КУЫРЫХОНЫ ЗОНДАМЫНД 6 страница

Тæрсын та дæ хъуыд

Нæ сусæггаг уарзтæн,

Сыгъдæг чи уыд, нымд.

1985 азы 10 август

МÆРДТÆЙ ДАВÆГÆН

Ныры онг дæр цардтæ мæнгардæй,

Ысфыхт-иудæ митæм нæ маст...

Кæм давыс æмдзæвгæтæ мардæй,

Уым нал дæ ды махæн æгас.

1985 азы 13 август

ÆНАМОНДДЗИНАД

Хъуылæг фæцæгъдынц, æмæ царв

Йæ сæрыл абады æнæмæнг,

Ды та дæ уарзондзинад арф

Нымбæхстай, байсысти æнæ мæн.

1985 азы 13 август

ТÆРХОН ТÆРХОНГÆНÆГÆН

Тæрхонгæнæг куы рахæсса фыдгæнæгæн тæрхон,

Уæд æй æдзухдæр хорздзинад кæйфæнды цур дæр хон,

Фæлæ тæрхон куы бахъæуа йæхицæн дæр хæссын,

Уыдзæни уый æнæмæнгæй кæмæнфæнды дæр зын.

1985 азы 15 август

ДЫУУÆ ЦАРДЫ

Домд дæн æз мæ рыстытæй,

Алкæцы дæр мын дзы — рын...

Ды цæрыс дæ фыстытæй,

Æз мæ фыстытæн цæрын.

1985 азы 15 август

РОХГÆНАГ

Мæйдар æхсæв холымæ рацæуы уыг,

Йæхи фаг æмбары дзылыйы лæппын дæр...

Цæрын дæ кæй хъæуы, уый базыдтай тынг,

Мæлын дæ кæй хъæудзæн — нæ зоныс

æппындæр.

1985 азы 15 август

КÆМÆНДÆР

Æнцон уадзæн ранæй нæ рауадздзæн дон,

Йæ хъару æвзардзæн тæрхъусыл...

Кæмæндæр йæ бæхыл нæ цæуы йæ бон,

Кæмæндæр — йæ усыл.

1985 азы 15 август

КÆНÆ-КÆНÆ

Куынал кæнис алкæд дæхи кой,

Уæд адæм æмдзыхæй зæгъиккой:

«Æвæццæгæн, сæрра, фæсонт,

Йе бацыд йæ тутг сæры зонд».

1985 азы 16 август

КÆЙДÆР ХУЫЗÆН

Кæйдæр фæрцы байстай кæйдæр хæдзар, куыст,

Кæйдæр фæрцы исыс кæйдæр бæсты мызд.

Кæйдæр цæстмæ дзурыс кæйдæр ныхмæ тынг,

Кæйдæр хуызæн акæлдзæн иу хатг дæ рыг!

1985 азы 16 август

РÆСУГЪДДÆР

Сылгоймæгтæ сисдзысты, зонын, фæдис,

Фæлæ мын мæ хъуыды æнæзæгъгæ нæй:

Дæ хуызæн рæсугъд чызг ма Иры кæд ис,

Уæддæр дзы рæсугъддæр нæ уыдзæн дæуæй.

1985 азы 17 август

ХОХЫ

Уæлкъуыппæй радымы уадымс дзæбæх,

Фондзыссæдзаздзыд зæрондимæ бадæм...

Раздæр нæ фаг кодта адæмæн зæхх,

Абон та зæххæн нæ фаг кæны адæм.

1985 азы 17 август

ТУТИ

Дæ хицауы митæ фæзмынæй æркаст

Куы расвдой искуы, уæд ацыд дæ ласт.

Куыд ысдæры дымæг, куыд хойы йæ риу,

Нæ акæндзæн уыдон дæуау дæсны иу.

1985 азы 17 август

СЫХАГ

Ыскодта нын чидæр кæлæн

Æмæ дæ æрхаста нæ сыхмæ...

Дæ фарсмæ куы нæ ис цæрæн,

Куыд цæрон гъеуæд æз дæ ныхмæ?!

1985 азы 18 август

ХУДЫНЫ БÆСТЫ

Горæты уынджы уа æви хъæуы —

Адæмыл худгæ цæуы,

Афтæмæй та йын йæхиуыл хъæуы

Худыны бæсты кæуын.

1985 азы 18 август

МÆЛÆТДЗАГ

Кад æмæ намыс куы вæййынц мæллæг,

Гъеуæд сæ хицауыл бахæцы ризæг...

Ралыгъди хæстæй дæргъæй-дæргъмæ лæг,

Худинаджы салд хъæбысы ысмидæг!

1985 азы 19 август

УАРЗОНЫ МЫСГÆЙÆ

Халонау æз дæр мæ цыхт нæ хордтон, —

Хæссы мæм уымæй алчидæр фау...

Кæддæр мæхицæн æвгъау цы кодтон,

Кæмæндæр нал у ныр уый æвгъау.

1985 азы 19 август

ТАГЪД

Райдыдтой бирæтæ æнтæфмæ загъд,

Цыма дзы хурзæрин искæй ныццавта...

Тæвд рæстæг дæр та фæуыдзæни тагъд,

Уазал куыд ралæудзæн, афтæ.

1985 азы 19 август

УАРЗТÆЙ ФЫЛДÆР

Уæвгæ нæ уый æнхъæл та чи уыд,

Кæй рафæлдæхдзæн дуне, зæхх,

Кæй бауарздзынæ ды дæхи уд

Фылдæр нæ нымд уарзтæй, æллæх!

1985 азы 21 август

ФÆДОН

Кæсын нæу комкоммæ дæ бон,

Цæрыс зыр-зыргæнгæйæ, хъавгæ.

Дæуæн дæ фыдæлтæ дæр бон

Фынæй кодтой, æхсæв та — давгæ.

1985 азы 21 август

МÆ ЗÆРДÆДАРÆН

Мæ бæллицты ныхмæ цыдæр тых фæлæууы,

Нæ зонын, ыскъуырынц сæхи уæд цæуыл...

Мæ зæрдæ куы ницæуылуал фæлæууы,

Уæддæр ма мæ зæрдæ фæдарын дæуыл.

1985 азы 21 август

ДЫ — ÆНÆ МÆН, ÆЗ — ДÆУИМÆ

Мæ сæрмæ æруаиккой мигътæ тыгуыр,

Кæлид-иу къæвда рæстæджы дæр мæ рыг,

Æнæ мæн куыннæ дæ æбæркад, мæгуыр,

Куы нæ уаин афтæ дæуимæ хъæздыг.

1985 азы 21 август

ÆНАХУЫР ХЪУЫДЫ

Фыдбылызтæ, хъизæмæрттимæ хæсты

Æрхæццæ дæн мæнæ мæ царды кæронмæ...

Мæ мæлæтмæ размæ цæуыны бæсты

Фæстæмæ фæцæуин мæ райгуырæн бонмæ.

1985 азы 21 август

ЦАРДВÆНДАГ

Алчи цардвæд къуыбылойау тухы,

Алкæмæн дæр æрцæудзæн йæ рæстæг...

Згъорæг тагъддæр нæ фæуыдзæн дугъы,

Сабыр цæуæг нæ баззайдзæн фæсте.

1985 азы 22 август

УАЦАРЫ

Нал æвзарын адæймаджы зулкъæй,

Абырсы мæ хаттæй-хатт æрхæндæг...

Чидæриддæр нал зыны йæ мулкæй,

Уыдон мæнмæ нал зынынц сæхæдæг.

1985 азы 25 август

МÆ МАДЫ ÆФСЫМÆР ХОСАТЫ ХÆЧЪАССÆЙЫ ЗИАНЫ ХАБАР ФЕХЪУСГÆЙÆ

Ныффæсус и фыркуыдæй хъуыр,

Фыдгулыл мæ бонтæ кæнæд!..

Мæхи ма кæй ысхонон ныр,

Куынæуал ис иу хистæр, уæд?!

1985 азы 28 август

БÆРÆГГÆНÆНТÆ

Куы фæкалид уастæн йæ рондз,

Бæстыл чи ныллæууыд хæлиу...

Дæхицæн кæй нывæрыс «фондз»,

Нывæрæм дын уый тыххæй «иу»!

1985 азы 29 август

ÆХСЫЗГОН ÆМÆ ХЪЫГ

— Дæ куыстæй кæй æрцыдтæ ист,

Мæнæн уый æхсызгон уыдис!

— Фæлæ дзы кæй сæвæрдтой дæу,

Мæнæн та æхсызгон уый нæу!

1985 азы 31 август

РАЗМÆ

Йæ кой дæр нал и удхайраг хъынцъымæн,

Æрбадæлдзæх, уыди цыма рæуфын...

Фæстæмæ цæуын чи базоны, уымæн

Æнцондæр вæййы размæ дæр цæуын.

1985 азы 4 сентябрь

СÆРЫСТЫРДЗИНАД

Æрттывдтытæ нæ калы кæд мæ къуым,

Уæддæр хæссын мæ цин йæ рухс къæсæрмæ...

Мæн бадгæйæ кæм нæ фæуынынц, уым

Ыслæууын никуы бахастон мæ сæрмæ.

1985 азы 7 сентябрь

ХÆСТÆГ

Йæ хæстæг мæ хоны,

Фæлæ мæм хæстæг

Кæд нал цæудзæн, ахæм

Æрлæудзæн рæстæг?..

1985 азы 9 сентябрь

КЪОГЪО ÆМÆ ХÆЛУАРÆГ

Къогъо мæ тугæй бафсæст. Хæлуарæг

Ацахста уый хурх — аскъуыд йæ зарæг...

Ахæм ма искуы ралæууыд дуг:

Тугцъирæй тугцъир райсæд дæ туг!

1985 азы 10 сентябрь

САУЦЪИУТÆ

Куыд тынг уыдысты хъæлдзæг!

Куыд зарыдысты хъæдæй!..

Цъæхæй æрхастой уалдзæг,

Фæхæссынц сæрд рæгъæдæй.

1985 азы 18 сентябрь

ДЗЫПКЪАХÆГ — ЧИНГУЫТÆ ДАВÆГÆН

Мах кодтам гуыппытæ,

Ысхъæлдзырд, хъæртæ...

Æз къахтон дзыппытæ,

Ды къахтай сæртæ.

1985 азы 23 свнтябрь

ДЫУУÆ БÆРÆГБОНЫ

Йæхи-иу æвдыста æддæмæ зæдæй,

Фæсвæд та нæ кодта дæлджинæг...

Æвдай азы рацыд, куы райгуырд, уæдæй,

Ыссæдз та — куы радавта чиныг.

1985 азы 12 октябрь

ГÆДЗÆЙЫ СОЙ

Хъарутæ æрхъæцмæ фæхъæцыны фаг

Нæ разыны алы хатг алкæцы лæгмæ...

Æрæгмæ цы мигæнæн фæкæны дзаг,

Кæны уый æвдæлон дæр афтæ æрæгмæ.

1985 азы 13 октябрь

УАЦАРЫ

Дæ уадулты сырхæй — мæ уадултæ сырх,

Дæ цæстыты цъæхæй — мæ цæстытæ цъæх,

Дæ æрфгуыты фатæй — мæ риуы нос цыргъ,

Дæ зæрдæйы хъармæй æртад уды зæгъ.

1985 азы 13 октябрь

НЫФС

Хæблиаты Сафарæн

Кæй дæ нæма федтон сæркъулæй,

Нæ дæн æз уый тыххæй сæркъул...

Зын ран кæй нæ тæрсыс фыдгулæй,

Тæрсы дæ уый тыххæй фыдгул.

1985 азы 27 ноябрь

ФЫРМÆСТÆЙ ÆМÆ ФЫРЦИНÆЙ

Ныронг дæм бартæ куы нæ уыди фаг —

Кодтай æрра митæ, раст цыма хъуаг.

Абон куы нал ис дæ бартæн кæрон,

Сæрра дæ гъеуæд, гормойнаг, бынтон.

1985 азы 1 декабрь

ХЪОДЗАТЫ ÆХСАРÆН, ЗЫНГХУЫСТ ПОЭТГЫ НОМХЫГЪДМÆ БАХАУÆГÆН

Хъæбатырты рæгъмæ кæй æрцыдтæ хаст,

Нымайын уый хорзыл, кæсы мæм уый раст,

Фæлæ дæ æгасæй кæй рахуыдтой мард,

Нытътъыстой мын уымæй мæ зæрдæйы кард.

1985 азы 4 декабрь

МÆ ЗÆРДÆ

Кæдмæ тæлфа мæ зæрдæ риуы,

Уæдмæ йæ ды нымай дæхиуыл.

Кæдмæ уа уый бон уарзын дæу,

Уæдмæ мын сæфынæй тас нæу.

1985 азы 5 декабрь

ХЫТЪЫН

Хъуыддæгтæгæнæг сæр вæййы —

Цæвинаджы æгæр цæвы...

Дæ уæцъæф нæй дæ зæрдæйы,

Дæ зæрдæ и дæ уæцъæфы.

1985 азы 12 декабрь

ДЗÆГЪÆЛЗАД

Дæ митæм куыннæ кæной адæм æлгъæд,

Ысты кæд æгадæй æгаддæр?!

Дзæгъæл кæй дæ, уый дын нæ уыди æгъгъæд,

Фæлæ ма йæм бафтыдтой «зад» дæр.

1985 азы 27 декабрь

ДИС

«Æхсæрдæс мины йаргъ мæ адавди ис!» —

Ды загътай, æз кодтон мæхинымæр дис:

Мæнæй та кæд рахæссвд уыйбæрц хуыснæг? —

Куы бахæссид йемæ фынддæс æмæ ’рдæг!

1985 азы 31 декабрь

ФЫЦЦАГАУ

Дæ сæр бæрзæндты фæхæссыс сагау,

Æркæсын кæныс дæхимæ уынг...

Дæ бон кæд нал у фыссын фыццагау,

Уæддæр ма давыс фыццагау тынг.

1986 азы 4 январь

САУЦÆСГОМ

Кæд ма дыл æз искуыд ныхасмæ æрхæст уон,

Гъеуæд дæм æрхæсдзынæн иу ыстыр фау:

Дæ зæрдæйы хуызæн нын сау у дæ цæсгом,

Дæ цæсгомы хуызæн дæ зæрдæ та — сау.

1986 азы 9 январь

НÆ ДЫУУÆЙЫ ТЫХХÆЙ

Мах тыххæй ис фидарæй ныффыссæн

Ахæм дзырдтæ: сбыд нæ астæу кау,

Æз нæ уыдтæн буц ахуыр дæ хуызæн,

Ды куыстдомд нæ баййæфтай мæнау.

1986 азы 9 январь

ФÆТКЪУЫТÆ

Цардæн ма дом алы хатт йæ дзаджджын,

Дзаджджын хай дæр къæрисыл у баст...

Иу фæткъуы æмбыдæй дæр у адджын,

Иннæ та — æнæ иу хъæнæй маст.

1986 азы 9 январь

Поэзи

Дуне у ыстыр —

Зæхх æмæ цъæх арв...

Дуне у æхсыр,

У поэзи царв.

1986 азы 11 январь

ХЪАЗГÆ ÆМÆ ХУДГÆЙÆ

Хæлæрттимæ худы, ызнæгтимæ хъазы,

Йæ мæнгарддзинадæн нæй ихсийæн, рафтæн...

Ныхас дæр нæ зæгъдзæн дæ ныхмæ дæ разы,

Фæсаууон дæ фарс куыннæ рахæцдзæн, афгæ.

1986 азы 13 январь

АЛЦÆМÆЙ ÆХХÆСТ

Иуы дæр дæ фыстытæй нæй уд,

Никуы скодтой зиууæттау тыххæст...

Курдиатæн цыдæриддæр нæ хъуыд,

Уыдонæй дæ иууылдæр æххæст.

1986 азы 17 январь

ГАЛ МАРÆГГАГ

Цæмæн ма фыстай повесттæ, романтæ?

Æрхастой нын пайдайы бæсты зиантæ.

Фыссæг кæй нæ дæ, уый равдисæн уыд

Дæ радзырдты æххуысæй дæр бæлвырд.

1986 азы 18 январь

МИН ЦÆСТЫ АСТÆУÆЙ

Дæ хуызæтты тыххæй æз афтæ зæгъин

(Уæвгæ йæ æнæ мæн зæгъгæ дæр кæнынц):

«Дыууæ цæсты астæуæй нæ, фæлæ мин

Цæхæр цæсты астæуæй фелвасид фындз».

1986 азы 20 январь

ХУДГÆ ХÆРАМ

Дары цыма алцæуыл йæ арм,

Афтæмæй та мидæгæй у калм...

Худгæйæ дæр чи кæны хæрам,

’Нæхудгæйæ астигъдзæн уый царм.

1986 азы 21 январь

САБЫР МАЛЫ ЦÆРÆГ

Ахæм дзы нæма фенди зæххыл:

Иу лæгимæ никуыма фæхыл,.

Афтæмæй та, чи фæхыл и, уыдон

Уый дзыхæй сæхи хонынц дывыдон.

1986 азы 21 январь

ФÆДФÆЛИВÆГ

Кæныс фæдфæливæнтæ кæд,

Ысты дæ хинтæ арф ныгæд,

Уæддæр сæ марг хæрдмæ лæбуры,

Цыдæриддæр дæ, ууыл дзуры.

1986 азы 22 январь

БЫНÆЙ ЛАСГÆ

Сæ тæккæ бынæй ласгæтæй хонынц адæм дæу,

Кæй дзурынц афтæ, уый та æппындæр диссаг нæу.

Бынæй фæласыс чъизи, нæ дзы зоныс æфсис,

Куы дзы ыссарис уастæн дæ судзгæ мæрдты хъис!

1986 азы 22 январь

НЫХАСЫ ЛÆГ

Чи кæны кæйдæр хъæдгомыл цæхх,

Уый кæсы мæнмæ сырдæй хъæддагдæр...

Иунæгæн дæр никуы загъта «нæгъ!»

Фæлæ никуы.сарæзта хъуыддаг дæр.

1986 азы 23 январь

РАЙДАЙÆН ÆМÆ КÆРОН

Дæ цъаммар митæн райдайæн кæй ис,

Быхсин дын уый, нæ йæ рахонин низ,

Фæлæ сын нæй фæуæн æмæ кæрон,

Æмæ дын нæу ныббарын уый мæ бон.

1986 азы 23 январь

ГÆДЫ БЫНДАР

«Дæ фæстæ æгъдауæй нæ баззайдзæн бын!» —

Кæмфæнды дæр афтæ зæгъдзынæн уæндонæй...

Æвзæр митæ кæнын у иу бон дæр зын,

Уæд сæ ды куыд кæныс æрвылбон æнцонæй?!

1986 азы 23 январь

КУЫРИС ÆМÆ БÆТГÆН

Куыннæ у уый та фауинаг, куыннæ у уый та хъæн,

Куы худа бæтгæн куырисыл, куы судза куырис, уæд?!

Мæ сагъæстæ куы бадомой, куы афæддахой мæн,

Мæнимæ уæд æрцæудзысты сæхæдæг дæр ныгæд.

1986 азы 23 январь

ФИСЫНМÆ

Дæ хуызæттæн куы раттой хос,

Дзæбæхгæнæн сын нæй уæддæр...

Кæйдæр æвзæр фыст хоныс хорз,

Кæйдæр хорз та — æвзæр.

1986 азы 24 январь

ДУГЪОН

Фæдисонау кодтай ды уыцырдæм дугъ,

Кæм-иу уыд дæ удæн æнцондæр...

Мæ цардыл зынæй дæр нæ сисин мæ къух,

Дæ цардæй нæ фæцæрин бон дæр.

1986 азы 24 январь

СÆРЫ ЗОЦЦ

Нæ хъæуы дзуджы къорд цæуы,

Сæ фæдыл иунæг кæд цæуы...

Кæмæн йæ сæры зонд цæуы,

Кæмæн йæ сæры зонд цæуы.

1986 азы 25 январь

КУРДИАТДЖЫН

Æз нæ дзурын уый тыххæй: мæсты дæн,

Кæнæ мын фæцагайдтай мæ рис...

Хорз фыссæджы курдиаты бæсты дæм

Цъаммайраг лæджы курдиат ис.

1986 азы 26 январь

ИУНÆГÆЙ

Мæ фыдгулæн йæ хъуыддаг уæд хæлæгимæ,

Кæддæра дардмæ айхъуысид йæ зард...

Æнæ мæн ды фæцæрдзынæ дæ лæгимæ,

Уыдзæн æнæ дæу иунæгæй мæ цард.

1986 азы 26 январь

ДЫУУÆРДÆМ БАСТДЗИНАД

Рацыд, зæгъгæ, сау зæххыл æрра сыг,

Нал уаид уæд фарнæн фарныл бафтæн...

Зондджын лæг куыд никуы вæййы расыг,

Расыг зондджын никуы вæййы афтæ.

1986 азы 29 январь

УАРЗОНДЗИНАД

Дæ бон цы у, куы уаид уый мæ бон,

Уæд фестын кæнин айнæг хох дæр дон,

Фæлæ куы расидис мæ ныхмæ тох,

Нæ фестын кæнин дон уæддæр æз хох.

1986 азы 29 январь

БЫНТÆ

Цæрæг уды сагъæс, цæрæг уды мæт:

Цы сфæлдыста хорзæй — йæ бынтæ, йæ хъæстæ...

Мæ фыстыты фæстæ нæ баззайон кæд,

Мæ фыстытæ баззайдзысты уæд мæ фæстæ.

1986 азы 31 январь

ДÆ БЫНАТЫ

Æвдæр лæг дæ бынаты ракæсын къуымæй

Нæ бауæндид, уымæн æмæ дæ быдыргъ...

Дæ мадæлон æвзаг кæй нæ зоныс, уымæй

Æппæлыны бæсты кæнис хъуамæ сырх.

1986 азы 31 январь

КÆЙ НЫХМÆ НÆ ДЗУРЫ...

Зæххон аиппытæй йæм иу дæр нæ хауы,

Фæуадздзæн йæ фæстæ æрттивынæй хуры...

Кæй ныхмæ нæ дзуры, цы лæджы нæ фауы,

Цы лæджы нæ фауы, кæй ныхмæ нæ дзуры!

1986 азы 31 январь

СУАДОН ЗМÆНТÆГ

Дæ хуызæтты цардхалæг хонынц, дывзагон,

Сыгвдæг суадон чи змæнты, чи кæны лакъон...

Куыд хорз дæн, уый дзурыс мæхицæн æрмæстдæр,

Куыд æвзæр дæн, уый та — æгас Иры бæстæн.

1986 азы 1 февраль

ÆНЦОНÆЙ

Æз нырма нæма зонын дзæбæх,

Дуне у æнусон æви нæу,

Уæд дунейы циу æнусон, зæгъ,

Уый куыд тынг æнцонæй уырны дæу?

1986 азы 3 февраль

ТАСАГ

Нæй, дам, мæм æрхæссæн лазтæ,

Фæлæ йæм лыстæг æркæс,

Уæд зæгъиккой: «Ис ын астæу,

Нæй дзы иунæг хъул æрмæст».

1986 азы 9 февраль

ТУЛДЗЫ МÆЛÆТ

Иннæ бæлæстæй уæлдæр уыд йæ сæр,

Афтæмæй раздæр нæ фæзынди цардмæ...

Ардыгæй дардмæ кæй зынди кæддæр,

Ардыгæй уый тыххæй нал зыны дардмæ.

1986 азы 22 февраль

НÆ ЗОНЫ

Дæ мой дæр уæд, кæд хоны дæу

Йæхи, уæд уымæй раст лæг нæу.

Цæуыннæ? Уымæн æмæ мæн

Нæ зоны. Афтæмæй та дæн.

1986 азы 22 февраль

КÆДДÆР ÆМÆ НЫР

Кæддæр дын-иу загътон: «Тæхуды, дæу ма уын,

Уæд райдаин доны фæрцы дæр тъæпп хауын!»

Мæ дæргъæй, мæ уæрхæй ныр нал и бæрæг,

Дæ уындмæ фæкæнын æрвылбон хæлæг.

1986 азы 5 мартъи

ХÆРИС ÆМÆ ТУЛДЗ

Куы ассæнды уæрдон хæрисы,

Тынг зæрдæ уæд ууыл нæ риссы.

Куы батулы тулдзыл та цалх,

Уæд агуры кæуын былалгъ.

1986 азы 8 мартъи

ЦАРД

Уазалæй — хъарммæ, уазалмæ — хъармæй,

Талынгæй — рухсмæ, рухсæй та — тармæ...

Сараз, тæхуды, афтæ æнусмæ:

Талынгмæ — рухсæй, талынгæй — рухсмæ.

1986 азы 16 маргъи

КÆРÆДЗИУЫЛ ХÆЦЫН

— Хæцут кæрæдзиуыл, — мæ цæст

Уый уарзы алкæмæн дæр рагæй.

— Кæнæм дын мах дæ дзырд æххæст:

Хæцæм кæрæдзиуыл... дæндагæй.

1986 азы 22 мартъи

ЦЪЫМАРАЙЫ КÆСАГ

Зæрдæ кæсагæй дæр нал райы,

Сидзæрау риуы ныргъæвст...

Чи цæры ахæм цъымарайы,

Хониккой хъуамæ уый хæфс.

1986 азы 22 мартъи

РУХСЫ ГУЫРÆН

Цыдæриддæр рухсæй мæ фысты

Ис, иууылдæр уыдон дæу ысты,

Дæуæй гуырд — мæ цин æмæ худын,

Мæ уды æхсызгон рыст, дудын.

1986 азы 1 апрель

РУХС ÆМÆ ТАР

Лæг йæхимæ кæд хъусы? —

Баззад хъуыдыты бар...

Бон цыбырæй дæр рухс у,

Æхсæв даргъæй дæр — тар.

1986 азы 4 апрель

ДЗÆГЪÆЛЫ

Гъеуымæй ма æвзæрдæр

Уæвын кæд ис дæ зæрды,

Уæд дзæгъæлы: дæуæй

Æвзæрдæр уæвæн нæй.

1986 азы 6 апрель

ДÆУ УАРЗГÆЙÆ

Дæ хъармæй кæд тавыс кæйдæр,

Уæддæр нæу мæ цард дæр æвзæр:

Куыд кæнон, зæгъ-ма мын, æнкъард,

Кæд тонын дæу уарзгæйæ цард?!

1986 азы 6 апрелъ

ФЫДЫ ХÆДЗАР

Мæ фыды хæдзар у мæ бæллицты къуым,

Уым цардтæн, цæрын уым, цæрдзынæн æз уым...

Мæ фырттæн куы нæ уа сæ фыды хæдзар,

Мæ сæр уæд кæндзæни, æвæццæгæн, сар.

1986 азы 13 апрель

СÆ МАДЫ МАРДЫ УÆЛХЪУС ЙÆ ФЫДГОЙ КÆМÆН КОДТОЙ ÆМÆ УЫЙ ХОРЗ КÆМÆ КАСТ, УЫДОНÆН

Йæ фæстæ хæрæгæй дæр бакæнут хуым,

Фыддæр уыл нæ фæхуддзæн адæмы зæрдæ...

Æвзæрæй дæр хорзтæ кæм фæдзурынц, уым

Фæдзырдтой сымахæн уæ хорзæй æвзæртæ.

1986 азы 21 апрель

ЙÆ ФЫНДЗ КÆМÆН ФÆЗЫЛЫН КОДТОЙ, УЫМÆН

Ныццавтой йæ, мæгуыр,

Фæцæйкодта хæрзбын...

Йæ цыбыр зондау ныр

Йæ даргъ фындз дæр — зылын.

Не нашли, что искали? Воспользуйтесь поиском: