй никуы скодтай маст, Кæй дæ сыгъдæгуд æмæ раст, Уый хъусæм алы бон. Æххæст Зæгъон, кæмæй: дæуæй æрмæст! 1985 азы 19 июнь ЛÆГ Дæу раз лæгдæр ысхонæм кæй, Куыд-иу ын акувæм нæ сæрæй?! Цы нæ дын бантыст, ахæм нæй, Æрмæст фыддзинадæй, æвзæрæй. 1985 азы 7 июль ÆХЦА Хуыгаты Сергейæн — Æхцамæ нæ лæууын, — зæгъыс, — Йæ сæр та мæ арæх фæхъæуы... — Æхцамæ бæргæ лæууын æз, Фæлæ мæм йæхæдæг нæ лæууы. 1985 азы 17 июль ÆНÆНТЫСТ Мæ цæсты сырæзти бæрзонд, Куы схауди сабийæ ныхас: «Иæ сæры алкæмæн ис магъз, Фæлæ нæй алкæй сæры зонд». 1985 азы 20 июль ФÆРСТЫТÆ Дзибисы выхæстæй «Дæхимæ цы хъусыс, цæмæн дæ æнкъард?» «Мæ куыстæй æрцыдтæн æндæрæбон тард». «Дæ бæсты кæй сæвæрдтой, уый дæр-ма зæгъ?» «Сæрхъæны!» — «Сæрхъæны та ногæй? Бæллæх!» 1985 азы 21 июль ДЖЕУÆР-ДЖАУЫР Тæригъæддаг æмæ мæгуыр Дæ хуызæттæй фæзæгъынц кæд? Джеуæр дæ хониккам, джауыр Куы нæ уыдаис, уæд. 1985 азы 23 июль ДЗЫРДХÆССÆГ Дæ алкæцы дзырды дæр кард и, Æгæр дæ ды иуæй хъæуæн... Ныхæстæ нын дзурынæн рарди, Хæссынæн сæ рарди дæуæн. 1985 азы 27 июль ХОРЗ ÆВДИСÆН Сергей Смирновы мотив — Гогыз-иу ацыд мæ рæзты æдзух, Абон та райста фыццаг хатт мæ къух. — Тагъд æй, æвæодæгæн, сисдзысты куыстæй! — Фехъуыста Сырддонцъиу зонынджын Мыстæй. 1985 азы 27 июль АВТОБУСЫ — Бынат нæ дæттыс хистæрæн! Цæуыннæ дæм ис уаг? — Зæрондæй мæ лæууын хъæудзæн, Ныр абадон мæ фаг. 1985 азы 30 июль ÆВГЪАЙУАГ Кæй уыдтæн амондджын кæддæрты, Лæууы ма уый фынау мæ зæрдыл, Фæлæ йыл нал æууæндын. Оххай, Мæ цин мын раппæрстæуыд хохæй! 1985 азы 31 июль РÆСТДЗИНАД Æдылы кæй рахуыдтай мæн, Æвæццæгæн, уымæй дæ раст. Куы нæ уаин зондцух, сæрхъæн, Уæд демæ нæ кæнин ныхас. 1985 азы 31 июль ХЪЫНЦЪЫМ Цы уыдис кæддæрты мæ царды, Хъыгагæн, уый нал зыны ардæм. Кæй уыдтæн æз амондджын, уды Уый нал уырны, зæрдæсæр дуды... 1985 азы 31 июль ЦЫРТЫЛ ФЫСТ Дæ зæрдæ банцади йæ куыстæй, Дæ игæр банцади йæ рыстæй, Фæлæ нæй банцайæн нæ мастæн, Цы загъдæуа мæлæтæн, уастæн?! 1985 азы 1 август ЛÆГ ÆМÆ КАЛМ Вольтеры мотив Иу лæгыл хъæды фæхæцыди калм, Кодта йæ зæрдæ фыдсагъæсæй хъарм, Афтæмæй та уыд дзæгъæлы йæ тас: Калм уым æрбамард йæ цæстыты раз. 1985 азы 3 август ХÆСТ Чи нæ райгуырди, фæлæ кæй хъуыди гуырын, Ууыл тæккæ билцъ уадзгæйæ, бафтауы рын, Хъус цы нæ хъусы æмæ цы нæ уыны цæст, Уый дæр амары маргхъæстæ нæмыгæй хæст. 1985 азы 5 август ЗОНДАМЫНД Хицау урс куы хона сау, Схон æй уæд ды та сæнтсау, Уа цæмæй дæ фарс Хуыцау, Мачи дæм æрхæсса фау. 1985 азы 6 август БÆРГÆ Нæ дарин æрдумæ мæ рыст, Ныффæразин судзаггаг мастæн, Куы уаид мæ номæй мæ фыст Зындгонддæр мæ дзыллæйы астæу. 1985 азы 9 август ТÆККÆ СТЫРДÆР ХЪÆБАТЫРДЗИНАД Хъахъхъæдта Райгуырæн бæстæ салдат, Ахуыссыд тохы йæ зынг. Уымæй ыстырдæр хъæбатырдзинад Равдисын хæсты у зын. 1985 азы 9 август ÆДЗÆЛЛÆГТÆ Нæ мæм ракаст амонд, ысуади мæ рæзты, Мæ мастæй мын рауайын кодта ызды... Нæ хъæбулы иумæ рæвдауыны бæсты Рæвдауыс кæйдæр фырты иунæгæй ды. 1985 азы 10 август СÆКÆР Иу къæртт ахордтон сæкæр, Айадджын мæ ком æгæр, Цъус фæстæдæр дзых ысмаст — Цины ивы алкæд маст. 1985 азы 10 август НЫМД УАРЗТ Дæхицæн фæтарстæ, Не нашли, что искали? Воспользуйтесь поиском:
|