Главная

Популярная публикация

Научная публикация

Случайная публикация

Обратная связь

ТОР 5 статей:

Методические подходы к анализу финансового состояния предприятия

Проблема периодизации русской литературы ХХ века. Краткая характеристика второй половины ХХ века

Ценовые и неценовые факторы

Характеристика шлифовальных кругов и ее маркировка

Служебные части речи. Предлог. Союз. Частицы

КАТЕГОРИИ:






КУЫРЫХОНЫ ЗОНДАМЫНД 12 страница




1990 азы 4 сентябрь

ЗЫН ФАРСТ

Скæсæйнаг мотив

Кæд алчидæр йæхи фæхоны зонды къуым,

Уæддæр нæ зоны, циу нæ царды мидис, апп:

«Цæмæн хъуыдыстæм ам, цæмæн хъæудзыстæм уым?»

Зæххон адæмæй иу нæ ратдзæн уымæн дзуапп.

1990 азы 9 сентябрь

ЦАРДЫ РÆСТДЗИНАД

Царды рæстдзинадыл зондджын лæг баууæнды,

Царды рæстдзинад нæ фæзоны ауæрдын:

Иу мæм нæма уæнды, иннæ мæм нал уæнды,

Иумæ нæма уæндын, иннæмæ нал уæндын.

1990 азы 13 сентябрь

ЗÆХХ ДИХГÆНÆГÆН

Бауырнæнт мæ дзырдтæ дæу,

Æз фæдзурын афтæ стæм:

«Махæй иуы дæр зæхх нæу,

Зæххы иууылдæр ыстæм».

1990 азы 18 сентябрь

ТАЛЫНГÆЙ... ТАЛЫНГМÆ

Афтæ уыд царды æнусæй æнусмæ,

Афтæ уыдзæни, ныхас дæр ыл нæй:

Талынгæй уымæн æрбацæуæм рухсмæ,

Ацæуæм талынгмæ рухсæй цæмæй.

1990 азы 24 сентябрь

РАЗМÆ ЦÆУГÆЙÆ

Мæ сæр æруагътон базмæ —

Уæд цæстытыл фæуайы:

Цæуын мæхæдæг размæ,

Мæ цард та фæсте зайы.

1990 азы 1 октябрь

ЗÆРДÆЙЫ ЦÆРÆГ

Зæлинæйы фыстытæй

Æз хохмæ систон дæу къуылдымæй —

Хъыгæн дæр, цинæн дæр æгæр дæ...

Куы дæ фæрсой, кæм цæрыс, уымæй,

Уæд сын-иу бацамон мæ зæрдæ.

1990 азы 8 октябрь

СÆР СÆРМÆ

Нытътъыссæн дзыхы нæй къæрмæг,

Дæ фыдгой хъуысдзæн райсом хæхтæм...

Дæ сæр куы нæ хæссай сæрмæ,

Уæд æй хæссæг уыдзæни къæхтæм.

1990 азы 8 октябрь

ÆФСАРМ ÆМÆ ТАС

Чидæр уæладзыгон хæдзары кафы,

Иннæйы цæрæн та — зæххы бын, уæрм...

Уидæгтæ ауагътой зæрдæйы арфы

Æфсæрмы тас æмæ тасы æфсæрм.

1990 азы 9 октябрь

АСЛАМ ФЫД

Цæсты куыд ахада дæ ас,

Дæ фæстæ кæд нæ уадзыс никуы фæд?!.

Лæвар фыды куы вæййы бас,

Аслам фыды цæуыннæ вæййы уæд?

1990 азы 9 октябрь

ИУ ÆМÆ ДИХ

Хойыс дзæгъæлы дæ риу —

Ничи рахондзæн дæу сих...

Зондджынтæ фæкæнынц иу,

Æдылытæ — дих.

1990 азы 10 октябрь

ЦАРД ÆМÆ БОНТÆ

Сæры стæлфыд сагъæс, мæт,

Ахсы ахæм хъуыды зонд:

Цард кæд бонтæй конд у, уæд

Бонтæ цардæй ысты конд.

1990 азы 10 октябрь

РÆСУГЪД МАД ÆМÆ ФЫДЫНД ЧЫЗДЖЫТÆ

Кæд бафтаудзынæн истæмæй дæу цæсты,

Уæддæр мæ сæры иу хъуыды фæзынд:

Дæхи хуызæн рæсугъд уæвыны бæсты

Кæйдæр хуызæн — дæ чызджытæ фыдынд.

1990 азы 12 октябрь

СЫЗГЪÆРИН ФÆЗЗÆГ

Куы дæ фæнда, уæд мыл-иу дис дæр кæн,

Фæлæ цы зæгъон, уый уыдзæн æцæг:

Сызгъæринæй æппæты тынгдæр мæн

Цы хъæуы, уыдонимæ ис фæззæг.

1990 азы 12 октябрь

АМ ÆМÆ УÆЛМÆРДТЫ

Мæ ныхæстæй иу дæр нæу дам,

Зæгъид афтæ лæгты нымаддæр:

«Мæ хуызæттæ бирæ ис ам,

Фæлæ дзы нæй уæлмæрдты къаддæр».

1990 азы 30 октябрь

КУЫДЗЫ ТУГ ÆМÆ ДОН

Фæсайдтай тохгæнæг æфсад

Хæстонæй...

Ды дæ куыдзы тугæй æхсад,

Мах — донæй.

1990 азы 6 ноябрь

ЗЫМÆГОН ÆМÆ СÆРДЫГОН

Фæнды фæлмæн, фæнды тызмæг уон,

Уæддæр æмбардзынæн æфсарм...

Кæмæндæр уазал нæу зымæгон,

Кæмæндæр нæу сæрдыгон хъарм.

1990 азы 10 ноябрь

СТЫР ФЫССÆГ

Гæвзыкдзинадæн байгом кодта гонтæ,

Йæ уазалы тæф нал цæуы йæ къуымæн...

Ыстыр фыссæгæй батыдта йæ бонтæ,

Ыстыр фыссæг кæй никуы уыди, уымæн.

1990 азы 11 ноябрь

ÆРЫГОН ÆМÆ ЗÆРОНД

Кæд дын æрдзæй нæ рард кæйдæртау зонд,

Уæд баззадтæ æнусы бонмæ сонтæй...

Æрыгонæй дæр чи уыди зæронд,

Æрыгон уый куыд уыдзæни зæрондæй?!

1990 азы 12 ноябрь

ЦЪÆХ КÆРДÆГ ÆМÆ МИТ

Куы баиу кæны былгæрæттæ хид,

Уæд фæцæуынц æрмæстдæр адæм хидыл...

Цъæх кæрдæгыл æруары арæх мит,

Фæлæ цъæх кæрдæг никуы зайы митыл.

1990 азы 12 ноябрь

ЙÆ ХУД ЙÆ СÆРЫЛ КÆМÆН НАЛ ЦЫД, УЫЙ КАТАЙ

Цыфæнды кæн, хъæрæй мыл худ,

Мæ фæнд зæгъдзынæн æз уæддæр:

Кæнæ фæкъаддæр и мæ худ,

Кæнæ фæдынджырдæр мæ сæр.

1990 азы 13 ноябрь

КЪУЫЗЫППА

Дзаг дæ ды дæ къубалмæ бæллæхæй,

Иунæг къахдзæф ис дæуæй рынмæ...

Кæд нæ зыныс ды уæлæмæ зæххæй,

Зæххæй ды зыныс уæддæр бынмæ.

1990 азы 13 ноябрь

ХУР ÆМÆ ЗÆХХ

Ды тæхыс дæ хъуыдыты бæхыл,

Фæлæ-ма мын ахæм хъуыддаг зæгъ:

«Хурзæрин куы атулы зæххыл,

Хурыл уæд цæ тулы зæхх?»

1990 азы 14 ноябрь

ÆНУСМÆЦЪÆХ БÆЛАС

Зæхх æй кæй бауарзта, зæхх,

Хур æй кæй хоны йæ хур,

Цъæхтимæ уымæн у цъæх,

Буртимæ уымæн нæу бур.

1990 азы 14 ноябрь

УÆЛÆУЫЛ ÆМÆ МÆРДТЫ

Уый тыххæй ма раджы дæр дзырдтам,

Абон та йæ ног зæгъын мæ фысты:

Махæй иу дæр нал уыдзæни ам,

Уыдон уым кæдфæндыдæр уыдзысты.

1990 азы 18 ноябрь

ХОРЗ ÆМÆ ФЫД

Мæллæджы сагъæс никуы бацыд нарды,

Таучел нæ кæны иунæг ран дæр зыд...

Хæрзгæнæг хорз куыд никуы ссардта царды,

Ыссарæд-иу фыдгæнæг афтæ фыд.

1990 азы 27 ноябрь

ДÆ БЫНГÆНÆГ

Балер кæсæгтæй иу дæр нæу

Æнцон ахсæн æнгуырæй...

Дæ бынтæ бабын кодтой дæу,

Æгасæй баззадтæн мæгуырæй.

1990 азы 3 декабрь

БИРÆДЗУРАГ ХИЦАУÆН

Дзæгъæл дзурынмæ иунæгæй дæр авд дæ,

Хъуыддаг кæнынмæ — аба-бау! — æргъæвст.

Дæ ныхæстæй куыд бафсæстыстæм, афтæ

Куы уаиккам дæ хъуыддæгтæй æфсæст.

1990 азы 5 декабрь

БÆЛЛÆХТЫ БÆЛЛÆХДÆР

Ныййарæджы дзырд алкæддæр нымад у,

Фæуайы цæстыл саудæр бон йæ хуыз...

Зæрондæй дæр зын ныгæнæн цы мад у,

Уый сонт лæппуйæ баныгæдтон æз.

1991 азы 5 январь

БÆРГÆ

Цæмæй дæ исыл ног ис бафта,

Фæхъæуы уымæн зондджын сæр...

Ды хорз куыд никуы уыдтæ, афтæ

Куы никуы уаин æз æвзæр.

1991 азы 20 январь

ДЫУУÆ ТАСЫ АСТÆУ

Фыдлæджы къухы лæг куы бафта,

Уæд уый æвзæр цаутæй у иу цау...

Иу хицауæй куыд тæрсы, афтæ

Фæтæрсы иннæмæй та хицау.

1991 азы 4 февраль

ÆВРОНГ ÆМÆ РАСЫГ

Цыты нуазæнимæ дын базыг

Дæтдзысты базæронды онг,

Æвронгæй ды куы нæ уай расыг,

Куы-иу уай нозтджынæй æвронг.

1991 азы 17 мартъи

ЗÆРОНД ЛÆГ

Бадынæн райдыдта агурын базтæ,

Хурмæ фæтавы йæ æргъæвст фæсонтæ...

Раджы йыл бонтау куыд ызгъордтой азтæ,

Афтæ йыл азтау ныддаргъ ысты бонтæ.

1991 азы 3 май

УÆЗДАН

Ныхъхъæрзы къæхты бын йæ цыт,

Нынниуы...

Хæцын куы хъуыди, уæд хæцыд...

Йæхиуыл.

1991 азы 7 май

ÆНАХУЫР ФÆНДОН

Цыфæнды дзаг куы бакæнай дæ гонтæ,

Нæ фæуыдзынæ ды уæддæр нымаддæр...

Адзалмæ мæ кæнынц хæстæгдæр бонтæ,

Кæйдæрты та фæкæнынц уыдон дарддæр!

1991 азы 8 май

ИУГÆНÆГ ДИХГÆНÆГ

Йæ зæрдæ хъарм куы кæнид риу,

Куы нæ дзы бадид мигъ,

Кæйдæрты уæд нæ кæнид иу,

Йæхиуæтты та — дих.

1991 азы 15 май

РАСЫГГÆНАГ

Арахъхъ куы нæ уа, уæд бæгæны

Кæны дæу ирвæзын, зæгъынц...

Лæг дæ лæджы хъуыды нæ кæны,

Куыдзы хъуыды та — куыдз.

1991 азы 27 май

ЗÆРДÆБЫН АРФÆ

Зондджын у зондджынæн алкæд æмсæр,

Дыууæ дæр хонынц рæстдзинад сæ фæтæг...

Макуы дæ баййафæд тохы æвзæр,

Хæрзты-иу уый бæсты баййаф дæхæдæг.

1991 азы 3 июнь

ФЫДЫУÆЗÆГ ФЕРОХГÆНÆГÆН

Тыххæй-фыдæй йæ фыдæлты бæстæмæ

Цы лæджы хонын бахъæуа фæстæмæ,

Нæй уыцы лæгæн райгуырæн, бæлвырд,

Нæ рауад лæгæй уæзæгæн та фырт.

1991 азы 7 июнь

МÆГУЫРДЗИНАД ÆМÆ ИС

Мæ хъуыды мыл æрæнцой кодта тары,

Мæ хъуыды систа мæйдары фæдис:

Мæгуырдзинад мæгуырдзинады мары,

Фæлæ нæ мары никуы исы ис.

1991 азы 10 июнь

ИВЫЛД ТЕРК

Фæбынæй кодтай уæлбыл нæуу,

Йæ сæрты алæгæрстай хуымæн...

Цæугæдон нал хонын æз дæу,

Тæхгæдон кæй дæ, уымæн.

1991 азы 25 июнь

УАРЗТЫ КÆРОН ÆМÆ ФЫДÆХЫ КÆРОН

Курын, иу хъуыддаг мын зæгъ —

Нæу хуымæтæджы мæ фарст:

Уарзты кæрон у фыдæх?

У фыдæхы кæрон уарзт?

1991 азы 26 июнь

СÆРЫХЪУЫН ÆМÆ ЗОНД

Куы дзурин æз, мыййаг, мæ фын,

Уæд уаин сонт:

Мæ сæрыл нал баззади хъуын,

Дæ сæры — зонд.

1991 азы 29 июнь

АФТИДСÆР ÆМÆ ДЗАГДЗЫПП

Бæласæн уарзы иуæй-иу йæ гуыпп,

Бæласæн уарзы иуæй-иу йæ хъæр...

Дæ сæрау афтид макуы уæд дæ дзыпп,

Уæд дзаг дæ дзыппау уый бæсты дæ сæр.

1991 азы 5 июль

ФÆСКЪÆВДА ХУР ÆМÆ ФÆСХУР КЪÆВДА

Ысхъомыл и æнæ мадæй,

Цола уыди, къæсхуыр...

Фæскъæвда хур, мæ нымадæй —

Фæлмæн къæвда фæсхур.

1991 азы 9 июль

ÆНÆ КÆРОН

Уадз йæ цæстысыт кæлæд

Знагæн, цалынмæ цæрон...

Цардæн ис кæрон — мæлæт,

Нæй мæлæтæн та кæрон.

1991 азы 15 июль

ФÆСМОН ÆМÆ ÆВÆСМОН

Фыдыбæстæ нæ ныййарæг у, ууыл

Нæ зарджытæ — сæ зæлангæй бæрæг...

Фæсмон кæныс, лæг мæ кæй хуыдтай, ууыл,

Нæ кæнын æз — дæу никуы хуыдтон лæг.

1991 азы 21 июль

ХОРЗ ЛÆДЖЫ ЧЫСЫЛ БОНТÆ ÆМÆ ÆВЗÆР ЛÆДЖЫ БИРÆ АЗТÆ

Амонд æм дардта йæ уазал фæсонтæ,

Дуртау уыдысты йæ нывæрзæн базтæ...

Хорзæй дæр иутæ нæ батонынц бонтæ,

Батонынц иннæтæ ’взæрæй дæр азтæ.

1991 азы 25–26 июль

НОДЖЫДÆР МА ХУЫСКЪ БÆЛАС ЦЪÆХ БÆЛАСÆН

Арвау у мæнæн æвдисæн зæхх,

Дзурын раст, мæ ныхæстæм лæмбынæг хъус:

Æз дæуау кæддæр куыд уыдтæн цъæх,

Афтæ ды мæнау кæддæр уыдзынæ хус.

1991 азы 27 июль

ЦЫ ХЪУЫД ÆМÆ ЦЫ НÆ ХЪУЫД

Йæ лæвар дын куыд кæна ад та —

Йæ райсын кæд нæ уыд дæ хæс?!

Йæхи цы нæ хъуыд, уый дын радта,

Цы мæ хъуыд, уый дын радтон æз.

1991 азы 29 июль

КÆРОН

Алкæй къубал дæр къæлæт

Сæлхъивдзæн кæддæр, фæлæуу!..

Царды кæрон у мæлæт,

Цард мæлæты кæрон нæу.

1991 азы 31 июль

ЗÆРОНД ÆЦÆГДЗИНАД

Кæд цагътай дæ удæй цъæх арт,

Уæддæр дæ хъысмæты ехс цавта...

Кæуынæй фæвæййы нæ цард,

Кæуынæй куыд райдайы, афтæ.

1991 азы 2 август

СÆРДЖЫНТÆ ÆМÆ ÆНÆСÆРТÆ

Кæд хоны хох нæ алкæцы йæ къæсæр,

Йæ сæрты хизы алы бон уæддæр...

Сæрджынты астæу разыны æнæсæр,

Æнæсæртæй та иуыл дæр нæй сæр.

1991 азы 11 август

АМ ÆМÆ УЫМ

Цъæх уæлвæз кæм бакодтой хуым,

Тæккæ знон дæр ма уым нæуу уыди...

Мæ хуызæттæ бирæ ис уым,

Фæлæ дзы ам къаддæр нæ уыди.

1991 азы 17 октябрь

АРАХЪХЪ ÆМÆ ЛÆГ

Кæд нозт дæ сæрмæ тагъд ныццавта,

Уæд дæм нæ кæнын æз хæлæг...

Лæджы арахъхъ куыд хъæуы, афтæ

Арахъхъы дæр фæхъæуы лæг.

1991 азы 10 ноябрь

ÆНАМОНДТЫ ÆНАМОНДДÆР

Рагон бердзенаг афоризмы мотив

Дæу иу хатт дæр нæ фенд æрхуымæй,

Дæ фæрсты дæр нæ ауад зæй...

Æнамонд чи никуы уыд, уымæй

Æнамонддæр дунейыл нæй.

1991 азы 11 ноябрь

ÆНХЪÆЛМÆГÆСДЖЫТÆ

Мæстджынæй ма лæбурæм хъæлмæ, —

Ныхкъуырд фыдгулæн зондæй раттæм...

Чи адæммæ кæсы æнхъæлмæ,

Кæмæ кæсынц æнхъæлмæ адæм.

1991 азы 21 ноябрь

ТÆХУДИАГМÆ ТÆХУДЫГÆНÆГ

Куыннæ уой уый хъуыддæгтæ уагыл,

Куыннæ уа райгонд уый йæ бонтæй,

Кæй бæх нæ амард даргъ фæндагыл,

Кæй ус нæ амарди зæрондæй?

1991 азы 2 декабрь

ДЫУУÆ КУЫДЗЫ

Какон бæлас хионæй нæ фæрсы,

Алкæйы дæр аныхсы йæ сындз...

Горæтаг куыдз адæмæй фæтæрсы,

Адæм та хъæуккаг куыдзæй тæрсынц.

1991 азы 14 декабрь

МИНÆЙ ЗЫНАРГЪДÆР СОМ

Гыццылæй мыв мæ мады ’фсымæр Хосаты Тæтæрхъан радта сом

Æхца мын батыхти зæрины,

Æнхъæвзта денджызау мæ цин...

Кæд нал и сомы кад дæр мины,

Уæддæр мæнæн дæ сом у мин.

1991 азы Ыдекабрь

КÆМ-КÆМ

Хъайтыхъты Георæн

Мæ тохси абады куы цыг,

Куы та мæм разыны йæ фыр...

Мæгуыр кæм нæ кæны хъæздыг,

Хъæздыг нæ кæны уым мæгуыр.

1991 азы 25 декабрь

МÆНГДЗУРÆГÆН

Дæ уæздандзинад баст у,

Кæнæм дæ уымæн хъаст...

Кæй фæдзурыс, уый раст у,

Цы дзурыс, уый нæу раст.

1991 азы 27 декабрь

ХУР ÆМÆ МИТ

Арвæй зæхмæ — рухсæй хид,

Обау хуссарварс фæсур...

Ацы хурмæ — урсдæр мит,

Ацы митмæ — ирддæр хур.

1991 азы 31 декабрь

ХОРЗЫ КОЙ

Æгъатыр — рæстæджы кæнонтæ,

Нæ дæтты алы заман сой...

Æнусы цас нымайынц бонтæ,

Фæкæнæнт уал азы дæ кой.

1992 азы 10 январь

ДЫ ÆМÆ ДÆ ЦАРД

Фæдисон раздæр мæлы хæсты,

Фæлæууы йæм гæппæввонгæй мæлæт...

Дæ цард кæд сæгад и дæ цæсты,

Ды дæр æгад — дæ царды цæсты уæд.

1992 азы 18 январь

ТЫХЫ ÆДЫХДЗИНАД

Кæд хондзысты мæн иуæй-иутæ сонт,

Уæддæр зæгъон, цы фæзæгъын æрвылбон:

«Æрыгоны цы тых кæны зæронд,

Зæронды хъуамæ уый кæнид æрыгон».

1992 азы 18 январь

ФАРОНЫ ХÆРÆГ ÆМÆ АЦЫ АЗЫ КЪÆЛÆУ

Куыннæ кæнон æз фаронмæ хæлæг,

Кæд дзы уыди сысджыимæ мæнæу дæр,

Фынддæс сомæй уыд балхæнæн хæрæг,

Фынддæс туманæй нал и ныр къæлæу дæр.

1992 азы 6 февраль

НÆМДЖЫТÆ

Фыдгулы ныхмæ лæуу хъæддых,

Цыфæнды зын куы уа, уæддæр...

Вæййы кæд сæры нæмæг дзых,

Уæд дзыхы нæмæг та у сæр.

1992 азы 13 февраль

КЪАХ ÆМÆ КАД

Æмбары алчидæр сымахæй,

Кæй нæ ис хоры кад зыгуымæн...

Кæй йыл ныллæууыдысты къахæй,

Йæ къахыл нал ыслæууыд уымæн.

1992 азы 13 апрель

ХÆЛÆГ

Лæгал хæлæг кæнын нæ фидауы, зæгъин,

Фæлæ ды никуы феууæндыс ныхæстыл...

Кæмæ ис, уыдоныл куы фæбарын мæхи,

Кæмæ нæй, уыдон уайынц уæд мæ цæстыл.

1992 азы 13 май

ИУ АДÆМОН ФЫССÆГÆН

Ахæмтæ нæ фехсæдынц хуыртæ,

Худгæбылæй ралæууы сæ сом...

Адæмыл цы лæг хаста дзырдтæ,

Уый хæссы ныр адæмоны ном.

1992 азы 15 май

ФЫДЛÆДЖЫ ХЪЫСМÆТ

звиад гамсахурдиайы [5] чъизи ном мысгæйæ

Дæ ном æмæ дæ мыггагæй дæ хъæстæ

Хъæстæ кæндзысты алкæддæр, хуыдуг...

Ныммарзта дæ йæ чъизидæр ран рæстæг

Æмæ дæ фехста чъизи ранмæ дуг.

1992 азы 15 май

ЦÆСГОМДЖЫНТÆ

Кæддæр дæ сфæлмæцыди хъæу,

Хуыздæр уавæры абон горæт нæй...

Цæсгомджын чи рахуыдта дæу —

Дыууæ хатты æдзæсгомдæр дæуæй.

1992 азы 20 май

УЫЦЫ АМОНДДЖЫН ДУГ

Мæныл кæд амонд дардта искуы й’арм,

Уæд уыцы дуг, куы нæ бадт не ’хсæн мигъ...

Дæ хъарм хъæбысæй зæрдæ кодта хъарм,

Дæ цæстæнгасы уазалæй та — их.

1992 азы 25 май

ДÆ СÆР ÆМÆ ДÆ КАД

Дæ фарнау — кадавар дæ зонд дæр,

Гæвзыкк — дæ хуымгæнды бæркад.

Дæ сæр — Хъазыбегæй бæрзонддæр,

Ныллæгдæр — фадхъулæй дæ кад.

1992 азы 10 июнь

«КОММУНИСТТÆ» ÆМÆ «ДЕМОКРАТТÆ»

Нæ дзы рыст иу дæр адæймаджы ристæй,

Сæхи хъысмæтыл уыд сæ мæт, сæ катай...

Уæд сайдтой коммунистты коммунисттæй,

Ныр сайынц демократты демократтæй.

1992 азы 15 июнь

КÆРÆДЗИЙЫ ДАРДЖЫТÆ

Хъомрæгъау, фысдзуг

Дарын нал у фæтк...

Лæг куы дарид хъуг,

Хъуг æй дарид уæд.

1992 азы 1 июль

ДÆ ЗÆРДЫЛ ДАР

Кæсыс сæрбæрзондæй, дæ цæсты

Ыстæм дыччыйы йæстæ ’рмæст,

Фæлæ уый зон: уæлæуæз бæстæм

Нæ уыны стырдæрæй дæу цæст.

1992 азы 27 июль

ДЫМЫСДÆР КÆНÆ ÆВЗАГÆЙ АРХАЙÆГ

Нæ дæ рахондзæн иу лæг дæр уæндон,

Зындгонд ысты дæ «хорз» хъуыддæгтæ рагæй:

Кæй нæ у зондæй архайын дæ бон,

Æдзухдæр уымæн архайыс æвзагæй.

1992 азы 11 август

АРАХЪХЪ ÆМÆ СПЪИРТТ

Нæ фехъусдзынæ булæмæргъæй «хъуахъхъ»,

Хайуанæн та йæ цæсты рухс у сирд...

Ыспъиртты хуызæн алкæд уæд арахъхъ,

Арахъхъы хуызæн макуы уæд ыспъиртт.

1992 азы 30 август

ИРЫСТОНЫ ЗНÆГТÆМ

Алексапдр Дюмайы мотив

Кæй ралæудзæни ацы бон кæддæр,

Бæрæг уыд уый уæ фæсчъылдым гæрæхтæй...

Уæ иуыл дæр кæй нæ разынди сæр,

Æрцауыгътой уæ уый тыххæй уæ къæхтæй.

1992 азы 23 ноябрь

ÆНÆУД

Фæнды мæм кæн мæсты, мæ лымæн,

Кæнæ та мыл чыр-чырæй худ:

Йæ удæн чи нæ тæрсы, уымæн

Нæ радта иунæг Хуыцау уд.

1992 азы 23 ноябрь

ХÆДДЗУ

Æз никуы кастæн схъæлсæрæй мæгуыртæм,

Сæ хорздзинад мæ алкæддæр фæндыд...

Кæдæм нæ цæуын хонгæйæ дæр, уырдæм

Фæцæйцæуыс æнæхонгæйæ ды.

1992 азы 31 декабрь

УДÆГАС ÆМÆ МАРД

Райста нæ фыссæг æнæхъæр, æнæсыппæй хорзæхтæ зæй,

Ницы уæвгæйæ цы нæ уыди а зæххыл, ахæм ын нæй.

Мардæй æгæстæ дæр ис, фæлæ уый у æгасæй дæр мард,

Уый тыххæй ничиуал зоны, кæм райгуырд, цы фыста, куыд цард.

1993 азы 1 январь

ХУЫМÆТÆДЖЫ ХЪУЫДЫ

Æрцыд мæ сæрмæ иу хъуыды, æрæфтыд,

Æмæ йæ хъуамæ гæххæттæн зæгъон:

«Æз мады фыд нæ уыдзынæн, фыды фыд

Хуыцауы фæрцы хъуамæ искуы уон».

1993 азы 18 январь

ДЫУУÆ НИЦЫЙЫ

Ахæмы къæбицы

Нæй бæркады хъæстæ...

Ницы уыди, ницы

Баззайдзæн йæ фæстæ.

1993 азы 22 январь

ТЫХДЖЫНДÆР ÆМÆ ÆДЫХДÆР

Кæны уæлахиз хаттæй-хатт дзыхджындæр,

Фæлæ йæ иу дуг нал саразы дзых дæр...

Кæддæр куыд кодтон бонæй-бон тыхджындæр,

Кæнын ныр афтæ бонæй-бон æдыхдæр.

1993 азы 1 февраль

ХИЦАУЫ ÆУУÆНКДЖЫН

Дæ хицауæй бирæ хуыздæртыл дæ сæт

Фæкалдтай, фæкодтай цæстмæхъус дæнг-дæнг...

Æууæнкджын куы ныллæууай хицауæн, уæд

Фыццаджыдæр нал ис дæхиуыл æууæнк.

1993 азы 7 февраль

БÆЛÆСТÆ ÆМÆ ЦЪÆХ НÆУУ

Æрцыди та уалдзæг æд цины хъæлæстæ,

Сæдæминон тæнæй йæ фæндыр æрцагъта...

Цъæх нæууыл куыд фидауынц ацы бæлæстæ,

Цъæх нæуу дæр бæлæсты бын фидауы афтæ.

1993 азы 11 февраль






Не нашли, что искали? Воспользуйтесь поиском:

vikidalka.ru - 2015-2024 год. Все права принадлежат их авторам! Нарушение авторских прав | Нарушение персональных данных